يومياتي انا والرجيم من مطبخ أم عبدالرحمن....

السلام عليكم ...
رجعت للمنتدى بعد ماكملت امتحاني والحمدلله

كنت ناوية بنرجع بقوة واندفاع ....لكن البارح فى الليل خديت قرار ليا فترة وانانتعارك مع روحي ... نبي ندير رجيم ونقص وزني
لكن الحق مع ضغط القراية والحوش والصغار نلقى فى المتنفس الوحيد فازو النوتيلا اللى نحس معاها بالاستمتاع و السعادة وأنا نأكل فيها ...

... شن سبب القرار اللى خديته فجأة البارح الساعة 2 فى الليل؟... السبب انى كنت مكسدة فقررت نتفرج على حاجة كوميدي بعد ماكنت نتصفح فى الاخبار على صفحات الفيس بوك (نكدوا عليا الله ينكد عليهم ) كل واحد يبي السلطة ويحارب في الثاني وكأنهم مش ولاد نفس البلاد ومفروض مصلحتهم وحدة...

المهم تفرجت على فلم أحمد حلمي اكس لارج ليش نفرهد على روحي ....زدت نكدت على روحي أكثر وأكثر ....
وقلت فى بالي لو استمريت بالوضع هذا نهايتي حتكون فى نفس حجمه بعد 10 سنين من توا .......
فخديت القرار الصعب والذي لا مفر منه وهو الرجيم ....لكن قعدت محتارة .... اى نوع رجيم ؟؟؟؟....
وقررت انه حندير رجيم منخفض الكربوهيدرات ( أتكنز دايت)...

اليوم أول يوم فى الرجيم
نبي نسال البنات اللى جرباته قبل.... كيف كانت النتائج...؟؟؟؟

وقررت أنه نزل وجبات الرجيم اليومية ( نحاول انه تكون بالصور قدر الامكان)
للي يحب يستفسد و تشوفوا النتائج على حقل تجارب فعلي ...
وحنزل معدل النزول اليومي بالجرام


اليوم الاول

الفطور : أومليت 2بيض بالزبدة.


الغذاء : سلطة ورق خضراء مع علبة تونة متبلة بزيت الزيتون وليمون.


العشاء : شرائح لحم صدر دجاج مع فطر طازج , ملح فلفل ,اسود ,وجبنة مودزريلا , وزيت زيتون , 3 حبات زيتون.

http://www.libyan-kitchen.com/galler...2012092900.jpg

اهلين بيك ام عبدو وان شاء الله بالنجاح والتوفيق ياااارب

ضحكتني المقدمة شوية وخاصة الفيلم حتي اني حضرته والفيلم روعةومضحك

ومهم للسمان وغيرهم من اللي يبوا يحققوا اي طموح

لانه نهاية الفيلم حلوة حقق حاجتين طموحه في التنقيص والمجلة اللي يبي يديرها

نتمني لك الرشاقة والصحة الدائمة

وموضوع حلو وبداية موفقة واكيد ببدايتك القوية هلبه بنات حيتشجعوا معاك

ويستفيدوا من طبخاتك اللي تنزليهم وممكن ينزلوا معاك ان شاء الله كنت نتمني نشاركك في برنامجك الرائع

بس لي الاسف لو نلقي اللي يطلع منك يدخلي مانقولش لا

وياريت بافطارك الصحي تشاركينا المسابقات المفتوحة الان في ركن الافطار الصحي تلقي اعلانها في ركن المقبلات الليبية

نورتينا وفرحتينا بقرارك وربي يخليك ويخلي صغارك وبوهم

تسلمي لوبا عالمرور والتشجيع

بالعكس انتى فى نعمة لانه معدل الايض عندك عالى
وجسمك يحرق فى الاكل ميخزنش فيه

... للاسف منقدرش نشارك فى مسابقة الافطار الصحى حاليا
لانه هذا الرجيم يعتمد على تناول نسبة كبيرة من البروتين والدهون
وتخفيض نسبة الكربوهيدرات لعند 20 جرام يوميا فى المرحلة الاولى ..
يعنى الوجبات الموجودة تنفع لهذا النوع بس من الرجيم.... لو لاحظتي
الفطور كان اومليت بالزبدة

عزيزتي جت في بالي قلت هادي خيرها طول بادية في الدهون هههه

بس شفت انه يعتمد علي الكربوهيدرات و ليش ماتقدري تشاركي شاركي بها

حتي في الاركان التانية متاع المقبلات العالمية او الليبي او المعجنات لانها مسابقة مفتوحة نراجي

فيك ماتنسي ومرات انطبقلك من حاجاتك لانه فيها دهون تنفعني يعني هههه سلامي للطموح قلبي معاك

ربي يوفقك يا أم عبد الرحمن وينولك الي في بالك

بس حبيبة المفروض تجربي طريقة الاكل الصحي وتعتمديه ديمة في حياتك

لأن الريجيم فترة وخلاص ينتهي وبعدها وترجعي لأكلك المعتاد


بصراحة ما نفهم فيهم الريجيمات بكل وما نقدر نستمر على واحد

لكن الحمد لله عندي حد معين للوزن ونفسياً نلقى روحي ننقص في الأكل



ربي يوفقك حبيبة وزي ما قالت لك لوبا ورينا وصفاتك ونزليها في المسابقات

وأكيد فيه ناس تعجبهم ويطبقوها

تسلمى عالمرور أم سارة ...
مشكلتي مش مع الاكل الصحي مشكلتى مع الشكلاته بكل انواعها وخصوصا النوتيلا....
باستثناء رمضان والعزايم ماكلتي صحية ....يعنى نستعمل فى كميات قليلة من زيت الزيتون و الزيوت النباتية او الدهون الحيوانية نادرا مانستعملها
غالبا اكلنا بالحبوب الكاملة سواء ارز او مكرونة او دقيق. ...
بس للاسف نقطة ضعفي الشكلاتة اولا والحلويات تانيا...
صايرلي زى الادمان .... فكرة الرجيم هذا ان يثبت نسبة السكر فى الدم فتنقص الرغبة فى اكل السكريات وهذا ليش انا اخترته

اهاااااااااااااا صار هكي توا فهمت عليك

هو حق الشوكولاته لا تقاوم واني الاولى ما نقدر نسيبها

لكن توا في فترة الحمل منقصتها هلبة لأن ما قدرتها حسيتها قوية

ربي يكون في عونك حبيبة ويقوي عزكم يارب

وان شاء الله تحققي الي تبيه

اهلين بام عبد الرحمن
اول شي ان شاءالله توصلي يارب كيف ماتتمني واحسن
بالنسبه للشكولاته علي قولتك محدش يقدر يقاومها الا كان حلفتي عليها مع ان الحلف علي النعمه حرام ولكن عندي اختي من كتر ما ادمان علي ايكالها حالفه عليها:p
اما اني مستحيل نقدر ندير رجيم قبل هكي كنت نقول ولكن توا في مرواحتي لي ليبيا 3 شهور لقيت روحي زايده 5 كيلو يعني من 60 لعند 65 انصدمتتتتتتتتتتتتت وقررت انقصهن وبكل صراحه اليوم بديت ههههه هدا اول يوم ورجيمي هوا " كوب ماء مغلي + م شاهي اخضر +م كمون + نص م زنجبيل + نص م قرفه + شريحتين ليمون " مرتين في اليوم قبل الاكل بتلت ساعه هدا سمعته من دكتوره مصريه في برنامج
لاني مانقدرش نتحكم في الايكال والرجيم هدا للبطن افضل شي يعني يحول الكرشه واني اول ماجبت ندير في رياضه روحت لي ليبيا بلا بطن اللي هدا حل فمه وتوا كاني في التالت خخخخ فقررت وان شاءالله نقدر
فننصحك تشربي ولو كوب واحد اول ماتنوضي
وعلي فكره اي رجيم ضروري من الرياضه ولو حتي مشي علي الاقل

لوبا ههههههههه تخيلتك سمينه ونراجي في دوري الاعتراف علي الكرسي الحق بنختارك باهي الا خشيت موضوع هدا هههه

ام سرو ردي بالك اني لما حملت نزلت غير علي الايكال والشكولاته كيفك من كتر منحبها كرهتها في الحمل

وان شاءالله يا ام عبدو توصلي كيف ماتبي وربي يوفقك في قرايتك ويخليك لصغارك وخبرينااااااااااااااااااااااا نراجو في النتيجه وان شاءالله علي خير يارب....

أم سارة
يارب تقومي بالسلامة انت والبيبي ويكون من الذرية الصالحة يارب...
انا فى الفترة الاولى من الحمل نكره كل شئ باستثناء برنجلز وسنكرس والتفاح
لكن فى الشهور الاخيرة تجيني عالبسبوسة والنوتيلا ....

شكرا حبيبتي المصراتيه ... وان شاء الله تفتكي منهم هالخمسة كيلو
الزنجبيل حاولت نشربه قبل لانه يشكروا فيه للصداع النصفى لكن الحق مقدرتاش ...
اما الرياضة بيني وبينك والله مافى ليها وقت لكن اللى صالح بيا شوية حكاية المشي
يوميا نمشي قريب ساعة ليش نوصل الجامعة .... كان هذا راهو راحت ليل وظلام ....
والحلف عالشكلاته والله مانقدره قداش بندفع كفارة يعنى بنفلس من الاخير....
وربي ينولك اللى فى بالك

اليوم الثاني

الفطور: امليت بيض بالزبدة و الفقاع والجبنة

http://www.libyan-kitchen.com/galler.../201209axa.jpg

الغداء :شرائح صدر دجاج مشوية 280 جرام مع سلطة خضراء

http://www.libyan-kitchen.com/galler...2012093001.jpg

العشاء: 3 شرائح جبنة قودا 90 جرام

معدل نزول الوزن

اليوم الاول 1500 جرام
اليوم الثاني 1000 جرام

بالتوفيق ام عبد الرحمن اهم شئ الاصرار والمعنويات العالية

ام عبدالرحمن ربي يوفقك في ريجيمك
لكن شنو صار فيك خلال الاسبوع الماضي نراجوا في تجربتك

وعليك السلام ام عبدالرحمن...ان شاء الله بالتوفيق فى الريجيم,بالنسبه لك الشوكلاته تخفف ضغط الدراسه والبيت,تقدرى تتحكمى بشويش ,يعنى قصدى خلى خطين متوازنين بين الريجيم وحب الشكولاته,مثلا اشرى علبه نوتيلا صغيره,عمرك ما تأكلى من الفازو مباشره,قررى ان اكل الشوكلاته كمكأفاه لك لعمل جيد,فكرة المصراتيه ,كوب او اقل ماء دافى او على الاقل غير بارد مع الليمون على الريق وتنتظرى على الاقل نصف ساعة قبل الافطار,ممتازه من تجربه شخصيه وكويسه حتى للامساك ,صح كلنا نتموا الوزن المناسب ولكن الاهم فعلا الصحة وخصوصا للوراثه دور فى هذا الموضوع.

ربي يعينك ويعيني معاك يااااااااااااااااااااااااااااااااااااااااااااااااا اااااه ما أطولها ههههههههههههههه من السمنه من جيبتي لبنتي وأنا بنقص لحد اليوم ننقص ونزيد وبنتي توا عمره سنه و8شهور وانا انراوح في نفس المكان ربي يعيني ولازم ننقص لأني ناويه نحمل بنتي كبرت ووزني 80 وااااااااااااااااااااااااااااااااجد عليا واللبس ما نحكيلك من 38 توا نلبس 46-ومرات 48 ربي يستر كثرت دووه ما عندي ما نقول بعد هكي يارب انحف على خير

بالتوفيق

موقفات حبوبات