[مشاركة في ملف البيتزا] بيتزا مطبقة من مطبخ bent libya
حبيت انشارك معاكم في نوع من البيتزا وهي البيتزا المطبقة من مطبخي
وهي من احد المعجنات الي زوجي يحبها مووووووووووووووت
هاي تعالو معاي للمقادير والطريقة
عجينتي هي عجينة 10 دقايق والله هده العجينة اني معتمدتها في البيتزا ليا سنتين
وماشيا معاي 100/100
المقدار الاول
كوب ماء دافي+كوب دقيق+2/1 ملعقة ص خميرة بيرة+ذرة ملح وذرة سكر وتخليهم 10 دقايق
المقدار التاني
4/1 كوب زيت+ من كوب الي كوبين دقيق معاه شوية B.B
بعد 10 دقايق للمقدار الاول ضيفي المقدار الثاني وتعجن جيدا حتي تتماسك وتغطي وتترك لحد ماجهزتي الحشو
يلا بينا انوتو الحشو
زي ماتحبي لاكن اتي حطيت مكونات البيتسا فقط والي هي [صالصة بيتسا+بصل جوانح ومحمساته في شوية زيت +وفلفل حاروحلو مقطع دوائر+زيتون احمر واخضر +وفطر وجبنة حمراء اني نستخدم في الجبنة الحمراء لان زوجي يبيها هي وبس الله غالب شن بندير لازم انرضيه +وطبعا رشة زعتر ورشة اكليل
الطريقة مع الصور
هذه العجينة
نمدهاكويس باليد في طاجين الكوشة بس مش رقيقة هلبا ومش غليظة
وبعدين ندهنها بالصالصة نصف العجينة ونحط جميع مكونات الحشو
وندهنها بالحليب ونثقبها بعود اسنان باش ماتتفجرش
ونزينوها كيف ماتحبيو
وتخليها ترتاح بس 5 دقايق وبعدين طوالي للفرن
طبعا كان انقوللكم شن صار في وقتها علي قد ماني فرحانة بيها وكيف دخلتها للفرن تم عليا الغاز وهرب الضي باش تعرفو الحظ ومالاقيتش حل الا اني انطيبها علي غاز الشاهي وقعدت نقلب فيا بالشوي بالشوي لين طابت وطلعت بصراحة روعة روعة روعة
وصحتين وعافية وسامحوني كاني عطلت وطولت عليكم
وسلاماتي للكل :)