[ المثرودة الشرقاوية ] من مطبخ أم أيوب
اhttp://www.libyan-kitchen.com/kitche.../images/li.gif
لسلام عليكم ورحمة الله وبركاته
كيف حالكم يا غاليات
نبي نحكيلكم قصة سريعة قبل ما نبدا
ايام العيد صورت كم أكلة من عاداتنا
للاسف تصويري كان بالموبايل وصار خلل كل الصور امتسحوا
وجعوني الصور بس أكثر حاجة صورة أيوبي مع خروف العيد
وصور المثرودة لأنها بخد طبق غير عادي
اليوم حملت برنامج استرجاع الصور رجعوا شوية من صور العيد
ولله الحمد صور ايوبي وصور المثرودة كانن موجودات
وفي مجموعة للأسف ما طلعوش
المهم نخشوا على جو الوصفة
المثرودة بطريقة عرب الشرق اللي انا ساكنة وسطهم
هي بالوصف تشبه الطبق المفضل عند سيد الخلق عليه أفضل الصلاة والسلام
طبقه المفضل الثريد
وفي وصف الثريد انه عبارة عن خبز مفتت ومروي بمرق اللحم يؤكل مع اللحم
وكانت عليه الصلاة والسلام لحمته المفضلة هي لحمة الكتف
وعند ناس الشرق اللحمة اللي تكرم بيها ضيفك هي لحمة الكتف
أنا قدمتها لأهلي لما زاروني في العيد في مزرعتنا
طريقة المثرودة ساهلة بس تاخد وقت
تتكون من خبزة تنور مفتتة ومبوخة على مرق لحم ومسقية بالزبدة
المقادير :
للخبزة دقيق حسب كمية المثرودة + ملح + ماء للعجن
تعجن كويس كويس كويس بكل (( الخطوة هدي قام بيها أبو الشباب ما عنديش لها جهد ))
تخليها ترتاح ربع ساعة وتعاودي تعجنيها من جديد
المهم بعد تقريبا ثلاث عجنات ديريها اقراص وغطيها كويس ترتاح
سخني تنورك كويس (( برضوا أبو الشباب تكفل بالمهمة قولولي انتي شن درتي ))
في هالوقت حطيت اللحم عالنار نجهز بيه المرق
اللحم مع مية وملح وبزار وورق غار بس بدون بهارات
ولو كان اللحم مش طازج ممكن تحطي شوي من حرارات الرز اللي مش مطحونة
وخليه يغلي نص ساعة لعند ما تطيب الخبزة
توة نمشوا للتنور
يكون الحطب اللي حطيتيه فيه قعد جمرات في قاع التنور
تعالي رشي شوية مية على ساس التنور من جوة
وارمي خبيزتك بالفردة
من تحت نحب نحط حيطات صغار عشان النار ما تحرقش الخبزة من تحت
(( هالخطوات صنع ايديا وحياة عينيا ))
http://www.libyan-kitchen.com/gallery/images/010jlj.jpg
وغطي تنورك خلي الخبيزة تطيب
في هالوقت جهزي مفرش او اي قطعة قماش نظيفة (( نخصصة لهالمهمة رداء ))
ولما خبيزاتك يتحمروا حوليهم ولفيهم كويس عشان ما تيبسش من الهواء
هنا بعد ماطابوا وتحمروا
http://www.libyan-kitchen.com/gallery/images/020zuz.jpg
بعدين نفتتها قطع صغيرة بكل ونحطها في كسكاس على مرق اللحم تبوخ لعند ما تطرى
ما نسقيهاش بيه نخليها مغطيه لعند ما تقعد طرية
http://www.libyan-kitchen.com/gallery/images/030.jpg
وقت ما تبوخ نسلق دحي وندير شوي تمر معصد عالنار زي البسيسة
نشكله كور ونخليه
نحمر شوي لوز مقشر في زبدة
ندوب الزبدة ويفضل تكون وطنية
نرفع المثرودة من الكسكاس ونحطها في صونية التقديم
نسقيها بشوي مرق مش واجد والزبدة
نزينها بالتمر والدحي المسلوق نقطعة شرائح أو ارباع زي ما تحبي
ونرش عليها اللوز
http://www.libyan-kitchen.com/gallery/images/040oho.jpg
نصفي المرق في فنجان
ونرفع اللحم في صحن بروحه
وهادي سفيرتنا تفضلوا معانا
http://www.libyan-kitchen.com/gallery/images/050bhb.jpg
وما يطيبش أكل المثرودة الا مع كباية لبن رايب تكون مصنعة من الستيل هههههههه
تفضلوا
http://www.libyan-kitchen.com/gallery/images/060.jpg
ملاحظة صغيرة تقدري ما تديريهاش باللحم ويسموها المثرودة الحلوة
تبوخيها على مية وليمون وقرفة وقرنفل
وتسقيها بحليب مع عسل وطني وزبدة
وقدميها بالمكسرات والتمر