[استفسار] عمل الأرز الأبيض حبة حبة

السلام عليكم حبيت نستفسر علي طريقة الرز المسلوق مش المبوخ اني كل مانديره يطلعلي كويس بس نبيه حبة حبة مع اني نقلي فيه قبل ماندير عليه المية كيف الحل

بليز نوروني

معليش وخيتي مافهمتش كيف ارز مسلوق ياريت توضحي

حسب ما قلتي انا ممكن فهمت شوي اول شي بنغسل الارز تم نضع الطنجرة علي النار تم نضع الزيت علي كمية الارز الي بطيبه تم نضع الارز تم نحركه في الزيت لين يمتص ماء الارز تم نضع عليه الشربة او ماء بحيت يكون الماء مغطي الارز مش واجد او بامكانك انك تقيسي الارز ونفس مقدار الارز نفسه ماء وتخليه يغلي علي نار عالية لين يمتص الماء تم تخليه علي نار هادئة الي ان يستوي ما تنسي تقلبيه من الحين الي الاخر وان شاء الله نكون افدتك

اختي همسة
في الرابط هذا اخت سئلت عن الارز والاخوات ماقصرن معاها شوفيه ممكن مشكلتك زي مشكلتها

[استفسار] عن الرز الابيض

بارك الله فيكم طريقتي اني اني ناخد ربع كمية الرز ونقليه في الزبدة والزيت بعدها نحط باقي الكمية ونحط عليه المية ونقيس فيه قياس مزبوط بس مايطلعش حبة حبة اني نبيه زي اللي في الكسكاس يطلع لاني نفضل فيه ابيض مع بعض الطبايخ وبارك الله فيكم ماقصرتو اخواتي

شنو نوع الارز هالي تستخدمي فيه ياحبيبه

رز قصير الحبة المصري

زي ماقالتلك أختي الصابرة شوفي استفسار عن الأرز الأبيض

مشكورة اوخيتي ام لينة

وعليك السلام والرحمة أختي

اول شيء الرابط الي حطاته أختي الصابرة فيه عدة اجابات ان شاء الله تفيدك

وثاني شيء

بما انك تستخدمي في الأرز الحبة القصيرة

فننصحك أول شيء تغسليه كويس كويس حتى يصير لون المية شفاف

وتزيلي كل النشا الي في الأرز

وثاني شيء لما بتكيلي الماء مثلاً كوب أرز بكوب ماء

نقصي شوي من كمية الماء

وصبي الماء المغلي على الأرزز مش البارد وخليه يغلي حوالي 3 الى 5 دقائق

قبل ما تغطي الطنجرة وبعد حوالي 7 دقائق قلبي الأرز بشوكة مش بملعقة

وطبعاً تكون النار هادئة جداً النقطة هذه مهمة

وضيفي زبدة للأرز حتى ما يلصق منا سواء في البداية أو في النص أفضل من الاخير

وذوقي الأرز بعد مرور 10 الى 15 دقيقة لو حسيتيه يحتاج للماء ضيفي له شوي

والا خليه مغطي 5 دقائق بعد ما تطفيء النار عليه وقلبيه بالشوكة


طبعا لازم تشوفي نوعية الأرز كويسة أو لا فليها دور كبير



وان شاء الله نكون أفدتك أختي

هذه طريقتي في الأرز وديمة اندير فيه ويجيني كويس ومحبب

مشكورة اوخيتي ام سارة بارك الله فيك وربي يحفظلك سارة

كان تبي طريقة الرز حبة حبة ( رز بلاو )زي رز الاعراس
بوخي الرز على مرقة دجاج فيها دباير رز البلاو( فلفل اكحل - هل - زنجبيل-قرنفل - قرفة - عود لحم -ورق غار - ملح - شيبة و شوش الورد حسب الرغبة) و مادا بيك اتحط عظام المفصل معها متع الجمل حتى تزيد المرقة حلاوة مع الدجاج وراص بصل و طماطمة تخلي الرز يبوخ التويخة الأولى و بعدين تنزلي الرز و تنقعيه في المرقة الي تحته لين ايمصها شوية مش اتخليه هلبة و تصفيه و ترديه على الكسكاس لين ايطيب بعد مايطيب اتحببيه بالزبدة أو السمن زي ماتحبي وشوية عسل لقليل من الحلاوة و اضيفي المكسرات و الكبدة و بالهناء و الشفاء
و الطريقة هدي أفضل طريقة يمشي معاها أي رز

وخيتي زاد الاسرة اني مانبيش في الكسكاس نبيه طايب عادي رز ابيض يعني

بالنسبة لطريقة الرز في الطنجرة هذا يتوقف على نوع الرز إدا كان الحبة القصيرة ( الرز المصري ) طريقته تقلي الرز في الزيت ( تصبي الزيت زي ما تطفي البصلة ) لين تحسي الرز تحمر شوي و كيال الرز القصير طاسة رز بطاسة و نصف ميه و الرز الطويل طاسة رز بطاستين ميه( طريقته نفس القصير ) و لكل طاسة رز ملعقة قهوة ملح وتخليه على نار هادئة و مغطة الطنجرة مضبوطة و المرقة المكيلة تكون ساخنة وخليها تغلي شوية بعدين هدي النار وان شاء الله تمشي معاك الطريقة هادي اني نستخدم فيها وهي اسرع من المبوخ .