[ مشاركة في مسابقة الشطارة في الدوارة ] بعض الطرق وقت حشو العصبان من مطبخ لوبا

http://www.libyan-kitchen.com/gallery/images/vb.gif

السلام عليكم ورحمة الله وبركاته


طريقتي الاولي وهيا عن تجربة واصبحت عندي اسهل في عملية الحشو


وهيا اني نضيف كل مكونات الحشو ماعدا الاعشاب الخضراء

ونضيف عليهم كل البهارات و الطماطم والحرارات و كل شئ


ونخلط كويس ونشوف شنو ناقصها من لونها وبنتها



http://im38.gulfup.com/5L9Nn.jpg




وبعدين انضيف الاعشاب




http://im38.gulfup.com/GWPlp.jpg





و نعرف هكي اكتر هل هيا تحتاج الي طماطم او فلفل يعني لونها و ارزها وبنتها تبان اكتر بدون اعشاب


وارتحت في الخلط لاني ديمة نتعارك اني والكسبر الاخضر وقت الخلط مع طماطم الحكة




طريقتي التانية عند حشو المصران المتوسط والغليظ وحركة اتمي بيها بسرعه


نمسك فتحت المصران نفتحها باصابعي السبابة والابهام في ايديا الاتنين


http://im38.gulfup.com/SJBx9.jpg




ونقربه علي الحشو ونسحب الحشو الي فتحة المصران باصابعي الوسطي و البنصر ان شاء الله الصورة تكون واضحة



http://im38.gulfup.com/ANvvB.jpg




http://im38.gulfup.com/staLQ.jpg





ونعبي بسرعه ونرفع المصران وانزل الحشو وهكدا وان شاء الله حتلقوها ساهله

وسريعه جدا جدا لتكملة الحشو وخصوصا المصارين




اما طبيخة الكرشة ( المرقة ) نحط معاهم طرف لحمة وفي اخر

ربع ساعه للكرشة نحط معاها المكرونه واطيب كلها مع بعضها

وهادي مهمه للعائلات اللي عندهم صغار


http://im38.gulfup.com/jaEMa.jpg




وهدا عصباني بعد طاب ولله الحمد



http://im38.gulfup.com/IfI79.jpg



http://im38.gulfup.com/vEkjF.jpg




اتمني ان تجدوا الفائدة في موضوعي

تقبلوا تحياتي وشكرا لابني علي التصوير

ماشاءالله ولاقوة الا بالله

ربي مايحرمنا من افكارك يا ام الافكار وربي يعطيك ماتتمني
لك احلى نجوم واكيد لي عودة للتقييم

تسلم ايديك يا لوبا وصحتين عليكم
اني لتوا مادرتاش عصبان العيد
وربي يخليلك سفيان
جاري التقييم

اهلين بالغاليات اسعدتوني بردكم و نورتوا الموضوع

ما شاء الله لوبا علي الافكار
عجبتني فكرة الخضار اخر شئ
بس فكرة الحشو انحس قيها صعبه
ولاني زي حبيبتهم مازلت ما درت عصبان العيد بادن الله نجربها
لوبا طبيخة الكرشه نفس طبيخة المكرنه او لا
تستحقي النجوووووووووووووم

اهلين ام خدوجه
طريقة الحشو جربيها اني ماحد قالي عليها بروحي
جت معاي هكي في اﻻول تستصعبيها شويه وبعدين ماعاد تقدري تحشي اﻻ بيها
اني حتي المصران اﻻقل غلظ من مصران الشحم ندير بيها لو القمع تعبني

اما المكرونه ايه في طبيخة الكرشه ﻻنه اني المصارين
ديمة في الكسكاس والكرشه تحته وزي ماقلت فوق نحط معاه لحم
مرات افراد من العيله ماتاكل عصبان ونحط فيها في اخر الربع اﻻخير
قبل اطيب الكرشه ونطلع الكرشه و انقص النار و نضيف التوم او كسبر اخضر
ولو تبي زبادة ماء زيديها ماء ساخن مغلي حتي ولو الكرشه موجودة معاها
وصحة مقدما لعصبانك

ماشاااااااااااااء الله عليك
تسلم دياتك وديات ولدك ربى يحفضه

ماشاء الله افكار رائعة بارك الله فيك على ماتقدميه فى ميزان حسناتك

تسلمى لوبا وسلم اوليدك وان شاء الله تشوفيه دكتور

وحتى انا دوارتى مازالت فى التلاجه كل مانفتحها نلقاها تعفرت عليا

اسعدني مروركم وفيكم بارك الله

ماشاء الله طريقة روووعة متاع خلط المكونات وبعدها الأعشاب حتى اللحم يتبل مزبوط
وطريقة الحشو جديدة عليا ربي يسلم يديك ويبارك فيك
ويحفظلك وليدك ماشاء الله تصوير احترافي
لك مني 5 نجوووووووووم

مااشاءالله تبارك الرحمان علي العصبان يسهف والطريقه حلوه
يعطيك الصحه ولكي تقيمي

بسم الله ماشاء الله ربي يعطيك صحيحتك ويبارك فيك..
منظر العصبان والظولمة والمكيرينة يجو في الخاطر.
إن شاء الله بالصحة عليك وفكرة الخلط بدون اعشاب حلوة وتعرفي كمية الطماطم المطلوبة.

سلم ايدياتك وصحة صحة
والفكرة الحلوة ولك احلى تقييم

تقريبا اندير في نفس الشيء ديمة نحط في الدباير على خلطة اللحمة والشحمة والكبدة غير نقلي في في الدباير شوية على النار وبعدين محط اللحمة والكبدة والشحمة بعد ما نزلها من عللى النار نحط الخظرة كل عام وانت بخير عصبان من ايدك عسل

بارك الله فيكم اسعدني مروركم ربي يسعد ايامكم
كل عام وانتم بخير 2014