اين اجد طرف ماكينة الكعك الحلو ؟؟؟

السلام عليكم ياحرائر

لوسمحتوا من تعرف وين نلقه هدا القمع الابيض امتع الكعك الحلو

ويكون يركب على الماكينة متع الكعك

قداش لينا اندورو عليه في طرابلس ماحصلناه

ممكن تساعدوني بس ياريت بسرعة عشان رمضان على الابواب

ملف مرفق 1407

ملف مرفق 1408

غريبة انك مقيتيش في طرابلس
موجود في كل محلات الماعين تلقيه ديمة مع قاطعات البسكويت واشكال السلة
اني الفترة اللي فاتت شفته في محل في الهضبة لكن بالزبط مانعرفش نوصفه
ان شاءالله وحدة من الاخوات ادلك بتفصيل اكثر

ﺍﻧﺎ ﻣﺎﺩﻭﺭﺗﺎﺵ ﺑﺮﻭﺣﻲ ﻟﺎﻧﻲ ﻣﺶ ﻓﻲ ﻟﻴﺒﻴﺎ ﻭﺍﻟﻠﻲ ﻧﻮﺻﻴﻪ ﻳﻘﻮﻟﻲ ﻣﺎﻟﻘﻴﺘﻬﺎﺵ ﻟﻬﺬﺍ ﻧﺒﻲ ﺍﺳﻢ ﻣﺤﻞ ﻋﺸﺎﻥ ﻧﻨﻌﺘﻬﻢ ﻋﻠﻴﻪ طوالي

اه والله ماني عارفة لكن حاضر توا نسئلك
او تخش وحة من الاخوات وتساعدك

أهلين نورية القطاعة تلقيها في محلات الماعين زي ماقالتلك الصابرة
لكن لو محصلتيهاش أني عندي فكرة ليك من زمان متبعينها في الحوش تاخذي مغاطا المنياكة خودي إتنين بيش يبدن صلبات إتحولي الجزء اللي فيه الحروف وتخليهن مسطحات وتفتحي فتحة في النص في المغاطا الإتنين وتحطي فيهن قمع الكريمة المجرح للكعك المنقوش والأملس للكعك العادي وهكي تتحصلي علي كعك إمساوي وحجمه حلو
مش عارفة وصلتك الفكرة وإلا لا كان هادا إندورلك إمتعاتنا ونصورهلك

هلا نورية أنا والله مانعرف وين يبيعو فيه لأني عمري ماشريته
لكن أهو الصابرة قالتلك يبيعو فيه
بالنسبة ليا نستخدم في قمع صغيرون جاي مع ماكينة البسكويت عارفتيها متاع زمان؟
هذي صورتها

http://im38.gulfup.com/Waxd2.jpg


يجو معاها أقماع صغيرونة واخذة اللي يناسب الكعك ودايرة الفكرة متاع لوتي
غطاء فازو شوكولاتة حفرته من الوسط فتحة صغيرة يخش منها القمع بس

هذي الصورة ان شاء الله واضحة

http://im35.gulfup.com/ojJTU.jpg


وبعدين نركبها على الماكينة


http://im41.gulfup.com/nlOWr.jpg


ان شاء الله وصلاتك الفكرة وتستفيدي منها
طبعا هذي دايرتها من زمان مانعرفش وين يبيعو فيهم
كان نعرف ماتعبتش روحي ههههه

وعليكم السلام أختي ..... تقريباً شفته في محل الماعين اللي في راس حسن اسمه البيت المعمور وعنده فرع أخر بعد مستشفى الخضراء بشوية على اليسار المحل هذا كل شئ فيه

صح بنت حواء هكي قصدي

ﺑﺎﺭﻙ ﺍﻟﻠﻪ ﻓﻴﻜﻢ ﺟﻤﻴﻌﺎ .. ﻭﺑﻨﺖ ﺣﻮﺍﺀ ﻭﻟﻮﺗﻲ ﻓﻜﺮﺗﻜﻢ ﺣﻠﻮﻭﻭﻭﻭﻭﻭﺓ ﺣﻨﺪﻳﺮ ﻣﺤﺎﻭﻟﺔ ﺍﺧﻴﺮﺓ ﻭﻛﺎﻥ ﻣﺎﺻﺎﺭ ﺷﺊ ﻓﻂﺮﻳﻘﺘﻜﻦ ﻫﻲ الحل