خير يا بنات
الرز احسن حاجة نحبها في الاكل
مستعدة ناكله كل يوم
وبأي شكل الا الرز الابيض العادي
يعني الرز بالنسبة ليا لازم يكون متبل محبش فيه نكهة
ومرات نكون جيعانة بس نبي حاجة جارية
واللي معاي عادة مش خاطرهم الجاري
وخصوصا في انصاص الليالي الباردة
معناها تختم عليا بروحي
ناخذ طنجرة ووالنية رز جاري
كيف بيش شنو امتى مش معروف
لأن طول ما انا قدام الطنجرة وانا نحط فيها بعفو اللحظة وجنوح الخيال اللي يشحذ فيه الجوع
مشكلتي النكهة
ومشكلتي الملل
ديما ندور علي طعمة جديدة
ونكهة تاسرني
ومرات ندور علي طعمات قدم مازالن في ريقي
حاجة جارية من ايدين جديدة ام بابا الله يرحمها
مثلا
او حاجة كليتها عند ناس نكهة طعامهم تختلف عن نكهة طبخنا
المهم الطنجرة على النار
نحط شوية من شحم القديد اللي فاضل عندي واللي قاعدة نقرط فيه بالنقطة
لعند ما يسخن الجو وندير قديد
كنت داقة الثوم وكمية لاباس بيها
ضفته وخليته يقلي علي نار هادية بيش ما ينحرقش
ماحطيتش بصل لأن قديدي او ما بقى منه فيه بصل
ونحط الفلفل الاحمر المطحون
وقرون فلفل اخضر واحمر حارة
وبزار
وملح
وصبيت حكة متوسطة صلصة طماطم – مش معجون
محاولة نتخلص من استعمال المعجون
وحطيت حفنة بازيليا وحفنة حمص طايب
وقلبت الخليط وخليته يتقلي على نار هادية لعند يطلع زيته
بللت الطبيخة
ولما غلت حطيت الرز حسب الكمية
وخليته يطيب
قبل ايطيب بشوية قرضت شوية حبق وحطيته عليه
ومرا نحب نقرض له شوية شبت طعمته احلى
وكنت مش قادرة نصبر مغير امتى يطيب
المهم جا عينه صفرة ومحبب ويلمع ويسهف اللي ما يتسهف
حتى ان اللي قال مانبيش ناكل
ماحولش عينه منه نين حلفتله يذوقه
وقريب كمله عليا
ماني درته شوية عشان السهفة بس
تبقن علي خير
:p