[كسكسى بالبصلة]من مطبخ أم يمنى

يابنات بنقوللكم اليوم سر خطير وح تشكرونى عليه طول عمركم ::

اليوم الصبح صممت ندير كسكسى البصلة متع الاعراس , خشيت الكوجينة وأول شئ خذيت

المقادير ::
6 بصلات قصيتهم شرائح رقيقة
كوبين حمص
حطيت فى طنجرة شوية زيت , وطرحت الحمص وفوقه البصل
وحطيت الطنجرة ع نار هاااادية.

http://www.libyan-kitchen.com/gallery/images/3sxs.jpg





جيت للكسكاس حطيت 3 أكواب كسكسي وشوية مية فركته بيها , وخليته لانى بنجيه ثانى .
خذيت الطنجرة حطيت فيها لتر ماء وخليتها ع النار حتى تغلى .





فى هذه الاثناء خذيت صينية وفيها ::
3 ملاعق طماطم معجون
ملعقة كبيرة (كركم +كروية + كسبر )
ملعقة كبيرة ملح
8 قطع لحم ( قلتلكم عايشة الدور ومدايرة جو عرس )
كوب زيت أو أكثر ( عينى ميزانى )
خلطى كل المقادير مع بعض , وبعد أن تغلى المية ع النار حطيهم فيها وخليهم ع نار متوسطة.
نرجع للكسكسى نخلطه ثانى بشوية مية ( متكتريش ياذوب تبخبيخ, حلوة تبخبيخ ) بخ , ونحطه ع الطنجرة اللى ع النار ونغطيه ونخليهم .


بعد حوالى ربع ساعة نشوف البصلة ونضيفلها شوية مية ممكن ربع كوب وماتحركيهاش لان الحمص نبيه يقعد تحت .
نجى للكسكاس نلقاه يبوخ ننزله
وهنايا السر
نأخذ نصف ملعقة سمن وربع ملعقة قرفة وربع ملعقة قرنفل مطوحنين وشوية
من مرقة اللحم ونخلط الكسكسى كويس ويأخذ كله لون واحد ونرده ع النار .

ونجى للبصلة نلقاها ذبلت شوية نأخذ تقريبا كوب من مرقة اللحم ونضيفها للبصلة مع شوية طماطم معجون
ممكن نصف ملعقة وملح وكركم ونحركها ونخليها ع النار حتى تجف المية ونشوف الزيت بس .

http://www.libyan-kitchen.com/gallery/images/4vvv.jpg




الوقت اللى يأخذه هذا كله ساعة ونصف بالضبط .
نأخذ صينية ونحط فيها الكسكسى ونحببه بشوية من المرق ونرتب فوقه اللحم وبعدين البصلة ,
والله العظيم بعد ماتأكليه وتغسلى ايديك والصوانى الا تشمى ريحة كسكسى العرس , وأدعيلى , فيه صينية صغيرة بعتثها لجارتى





عاد أكيد فيه هلبة منكم يعرفوا الموضوع وفيه منكم أول مرة , وهذه طريقتى بالتفصيل الممل ,
غدوة جمعة فرحوا العويلة وقولولهم اليوم بتأكلوا كسكسي عرس . وديروه , راهو مايأخذش وقت والنتيجة ح تكون مرضية وأكثر .وسلامتكم





http://www.libyan-kitchen.com/gallery/images/7ioi.jpg

http://www.libyan-kitchen.com/gallery/images/8vkv.jpg


http://www.libyan-kitchen.com/gallery/images/82oto.jpg

مشاء الله تبارك الرحمن علي ايدياتك
وين المشروب و المسير والزيتون
هههههههه وزمزمات
افتحي الباب بنتغدي معاك

ماشاء الله إشتحشت كسكسي العراس
وماشاء الله عليك إستمتعت بسردك للموضوع
موضوعك حلو والكسكسي يبان رووووووووووووعة ويهبل
بس زي ماقالتكلك بيلسان وين المسير والمشروب
هههههههههههههههههه
هدا ضروري في العراس
وأحلى تقييم لعيون أم يمنى الرائعة

http://www.libyan-kitchen.com/gallery/images/82oto.jpgيسلمو الايادى جبتيه فى خاطرى غدوة جمعة انشاالله عداى وانى خديت القعد وهربت

ماشاء الله لاقوة الا بالله

كسكسي ايجي في الخاطر والله

ربي يسلم ايدياتك الحلوة

على الموضوع وعلى الشرح الواضح

بالهني والعافية على قلوبكم يارب

ماشاء الله، تسلم ايديك..

ياحسسسسسسسرة علي الاعراس والله استاحشت هاديكا الايمامات الزمزامات يخبطو والوشيقة والصدرة اااااااااااااه ان شاء الله ربي يعطينيا ايامات حلوة زي زمان ياربي

تسلم ايدياتك علي هالكسيكسو المققوم والله هاداكا الزمني تسلم ايدياااااااااااااااتك

أم بيلسان : ضحكتينى , يعطيك السلامة , وتعالى تفضلى , أهلا وسهلا بيك , تنورى وتآنسى .
أم سجى : مشكورة ع الرد وأحلى تحية ليك ع تقييمك , وتفضلى معزومة انتى وأم بيلسان , ولكن حشمتى جيت فى المسير والزيتون والمشروب , جيبوه معاكم ( معازيم وجايبين هدية شن فيها )
أ م ايناس : غير استنى وين هاربة بالقعد مازال مادرتلاش القرفة فوقه ’ بالهنى ياحنة .
أم سارة : مشكورة ع الرد , وما يقعد شئ فى خاطرك , انتى تؤمرى واحنى حاضرين للطيبين .
سوسو: الله يسلمك , ومشكورة ع الرد .
نانا : ان شاء الله تعود أيام الاعراس والزمزامات وان شاء الله نشوفو أيام أحلى وربى يحفظ أهلنا وبلادنا يارب .
والله فرحتونى فى ها الجمعة المباركة , ربى ان شاء الله يفرحكم .

ييييييييييييي ياام يمني والله حسك جوعتنيني تعرفي

مشاء الله تبارك الرحمن والله الا انت الي تبي تبخيبخ علي قولتك بمية القران

ربي يحفضك حبوبة

وبنته حسيتها في ريقي

اممممممممم عالصنة الفايحة والله خطرتي علينا جو الاعراس حق
يسلموا ايدياتك وتوا انديرها طريقتك وتستاهلي احلى تقييم

اييشششيه ياكبدى , قاعدة نأخذ فى التقييم ماشاء الله , ولاول مرة , كان نندرى راهو من زمااان نزلته , واليوم انتظروا سر ثانى بنقوله ليكم , استنونى بعد شوية , مشكورة سحوبة ردك ضحكنى يعطيهالك , بنية بوها ربى يخليك فرحت بالتقييم مشكورة انتى وام سجو , والباقى بخيلات ماعطونيش تقييم .

يعطيك الهني ياام يمنى موضوع مسلي في الحديت وطيب المذاق وشهي في الاكل وتوا جبتيه في الخاطر وطريقتك قنينة وسهلة وبااذن الله نديره ونوريهولك

واهذا احلى تقييم راني مش بخيلة ههههههههههه

ماشاء الله

يسلمو ايدياتك ياحبوبه

انشم فى ريحة البصلة من فم الباب
مااااااااااااااشاء الله حبيبة كسكسي يهبل
تسلم الايادي

ماشاء الله

تسلم الايااادي يالغلا

تسلم الايادي ماشاء الله ربي يعطيك الصحة

ماشاءالله
يعطيك الصحه

سلم دياتك ويعطيك العافية
ربي يحفظك يارب

الصنو فايحة و البصلة راكحة يعطيك الصحة و تسلم ادياتك بس نبي نسال لك وحشة يا ام يمني ربي يحفظك

جوعتينا خالتي ام يمنى يسلمو ايدياتك

كنت اندور في النت عن سر كسكسي الاعراس ولقيت هذا الموضوع وخشيت نقره فيه رغم اني عضوة في المنتدى لكن مشفتاش

لفت نظري طريقة عمل البصلة والحمص وكانت بالنسبة لي اول مرة في حياتي نشوف هذه الطريقة ، وفي اليوم التاني قررت انديره رغم اني كنت متخوفة زي كل مرة اندير اكلة جديدة او بطريقة جديدة لكن كنت واثقة انها طريقة مضمونة بإذن الله

وبصراحة مطبقتش خطوة السر الاصلية اللي هي القرفة والقرنفل لان العيلة عندنا ميحبوش البهارات هلبة على الكسكسي يحبو سمن بس

لكن طريقة البصلة كانت روعة تبارك الله وتوفر الوقت بدال التبويخ على الكسكاس وكانت الطعمة حلوة هلبة

ولذلك قررت نشكرك حبيبتي ام يمنى وتسلم ايديك بصدق وندعيلك كل مرة انديره ربي يحفظك ويحفظ اولادك وكل من يعز على قلبك

وهذه كلمة شكر وتقدير مني نقدمها للغالية ام يمنى لان طريقتها كانت روعة فحبيت نشكرها ومن لايشكر الناس لا يشكر الله

الف شكر حبيبتي

وان شاء الله يوصلك الشكر وانتي بخير

ماشاء الله، تسلم ايديك..

حلوووو
تسلم إيدياتك
5 نجيمات