-
اذكرت ايضا المكنسة الكهربائية متع تيفال الحق حلوة ومريحتني
وايضا الة البيتي فور والقوالب السيليكون عاجبيني هلبه لان نستعمل فيهم في كل شئ تقريبا سواء في الفرن او الفريز حتى كيك الايس كريم نستعمل فيهم فيه
الة الكريب حتى قنينة عندي الة للامانة ماشريتهاش بس خديتها من حوش بوي هي الة صنع الزبادي الحق فادتني هلبه هلبه خصوصا في الازمة زي ماتعرفو ان الزبادي الطبيعي انقطع وانا نفضل النسيم فجتني زي الرحمة
وكل ماندكر حاجة نكتبهالكم
-
اولا كل عام وانتى بخير وموضوع رائع ويستحق المشاركة
بالنسبة لى اكثر الة شريتها واستفد منها ست البيت من هومر روعة والقلاية والفرنيلو نفعنى ايام الكربة الله لا يعودها ايام واخيرا شريت عجانة من هومر حتى هي كويسة ونفكر ناخذ طاجين بيتسا يارب نكون افدت زي ما استفدت
-
السلام عليكم ورحمة الله وبركاته
اني بصراحة مش عارفة من وين نبدا هههههههههههه
خليني نحكي على الحاجات الى مش مستفيدة منهم
قلاية حرام كان ما شريتها راهو نبتت نخلة فى راسي وملوحة تحت ببكوها تاخد فى هلبة زيت ومش عملية بصراحة يعني كان قليتي حاجة فيها لحم لاازم انغير الزيت قصة ..
مجفف الطعام يجفف فى اللحم والخضروات هو جاني هدية لكن ملوح جربته مرة وحدة وبعدها حلفت
الة التوست الى تتسكر يعني التوست يكون مسكر ملوحة حتى هيا
مبشرة التشبس انسي ملوحة نفس الشي
مكيف ملوح تحت احنا النظام فى حوشي الجديد ما فيش مكان للمكيف لاازم فى الصيف انحوله تعبنا من ركب نزل
الميكرويف ما عنديش فيه كثر استخدام بصراحة
وبالنسبة للحاجات الى مستفيدة منهم
ست البيت
مفرمة شربة العدس
مضرب الكيك
خلاط الفروبي
فرن صغير
مطحنة القهوة روعة
طنجرة الرز
عجانة مستفيدة منها خاصة فى البازين
مفرمة الصراحة روعة نفس ست البيت بس حجم كبير
غسالة المعاين مش مستفيدة منها هلبة بس ما نستغناش عليها استخدامي ليها مش دائم اكثر شي فى رمضان او لو عندي ضيوف
طبعا اني تكلمت على حاجات المطبخ بس لو ادكرت شي تاني راح نرجع نكتبه
بس عندي سؤال اني شوفت كذا وحدة كاتبة الة الدونات شن تقصدوا بيها ؟؟؟
-
موضوعك مهم ...
ياريت تكون المواضيييع اللي زي هدي متنوعة وفي كل شئ يخص البيت الليبي .. انا شايفة ان المنتديات الاخرى اكثر تعاون بين العضوات ...
اكرر شكري ل اختي زينب واكيد لصاحبة الموضوع ...
نبدا بالمطبخ ... الميكروويف امريكي "ستنق هاوس " ممتاز "
والثلاجة ام بابين يعني تلاجة وبرادة بس بالطول وادراجها مريحة وفيها ميزه وهي زيادة سرعة التجميد الى 27 تحت الصفر الماركة تركية "ارشليك"و الفريز ايظا" تركية نفس الماركة "ارشليك" ممتازيين ولله الحمد
والفرن كان عندي تركي وفي الازمه فسدت واشتريت صينة "كي تي سي " بس زوجي الله يحفظه ليا .. غير فيها اشياء .. يعني عدل فيها ... اصبحت ممتازة ... مضرب الكهربائي مولينكس ... والعجانه ماركة بورش "المانية" بس عيبها تحمل كيلو دقيق بس ... وعصارة البرتقال مولينكس .. والرحاية مولينكس صغيرة ... وست البيت للاستعمال العادي هومر .. بس التانية معاها مضرب يدوي ومضرب للشربه ومعاها محضر الطعام ..من مولينكس .. والمسخن الكهربي مولينكس . والغسالة بورش المانية ممتازة .. وبالنسبة للشاشات .. عندي ال جي ..والسامسونق و البانسونق ... بس اانحب صورة الل جي .. وان شالله نكون افدتك اختي الغالية واتمنى مشاركتي معكم مفيدة ...
-
أكثر جهاز استفادت منه العائلة
هيا غسالة اتوماتيك
والله احسن حاجة في الحوش
ا
-
كلكم اجهزتكم نهبل متابعكم وحدة وحدة
لين قريب نولى اله ههههههههههههه
تبيدوهم بالهنى اللى ناقصة عليها حاجة ان شاءالله يديرها
موضوع رائع
بس زيدو التفاعل ياحلوات
-
ماشاء الله عليكم يا بنات يا كتر حبنا للماعين والالاتبالنسبه لياالعساله الاوتوماتك ريحتنى هلبه وخلاط ورحايه مولينكس وست البيت روعه الصراحه وللكعك الحلو اندير بماكينه اللحم ايجى حلو وهدا ما عندى والحمد لله
-
وانا احرف منك يادوجة نقرا بالوجدة ونكتب في المدكرة بش نحطه على خاريطة المخططات هههههههههههه ياهمه الراجل مني لين معش عندي وين نحط حاجاتي والا مدكرات الطبخ امتاعي ههههههههههههههه مشاء الله كل شنطة نحصلها وخصوصا متاعات اللاب توب ومعش يبو يستعملوها اي في حد في الحوش ناخدها ونديرها لكتاباتي وكراساتي ههههههههههههه هيا نشطونا ارواحكم
-
السلام عليكم
موضوع مميز...............زالصراحة انى اكثر حاجة استفدت منها هيا الكاتل( سخان الماء)خصوصا في غلي الماء لحليب ابني امريحني جدا تاني حاجة ماكينة البيتزا اطيب حتي الخبزة وماكينة الدونات واكثر حاجة ندمت عليها هيا قلاية البطاطا
-
السلام عليكم ورحمة الله وبركاته
موضوع حلو وشيق بارك الله في اللي فكرت فيه ونزلاته
من افضل الاجهزة الكهربائية عندي واللي ماندمتش عليه ومش حانندم واللي يناري عليه ملوح في الجنان في الريح والمطر الله غالب ماعندي وين انحطه هو الغاز الكهربائي كوشته مش عادية ونوعه امريكي كوشته واسعة ادخل طاجين الكوشة الخارجية ولقيته الغاز زي الرحمة في ازمة الغاز ولما يكمل الغاز نرجعله وطبعا عندي غاز عادي حتى هو كوشته كبيرة واهم شي عندي باش لما اندير الحلويات اندير في مرة
وثاني شي هى ست البيت اكبيدتها فدت مني
واكيد غسالة الملابس الاوتوماتيك lg
وغسالة الصحون حتى هيا مفيدة وخاصة تو منتشرة الامراض الجلدية عفاكم الله ومن اسبابها طبعا كثرة استعمال المواد الكيميائية في مواد التنضيف
واكيد الكمبيوتر واللي ما نستغنوش عليه ويوم يمشي للتصليح اللي في الحوش كلهم يهبلو وينقو على بوهم لين ايجيبه
مفرمة اللحم الكهربائية وهيا شاريتها بالدرجة الاولى مش للحم ولكن للهريسة اللي نديرها وتقعد من العام للعام
لان الاولاد يحبوهة هلبةوطبعا نستعملها في سبك الكعك
وايظا من الاشياء المهمة المضرب الكهربائى طبعا نستعمله في خلط النسكافيه مش عادي ايديرها زي الكريمة جربوها وما تندموش
والسشوار خديت الماركة ب75
وماستفتش منه من ثاني استعمال طاح من بنتي وفسد وخديت غيره ماركة الهومر ليه عامين وما شاء الله عليه
واكيد المكنسة الكربائية lg الللي زي الرحمة ما نعيشش من غيرها {طبعا تخصص بنتي}
والفريز من اهم الاشياء عندي وطبعا الحجم الكبير لكل شئ
والة التوست وخاصة في الصيف ايحبوها الاولاد عشي ويديروه بر وحهم مع العصير المسقع
ومن الات المطبخ عندي الة الجيلاتي وهيا الة قديمة هلبة كانت مركونة في حوش بوي واخديتها منهم
ونقوللكم يابنات حاجة اني من النوع اللي مانتسرعش في شري الحاجة الا لما نكون متا كدة من اهمية شرائها
لاني بنضايق علي روحي وما نلقاش وين انحطها وهذه هي المشكلة
ومن الالات المركونة خلاط العصائر الطبيعية لان الالياف الطبيعيةتتصفي في جهة و كلها تتلوح بدون فايدة فنفضل ان الفاكهة للفائدة ياكلوها طبيعية
والحمد لله علي كل ماوهبنا والله يديم النعمة والحمد لله
وان شاء الله تعم الفائدة