-
كيف نتعامل مع بنتي
السلام عليكم يااخواتي العزيزات والله قداش فرحت اليوم لماالقيت هدا الركن
الجديد فررحت بيه الحق ربي يفرحكم بي وجه محمد عليه الصلاة والسلام
المهم اوخياتي نبي منكم من صاحبات الخبرة يقولوا كيف نتعامل مع بنتي
طبعا هيا توا قريب تسكر 8 شهور لكن ليها اسبوع وحشاكم هيا ترجيع
واسهال وحرارة ضعفت بنتي لين خلاص نوكل فيها ونعطي فيها في الدواء
لكن معاش ابت توقف كل مانقول احسن ترجع نفس القصة وتوا اهني عطلتهم
دكتورها معطل ورفعتها لي دكتور عام قالي نزلة معوية واوخيتكم في غربة وبروحي
ومش عارفة كيف نتصرف الحق وهدا اول بيبي ليا ومعاش عرفت كيف ندير
وفي اللي يقولي سنون ومانيش عارفة الحق وياريت اللي تعرف منكم تساعدني
وجزاكم الله الف خير
-
الف لاباس ..الف لاباس عليها
النزله تاخذ وقتها انا عندى توام مره جتهم النزله نين رقدت بيهم فى العنايه(حشا بنيتك)
بس اهم حاجه عطيها المحلول الملحى عشان مايجيهش جفاف لاقدر الله
والحاجه الثانيه انك لما تعطيها الرضعه وترجعها عطيها مره ثانيه وان شاء اله مش حترجع يعنى بعد الرضعه اللى رجعتها على طول عطيها رضعه ثانيه
وماتكثريلهش من الحليب لانه يزيد من الاسهال ركزى لها على مية الرز
واذا تقبلت مية الحمص المطبوخ عطيه لها يشد البطن على طول
والترجيع حيوقف ان شاء الله بس الاسهال ياخد وقته وينتهى وان شاء الله ماتشوف شر
-
لاباس على بنوتك السحمة ربي يشفيها ويعافيها
زي ما قالت الغالية نسمة ركزي على السوائل بش ما يجهاش جفاف
وكان ما برتش خلال عشرة ايام من مرضتها امشي بيها الى الطواري طووووووووول
بعيد السؤ عليها
-
بعيد السو عليها بنوتك ياغالية زي ماقالولك الاخوات وعموما هذا وقت نتوقع انها تبدا اطلع سنيناتها وان شاء الله ربي يشفيها ويصبرك حتى انتي
-
-
السلام عليكم ورحمة الله وبركاته
سلامتها ألف سلامه بنيتك والله حتى أنا بنتي نفس الشي لكن بنتي ماترضعش بكل شبه صايمه وتوا عمرها خمسة شهور ماكسيموم أربعة أرقام في اليوم كله ومابتش تاكل شي لكن هي من الأول هكي قاة رضاعه وترجيع واسهال لدرجة إنها تبان كيف مجيوبه
عموما أسأل الله العظيم رب العرش العظيم أن يشفيها
آآآآآآآآآآآمييييييييييييين
-
لاباس على العروس بنوتة بوها
تعرفي الايام اللي فاتو ايوبي صارله هكي
حرارته قريب 40 واسهال يطلع لبرة الدايبر وترجيع وكحة معاهم
وفي نهاية الاسبوع طلعوله سنينتين
ماتخافيش هدوم سنينات
بس الاسهال زي ماقالولك البنات عطيها مية رز او رز مطحون متاع الاطفال
بالنسبة للحيب قللي منه او استخدمي النوع اللي يمشي مع الاسهال
اظن في امريكا قاعد لانه ةهنا في ليبيا تلقيه
والحرارة والله مافي افضل من التحاميل (( الزربوط بالمصراتي ))
بس عطيه ليها لما تفوت الحرارة 38 ونص
وعطيها كالبول خافض الحرارة بانتظام كل 6 ساعات لمدة يومين
والترجيع ما تعط=يهاش حليب واجد مرة وحدة
عطيها على دفعات بالتدريج
واهرسيلها البطاطا المطبوخة مع الجزر عشان مايصيرلهاش جفاف
بغيد السو عليها حبوبة
-
ألف ألف لبااااااااااااااس على كنتى ههههههههههههههه
ردى بالك من البنت لايجيك عمر يوريك هههههه
ماتخافيش ممكن سنون لأنهم يتعبو هلبه راه
وزي ماقالولك ديما اعطيها سوائل
وان شاءالله ألف سلامه عليها قالك عمر
-
لاباس عالسموحة
وان شاء الله بخير
وانى نقول سنينات باش تعضك بيهم هههههه
بس رفعتيها للمستشفى؟؟
وطمنينا عليها
-
شكرا ليكم حبيباتي وحسستوني اني مش بروحي والدنيا مزاااااال فيها الخير
بارك الله فيكم نسمة مغتربة ام طه ام عموري خدوج سجودة مسك شكرا شكرا بجديات
طمنتوني وفرحتوني بردودكم بارك الله فيكم وجعلها الله في ميزان حسناتكم
وهيا اليوم احسن بطلت الترجيع وعقبال ماترجع وزنها منورررررررررررررررات هلبة مش شوية