ساعدونى بتغير فى مطبخى

[أمــل]

السلام عليكم
وماشاءالله عليكم يعجبني تبادل الآراء وحب التعلم
وماشـــــــاء الله علي مطبخك ياليبيا
والله أكثر شي يعجبني في المطابخ الإضاءه والرواشن

أول شي أوخيتي ليبيا إن شاءالله اتنوضي بالسلامة وما تكوني الا راضيه عن مطبخك
وثاني شي اللي لفت نظري في مطبخك هو الغاز من غير رجلين
حسيت ظهري وجعني وقلت كيف ياليبيا هكي ؟
معقوله اتطيبي بالشكل هدا؟
بعدين لاحظت غطاء الفرن !! والمساحة ضيقة ما تسمح
باهي ليش ما اتنحي غطاء الفرن وتجربي ، لو منظره ما تأترش نحيه وركبي رجلين الغاز اريح لك
وتوا تشوفي شكله كيف يحلو لما يتساوا مع الدولاب اللي في جنبه

بعدين الستار ضروووري جداً للمطبخ
لو اديري ستار عالبني ومفارش صغيرات للطاوله وبساط عالبني
وطلعي كل الأزرق من مطبخك حتى البريموس هههههههه
ايولي ايهبببببببببببببل تبارك الرحمن
سامحيني اوخيتي ليبيه ، كترت عليك
وحتى اني ما نفهم هلبه في الديكورات وتوا انحطلكم مطبخي وتشيروا عليا
وماتنسي اتورينا شن صـــار ؟ وشن غيرتي
وإن شاءالله على خير وربي يهنيك ويسهل عليك

[الجبليه]

ما شاء الله مطبخك جميل والبنات ماقصروا
أهم شيء الالوان تكون هاديه ورسمة الفرش تكون بسيطه والحلو لو ادخلى لونين فى بعض
وكذلك الستاره تعطي منضر حلو ومتكثريش من نفس المفارش فى المطبخ
شوفى الاخت سنابل حاطه ستائر حلوة
http://www.libyan-kitchen.com/kitche...read.php?t=915

وجميل لو درتى تغليفه لشيشة الماء او مفرش حلو ينزل عليها
خلى الون برتقالي هادى حتى يعطى انارة للمكان
وصوريلنا مطبخك بعد ما تجهزيه فى انتظارك
وزى ما اقترحت ام الجميلات ارفعى الغار حتى بطوله خشي وغطي الطرق بنفس القماش يلى بتستخدميه فى المطبخ
على فكرة ابعدى على القماش يلى ايكون كله فواكه اختاري نقشه بسيطه وهاديه

[ليبيا قلبى]

بارك الله فيكم على الرد
والنصيحه
انشاء الله اغير منه واحط الصور

[guidona]

حبيبتي ليبيا اني من راي الاخوات الي فات منظر الغاز لو يكون منعلي احلي وحتشوفي والازرق الغيه نهاتيا من مطبخك وكدلك المفرش لو نتحيه احلي اونزك والستار اختاري لونه ايكون امناسب علي لون الفرشه وبالهني والصحيحه وربي اكملك ولادتك علي خير

[ام سريوات]

مشاء الله ياليبيا
مطبخك حلو وانشاء الله تقومى بالسلامة
وتحوسى فيه

[ابريكه]

ماشاء الله مطبخك روعة تبارك الرحمن ان شاء الله اديري فية غير المناسبات السعيدة يا ليبو
واني ملاحظاتي قريبة من ملاحظات البنات خاصة فرش المطبخ بعد فترة غيرية للون يكون قريب من لون الدولاب
والبريمس غلفية وحطي تحت منة حاجة حتى ما يصديلك السراميكا
ومطبخك ماشاء الله لون وتفصيلة روعة
وكل مرة ديري حويجة وكلنا يا ليبو نتعلمو من بعض وكل يوم نستفيدو حاجة
والحلو في موضوعك انك خليتينا نستفيدو وناخذو افكار جديدة من البنات
بارك الله فيك يا احلى ليبو

[طمطم]

ليبيا ما شاء الله ولا قوة إلا بالله مطبخك غاية في الروعة وأحلى مافيه انه مربع تربيع مريح

آراء البنات كلها حلوة واني معاهم
بس أهم شي نقصي من المفارش اللي في النيش واللتلاجة والغاز والطاولات
ممكن تحطي تاكم تاني يكون أقل في عدد القطع والطاولة من غير مفرش أو بمفرش صغنون تحت الفازة بس يكون حلو

أما الألوان: نتوقع اللون البرتقالي يطلع حلو هلبة مع لون مطبخك والخوخي حتى هو مش عادي.... بس يكون على هادي

شوفي التاكم هذا لو عندك حد شاطر في الخياطة ممكن تجيبي قماش مناسب للمطبخ وتفصليه

فيه الستار والمريقة ( كخخخخخخ مانعرفش اسمها) وقوانتي الفرن حلوين وألوانهم هادية
وفرشة الأرض عندي تكون عالبيج أفضل

ولو اضيفيله مزروعات صناعية او طبيعية تعطيه منظر غير....

وماتنسيش توريهولنا بعد التغييرات

وربي يهنيك بمطبخك وينوضك بالسلامة ويرزقك طفل يكون قرة عين آمين يارب

[طمطم]

شن رأيكم بنات كل وحدة تحطلنا مطبخها وتورينا كيف منسقاته باش الكل يستفيد؟؟؟

أني مطبخي قاعد فاضي مادرنالاش الدولاب سكنت فيه شوية حوشي وسافرت ومابيتش ندير فيه أي شي قلت لما نمكل ونروحو نشوفو لأني نحتاج وقت باش نقرر الألوان اللي نبيها وقاعدة لحد توا حايرة تو نحطلكم صورة لو لقيتها وانتم اعطوني أفكار

[Om Saga]

ليبيا قلبي مطبخك حلو
وقرأت الردود ولقت كلام ليبيه ممتاز
خلي فيه تناسق في الألوان
وحاجه تانيه ماتخليش المطبخ معبي هلبه أني من طبعي زي أم ساره حاجه مرات ساده
والمفرش إلي على الطاوله وكان تغيريه أفضل وتخليه مفرش مشبك أو قصير مش طويل
لكي تحسي إن فيه وسع وأعملي بنصيحيتي وحتشوفي
والباين إن في جيهة الثلاجه معبيه ماتخليش إلا الضروري والباقي حطيه في الدولاب
الستار مادريش ستار يكون القماش شتوي لا خليه شيفون لأن لاحظت إن إضاءة المطبخ
مش قويه وكان بديريه شتوى بيزيد بيظلم المطبخ فنصيحه أعمليه شيفون
والحاجات إلي على الغاز قصدي على زر إلي نولعو منه حوليهم ولا نجيك هههه
والمفارش إلي في الولاب غيريهم إلي نفس نوعية إلي على الطاوله
غيريهم وخلي لونهم متناسق مع فرش المطبخ
وكان فيه معلومه تانيه توهنجيك نجري
بس الصراحه والشهاده لله عجبني المطبخ والباين إنو مخدوم خدمه نظيفه
الله يباركلك فيه ويحفظكم يااااااارب

[حساسة والدمعة الماسة]

الصراحة مطبخك حلو وعجبني ... لاكن عندك الاضاءة مش بكل ... ديري استار خفيف ... والمطبخ فيه ضيق شوي ... وغير فرشة الارضية مش راكبة عالمطبخ
مطبخك حلو... ربي يقومك بالسلامة يارب