(أفكار) لأستعمال السلال في المطبخ

**ليبية** · 01-05-2011, 10:35 AM

السلام عليكم ورحمة الله وبركاته:

حبيباتي اليوم اليكم فكرة جديدة هي بسيطة بس انا عن نفسي عجبتني

[OVERLINE]
الفكرة هي استعمال السلال في المطبخ
[/OVERLINE]

المعلومة اللي نبي نقولهالكم انه احنا في نعمة ولله الحمد السلال عندنا رخيصة جدا واستعمالاتها هلبة صح هي مش ضرورية لكن لما تتواجد تدير حل وشكل

هيا نشوفوا

اول شيئ نقدر نستعمل السلال حتى نحط فيهم الفواكه فيبدأ شكلها حلو ومنظم

تاني فكرة وماعمرها خطرت على بالي الا اني لقيتها حلوة وهي وضع الواح التقطيع في السلة

ثالث فكرة نقدر نستعملها كديكور وكتنظيم

وهذي ايضا كديكور للمطبخ وحفظ الأشياء

او استعمالها لوضع الفوط والمناشف بشكل حلو

لحفظ البيض

او لحفظ منضفات المطبخ وانا وحدة من الناس نستعمل في هذي الطريقة بدال مانقعد ماشية جاية على الدولاب اللي حاطة فيه مواد التنظيف حاطتهم في سلة مع بعضهم وين مانمشي بنظف هما معاي

او ابسط الأشياء واحي الليبين اغلبنا يستعمل فيها

وفيه فكرة اضافية بس مالهاش علاقة بالمطبخ وهي
توضع سلال بكل غرفة لوضع الملابس المتسخة وبهذا تكوني وفرتي على نفسك تفتيش الملابس المتسخة

او وضعها كسلة بكل غرفة للقمامة كلأوراق والكلينكس وغيررها

يارب يكون الموضوع خفيف وعجبكم ونكون افدتكم بحاجة جديدة او حتى غيرتلكم جوكم بالموضوع

الموضوع مجهود شخصي ياريت يعجبكم
حصريا لموقع المطبخ الليبي

**نوارة ليبيا** · 01-05-2011, 12:42 PM

يعطيك العافية حبوووبة ^_^

نفس مطبخنا

مستغلين السلال بطريقة حلووة

راح نصور لكم الطرق قريبا ونحطها في موضوع ^_^

**أمـ ساره** · 01-05-2011, 01:43 PM

ماشاء الله ليبية أفكار حلوة والله

وبعض منها نستخدم فيه حتى اني في بيتي لأنه مريحني هلبة

سلمتي على الموضوع المميز

وبارك الله فيك وفي وقتك وجهدك

**خدوج** · 01-05-2011, 01:51 PM

السلال حلوة ودير راى
انى حتى فى دار التقعميز مدايرة وحدة قنينة
ونحط فيها النقالات والشحن والريموتات
لان الحاجات هذى ديما تحوس
والنقالات خاصة انى كل مرة نحطه فى مكان
وبعدين نقعد ندور فى اولادى يديرولى رنه باش نلقاه
فدرت سليلة وفرت عليا هلبه
وشكر ليبية عالموضوع
مشكووووووووووووووورة

**الجبليه** · 01-05-2011, 02:26 PM

تسلمى على الأفكار تعجبنى السلات ونحب استخدامها خاصة التى بالصورة شكلها رائع

**التا ئبه لله** · 01-05-2011, 02:48 PM

مشكوره يا عسل
موضوع حلو على الاخر فى بعض منها

نفس الاستخدام والباقى جديد عليا الله يحفطك

**فضااوي** · 01-05-2011, 07:30 PM

موضوع رااائع

في بعض الافكار نسخدمو فيهن بس عجبتني اللي جو الدولاب

يسلموووو يالغلا

**ليبية** · 01-05-2011, 08:08 PM

الله يسلمكم يا غاليات وفرحتوني ونورتوني وشرفتوني في موضوعي

يلا نوراة نراجو في الصور يا حلوة

**طمطم** · 01-05-2011, 08:35 PM

ما شاء الله أفكارك ديما حلوة يا عسل

عجبتني فكرة السلال في الغرف للملابس المتسخة

واني عن نفسي مدايرة في كل غرفة سلة للقمامة

وفي المطبخ والمخزن بصراحة إبداااااااااااااااااااااع

تسلمي يارب