[حساء درناوي عالكيف] من مطبخ للاهم

[للاهم]

خير يا بنات
امس كان صقع وضباب
وكروس في الحوش
وشنو احلى من أحسّيَ يقعد الجوف ويدفي هذا غير طعمته اللي ما يعلى عليها!
طبعا كالعادة جت السخفة في اخر لحظة وقريب مرواحته
وغداي عالنار مكرونة سباقيتي مع صلصة
وما عنديش عليها
وفي شوية شربة فاضلة من اليوم اللي قبلها
هذين حاجتين مستعد ياكلهن صاحب بيتي كل يوم
اطمنت عليه
جاء وقت ندلع روحي بحاجة نحبها وعلى مزاجي
بسرعة مش عادية قعدت نطير ف المطبخ بين التلاجة والدولاب والحوض والفرن
هذي طنجرة
وهذا شوية دهان قديد فيه فتاريش قديد ينشافن بالتلسكوب
وخوذ يا ست البيت لولاها
كمشة حبق اخضر
كمشة كسبر
كمشة نعناع اخضر
كله نتش باليد
كم فص ثوم
حبتين طماطم خضر
قررررن فلفل اخضر حاااااار كامل
رغم المنع
وتوصيات الطبيبة
فوتن
وشوية بزار
وكاشيك طماطم معجون
وشوية فلفل شطة يابسة مجروشة معرفتش الكلمة ينباع جاهز وفيه حتى زريعته
المهم كله غغغغغغغغغغغ في ست البيت
وبعدين دلق في الطنجرة عالدهان اللي يدوب سخن
وغم المغطةعليه شوية نين يقلي ويذبل
بعدين تبليل بالمية الساخنة
مش واجد بيش ما يخفش
ويضيع الحباش(حبق كسبر نعناع) وما يبانش
نخلوه الطبيخة على النار لين تستوي ويطيب الطماطم معجون كويس
نست نزيدوا كم قرن فلفل احمر واخضر
طبعا كان فيها قديد تاخذ وقت اكثر
توا جينا نبوا نحطوا الدقيق ( الخثور)
شوفن طريقتي تعلمتها من بويا حبيبي ربي يشفيه ويطول في عمره
مرة شافنا ونحنا نخلطوا ف الدقيق ونصفوا فيه
ونصبوا في مرقة الحساء بحذر
خايفين يكلكع
قال كنكن معقدات الامور
هاتن فازو (برطمان) فاضي
حطن الدقيق
حطن المية
سكرن المغطة
خضن رجن امخضن
صبن حركن
ههههههه
وياعيني يا ابو الافكار
من يومها عشقت الوطن
أأأأأ قصدي من يومها ندير فيها
رحت؟
انا وين وصلت؟
اه في اللحظة هذي - والله يمسيك بالخير يا خالتي شريفة نتبع في وصاك من يومها
"الليمون قبل الخثور"
نعصره في المرقة
ونصب الخثور ونحرك ونخليه علي نار هادية يتكتك
مع التحريك البسيط مرة مرة بيش ما يرسيش الدقيق في ذيلها
بعدين نقمر خبزة
وحتى بشماط ياعيني
نصب الحساء ف القصعة

او فلوكة تكون غارقة
مش فلوكة بحر حي عليكن!
ومنها نغرف ف الصونية التبسي الصحن اختارن

ونبدوا ناكلوا بسم الله
احلى ما في الموضوع الشوية اللي تفضل في الصونية في الاخير وما يلمهش الكاشيك
نفتتوا عليها خبزة او شوية بشماط
وكان مازلنا ماشبعنش نزيدوا عليها شوية حساء اخرى

احم!

وصحة مية صحة
اتبقن علي خير

[المغتربه]

هههههههههههه ماشاء الله عليك اسلوب وطرح روووعه وحساء اروع وبالذات الدرناوى بالحبق ومن ايدين وحده دمها خفيف زيك ربي يحفظك

[للاهم]

تسلمي مغتربة
في منه شوية ف التلاجة تجي نسخنوه ونكسدوا عليه
لما يبات يبقى احلى

[أمـ ساره]

ههههههههههههههههههههه

يعطيك الهني وخيتي للاهم

كلامك زي العسل زيك بالضبط

صحيحتين على قلبك

وسلمت ايدياتك حبيبة

[نسمه ليبيه]

تسلم ايدياتك حتى انا درته بالقديد اللى معطيته ليا امى طبعا امى تشتغل بضمير القديد يرى بالعين المجرده ومن غير تلسكوب هههههههههههه اسلوبك العفوى عطى الموضوع والحساء نكهه سمحه

[ابريكه]

سلمها وسلم حساءها
وسلم اسلوبها
حساء جوووووووووووووووعني خلاص
نزرط في ريقي منة
لون ومكونات والتصوير خلية بروحة
ماشاء الله عليك للاهم
سؤالي شنو نوع كميرتك ؟

[نوارة ليبيا]

ماشاء الله تبارك الرحمن عليك ياللاهم

هههه فلووكه ابعتينا ^_^

ايهبل وروعه ويستحق التقييم والتمييز

وحيكون قيد التجربة

تسلم الأيادي وبانتظار الجديد

[فضااوي]

ماشاء الله حساء يجي في الخاطر

سلم الدرناوية وسلم ايدياتهااا

[زينب محمد]

حساء يجي في الخاطر

وكلامك عنه ووصفك له يسهف اكثر واكثر

الله يسلم ايدك وعينيك وست البيت غاليتي

هههههههههههههههه

صحتين وهناء على قليبك

[kittygago]

ما شاء الله لا قوة الا بالله

يسلم هالإيديات يا حبوبة