الملوخية
أهلاً وسهلاً اخواتي
اليوم حبيت نجيبلكم طريقة الملوخية المرحية لاني نحبها هلبا
طبعا أني علمتهالي إميمة الله يرحمها
وأمس درتها غداي وحاولت نجيبلكم صور ولكن للأسف
الصور طلعت مش واضحة هى يالله خليكم مع المقادير والطريقة
" المقادير "
كيلو لحم بقرأو لحم قعود ( اني نفضلها بلحم القعود أبن )
4 ملاعق كبيرة ملوخية مرحية
6 فصوص مفروم ناعم
بصلة صغيرة مفرومة
كزبرو كروية
هريسة
شوية ملح
ملعقةمعجون طماطم
ماء ساخن
كوب زيت
2 ورق الرند
الطريقة :
تخلطي المقادير مع بعض ماعدا الزيت والملوخية والماء الساخن وتبلي بيهم اللحم وبعدين حطيهم في كيس وخليه الكيس في الثلاجة لمدة ساعتين باش اللحم يتبل كويس
وبعدها سخني الزيت كويس هلبا و ضيفي الملوخية مع و رقتين الرندوالبصلة المفرومة خلي تتقلى على نار هادئة مدة 5 دقايق
وثم ضيفي الماء الساخن وردو بالكم من البخار و خليها تغلي مدة نصف ساعة و بعدين نضيف كيساللحم مع التوابل
و خليها على نار هادئة جدا مدة من 3 الى 4ساعات لين تنشف شوية واطلع زيتها يعني زي الصالصة و كل ما كانت النار هادئة و المدة طويلة كل ماكانت بنتها أحلى
(( للعلم انها تستهلك في غاز هلبا ))
وهذا شكلها النهائي
تاكلوها بالهني والرضي ا ن شا الله
اللي يعرفها تو يقوللكم علي بنتها واللي مايعرفهاش ننصحه يجربها
المفضلات