[ بوريك سبانخ ] من مطبخ للاهم

[للاهم]

[justify] [/justify][justify][/justify]
[justify]

خير يا بنات

حال الصقع والجمود

نحنا نحبوا السباناكا ( السبانخ )

وانا نحب الحاجات اللي ينحطن قريبات من مدت اليد

بيش لما الواحد يجوع بعد الغداء او العشاء يلقط منهن

ومنهن البوريك او الفطيرة

اللي جايبته لكن توا مش عارفة نسميه

نشوف فيكن تقولن خبيزة محشية

بس انا نقول بوريك

بوريك سبانكا

وما عنديش عجينة معينة

مرة باللي فاضل من عجينة البيتسا

مرات عجينة الخبزة

ومرات اخرى عجينة السفيحة
ومرات من الكساد وحالات البيارة المؤقتة
عجينة بيتسا جاهزززززة



بس المرة هذي عجينتي كانت:


3 كوب دقيق

نص ملعقة قهوة خميرة خبزة

كوب وربع زبادي

Sour creamوماكانش عندي درته بـ

مش عارفة ايش يقابلها عندنا ما اظنش

هي لبنة !

2 ملعقة طعام زيت

نص ملعقة قهوة ملح

نص ملعقة قهوة سكر

ربع كوب ماء دافي

المهم عجنت العجينة وخليتها تخمر يجي ساعة زمان

وبعدين قرصتها قريصة وريحتهن

وكنت في الاثناء بديت نضفت السباناكا كويس - افطنن - اكثر من غسلة واللا تجي تقزقز من الرملة

المهم وقرضتها خشن

وحطيت ذبلتها في طنجرة من غير امية

اميتها منها فيها

طلعتها وحطيت صفيتها ف صفاي مع الضغط عليها بيدي زين

قرضت راس بصل وشوحته في الزيت مع فلفل احمر مطحون

وزدت الثوم

حطيت السباناكا

وزدت عليها شبت مقرش خشن

ومعدنوس

وتبلت الخليط بملح ونعناع يابس – وكان تبّن فلفل اكحل – انا ممنوع عندي

ولما نشفت

عصرت عليها نص ليمونة

ومفروض هنا نحطوا الجبنة البيضا المالحة

بس برضو ماكانش عندي

اكتفيت بقطعة موزاريلا عند لف البوريكة

او الفطيرة

جينا للعجينة

خذيت القرص وسهلته بيدي

ومديته بالضرابة مستطيل

ودرت فيه خطوط عمودية


وحطيت بعض من السباناكا

وفوقها قطعة موزاريللا

ولفيت

وواسيتها على شكل بيضاوي

وانتن وتفننكن

انا ديما نشكل

حسب المزاج

ودرت معاه سلاطة تن

ومكرونة جارية

اليوم مزاجي معكر عشان هكي قلمي دمه تقيل سامحني

بس البوريك جا يجنن

تبقن علي خير

[/justify]

[أم أيوب]

يسلمن ايديك للاهم منظرهم يجنن

بس سؤالي انتي كاتبة في المكونات نص كوب خميرة خبزة

انتي قصدك نص كوب ماء وفيه خميرة أم نص كوب خميرة بروحها؟؟؟؟

[الجبليه]

مشاء الله شكلها جميل

[نوارة ليبيا]

ماشاء الله يالغالية تبارك الرحمن رووعه ^_^
من ايد مانعدمها

[المغتربه]

سلم ايدياتك وربي مايحرمك من طويرك

[بنية بوها]

الله عليك وتسلم ايدياتك وانشالله ماعاد يتعكرلك جو

[للاهم]

مش قلتلكم الحالة غيوم عندي؟
هابا
هو نص ملعقة صغيرة خميرة خبزة يا زهورة الامورة
انا ماحوتك نزلت هالموضوع عك معايا واجد
شوره انا اللي مزاجي مش ولابد ما با يسلك معايا
سامحيني
عدلت الخطا
وشكرا لانتباهك

[للاهم]

وانتِ اجمل يالجبلية

[للاهم]

يحلي ايامك نوارتنا
طيب المرور خيتي

[للاهم]

هههه والله يالمغتربة ما تطلع مني الحاجة سمحة لو طويري مش حذاي يونسني
مرات نقعد نحكيله بيش ما ننهبلش من الملل
سلم هالمنتدي ملالي الفراغ
وخلاني يا اما لاصقة في المطبخ يا طايرة عالسوق نجيب مكونات اكلة
بس نطيب مقدار صغير
خوذي عندك المقدار هذا درت نصه