[ طبيخة فول وخرشوف - بديل عن القعمول - بالشبت] من مطبخ للاهم

**للاهم** · 01-16-2011, 06:23 AM

خير يا بنات
كنت وعدتكن بطبيخة الفول والقعمول
اليوم درتها
بس من غير لحم
بالزيت يعني
قرديحي
بس لذيذة
وخفيفة
وصحية
استعضت عن القعمول الاندر من لبن العصفورفي هذه البلاد
وشريت 3 خرشوفات – ارضي شوك

مكونات الطبيخة المرحلة الاولى

راس متوسط بصل مقرض ناعم
خمس فصوص ثوم مقرضات شرائح
زيت زيتون
فلفل احمر مطحون
قرن فلفل اخضر
حبة طماطم كبيرة مبشورة او معصورة
علبة طماطم صلصة متوسطة
( استعملن بدالها طماطم الحكة – انا لا استعمله)
ملح
حرارات
بزار
شوية كسبر مطحون
نحطوا البصل والثوم والزيت في طنجرة عالنار مع الفلفل الاحمر وقرن الفلفل الاخضر الحار
نقلوها شوية
نضيفوا طماطم الصلصة وطماطم الحب
ونتبلوها بالحرارات والبزار والملح
ونخلوها نقلي علي نار هائة نين يطلع زيتها
نبللوها بماء او مرق

المرحلة التانية

نقشروا الخرشوف
وناخذوا قلبه وحتى العيدان بعد تقشيرهن ونحطوهن في امية فيها عصير ليمون وملح
حتى لا ينسود الخرشوف لوجود الحديد به
نقرض شوية شبت
ونجهز الفول الاخضر
انا ماكانش عندي طازج
استعملت فول اخضر معلب
نضعوا الجميع في الطبيخة
بعد غسل وتصفية القعمول
ونتركوها تستوي وتعقد
علي نار هادية
ولما يستوي الفول والخرشوف
وعادة ما ياخذوش وقت في الطياب
ننزلوها ونقدموها ساخنة سواء للتغميس
او مع رز ابيض
كولوا وادعولي راهو مفيش الذ منها
ملاحظة في حالة استعمال اللحم حالها حال اي طبيخة خضرة
نفس الخطوات اللي اديرنهن مع طبيخ البازيليا او البطاطا وبدون ثوم كان اللحم ضان
وصحتين مقدما

**فضااوي** · 01-16-2011, 11:08 AM

ماشاء الله عليك

طبيخة صحية ولذيذة وتنفع للرجيم

مكانهاا الاكلات الصحية

تسلم ايدياتك يالغلا

تعرفي احسن كلمة نقرا فيهااا
خير يابناات ههههههههههههههه

**الساجدة لله** · 01-16-2011, 01:22 PM

يسلمو ايديك حبيبة الطبيخة مش عادية بككككككل ماشاء الله مازال نستنو في القعمولات يالغالية

**نوارة ليبيا** · 01-16-2011, 01:33 PM

ماشاء الله تبارك الرحمن

ربي يخليك يارب

حاجاتك اتسهف ^_^

**جميلة الكون** · 01-16-2011, 01:50 PM

**العزيزة** · 01-16-2011, 02:17 PM

تسلم الأيادي يا للاهم
طبيخة صحية ميه مية

( اسمك ذكرني بمرا صاحبة ماما من انعم الناس )

**أم إيناس3** · 01-16-2011, 02:41 PM

يسلمووووووووووووووووووووووو

**للاهم** · 01-16-2011, 06:40 PM

اقتباسالمشاركة الأصلية كتبت بواسطة فضااويماشاء الله عليك

طبيخة صحية ولذيذة وتنفع للرجيم

مكانهاا الاكلات الصحية

تسلم ايدياتك يالغلا

تعرفي احسن كلمة نقرا فيهااا
خير يابناات ههههههههههههههه

خير فضاااوي هههه
شكرا خيتي
وكان تحسي انها تنفع للركن الصحي انقليها

**للاهم** · 01-16-2011, 06:44 PM

اقتباسالمشاركة الأصلية كتبت بواسطة الساجدة للهيسلمو ايديك حبيبة الطبيخة مش عادية بككككككل ماشاء الله مازال نستنو في القعمولات يالغالية

شكرا خيتي الساجدة طيب التعليق
بس قوليل من وين القعمولات يا حسرة
انا المرة اللي فاتت لما نزلت ليبيا وصيت هلي ييبسوا لي قعمولة او يدورولي وحدة شارفة متلحوية من البر عشان نجيبها معايا ونحاول نستنبتها هنا لتشابه المناخ
ومش صعبة وتصير
بس محد دسلي ولا دورلي
عموما موسم القعمول في الشرق قرب
وبنات الغرب يقدرن يوصن حد يجيبه لهن من بنغازي
يبيعوه في المحلات وعلي حواشي الطريق

**للاهم** · 01-16-2011, 06:45 PM

اقتباسالمشاركة الأصلية كتبت بواسطة نوارة ليبياماشاء الله تبارك الرحمن

ربي يخليك يارب

حاجاتك اتسهف ^_^
الله يسلمك نوارة ليبيا خيتي
ويخليك لأحبتك واهلك

الموضوع: [ طبيخة فول وخرشوف - بديل عن القعمول - بالشبت] من مطبخ للاهم

أدوات الموضوع

عرض

[ طبيخة فول وخرشوف - بديل عن القعمول - بالشبت] من مطبخ للاهم

معلومات الموضوع

الأعضاء الذين يشاهدون هذا الموضوع

المفضلات

المفضلات

ضوابط المشاركة