تنبيه إداري

[guidona]

السلام عليكم جميعا
طبعا اختلاف الراي لايفسد في الود قضيه
بالنسبه ليا بصراحه جدا انا انعز زوبا هلبه وهيا عارفه انيه مش مجامله ولا اا من الناس الي انحب انجامل
هيا ماشاء الله عليها وبشهادة هلبه ناس نعرفهم استفادو منها ومن اكلاتها ولا عمرها بخلت علي حد منا في الاجابه علي اي سؤال او حيره في اكله حتي وان كانت هده الاكله قديمه
مش الكل تعلم من اول مره ولا جينا من بطون امهاتنا متعلمات ولا كل واحد اتفنن في حاجه الا بعد محاولات
لكن انا شفتها ابله وظابطه شغلها من قبل حتي مانتعرف عليها هدا رائي فيها واستفدت منها هلبه واستفاد الكل فشن المشكله لو قالت نقصوا من الدردشه والهدرزه وخودوا الامور بجديه انا اعتبرته لوم منها لاخواتها بامكانها متفتحش هدا الركن من اساسه معظم او الاكتريه سجل هنا في المنتدي من شأن زوبا هدا دليل علي حبها وحبكم لبعض لكن تواالردود اصبحت في النازل والمنتدي اصبح في النزول وهدا ميرضاه حد وهيا فتحت هدا المنتدي واسمه واضح ومن فينا ميبي تشجيع للافضل كلنا نسعي للافضل ولو درنا حتي حاجه بسيطه ونشتغلوا لو شي بسيط حتي في بيتنا نبو التشجيع ولو مفيش تشجيع يصيرلنا احباط اعتقد كلام زوبا عادي ومفيشي زعل هيا انسانه جديه فشن المشكله لو احترمنا هدا الشي كل واحد عنده هدف في الحياه وربي اوفق الجميع

[بنية بوها]

السلام عليكم
مااعتقدش انا زوبة قالت حاجة غلط هيا مسئولة ومن حقها وفي نفس الوقت لاحظت التقصير وانا عن نفسي مع ملاحظة بعض العضوات
معايا ان المنتدى هفت وصارت الردود اكتر في الفرفشة والدردشة ونرى انا كلامها مافيشي اي نوع من السلطة بل بالعكس
ومتلا يااختي انتي مش مسئولة عن صغارك فلما تشوفي صغارك يلعبوا اكتر من هما شاديين قرايتهم شن بتديري ترا؟
حتقوليلهم اقروا والا معاش في لعب .

فهمتي شن قصد زوبة وليها الحق هيا تاعبة فيه وتبي تعمره وصح كلامك خطوة خطوة مش في مرة
بس هيا لاحظت التقصير وكان كلامها جدا عادي مافيشي زعل زي اي مسئول عن بناية شئ معين ومكانش بالقوة
وادا كان اي شخص ماعنداش وقت مايخشش لان زوبة ماقالت سيبوا اعمالكم وقرايتكم وازواجكم وتعالوا قعمزوا عمروا المنتدى
بالعكس واني مانعرفها شخصيا بس انحسها انسانة راقية جدا ومعاك يازوبة ان شاء الله ورغم اني مانزلش في اي شي بس ان شاء الله
حنشارك بالتطبيقات ومنورة واااااااااااجد

[عربية ليبية]

اختى زينب السلام عليكم ورحمة الله وبركاته عن نفسى اسفة جدا اعترف بان انتاجى عقيم وكل المشكلة التصوير وترتيب المواضيع وغيرها لوتحبوا نقدر نشارك بمواضيع منى مكتوبة فقط من دون اي صورة وحطيت مشاركة بس معضم الاخوات شكرونى وطلبوا منى صوربس مشكلتى حاليا المشاركة بمواضيع مصورة بعيدة جداوانا خجلانة منكم ومن نفسى وفكرت اكتر من مرة ماندخلش المنتدي واسفة على الاطالة

[ابي الغالي]

السلام عليكم ورحمة الله وبركاته
اختي زينب انحب انقولك ان انا معاك في كل اللي قولتيه وانا اول وحدة مقصرة في المنتدى لان مشكلتي ان انا معرفتش انزل الصور من الموبايل لان معنديش خبرة في عملية التنزيل على خاطر هكي مكتفية بالردود على مشاركات اخواتي العضوات ولكن ان شاء الله حنحاول لين نشارك معاكم وربي يوفقك ان شاء الله

[الطيب قلبي]

صدقتي اوخيتي
وانا الحق مدايرها فيه الانترنت
خاطري انشارك وانزل مواضيع تفيد الجميع
بارك الله فيك يالغالية واسال ربي لكم التوفيق

[دلع]

هلا حبيبتي زينب
أنا والله ما إللي دقايق مشتركة بهاد المنتدى
وطلع هاد الموضوع هيك بوشي فقريتوا اكم من مرة بس ما فهمت منوا إشي وكمان ما بعرف شو راح ارد
تقبلي مروري وأعذريني

[الساجدة لله]

[من لايتجدد يتبدد ]

ماعندي مانقول غير هكي وبدون تعليق على الاخوات اللى رافضين النظام ونقوللهم ربي يهديكم

[الفراشة السورية]

السلام عليكم كيفكم اليوم انا عضوة جديدة وحابة اتعلم الطبخ الليبي لاني سورية بضم ايدي لايدكم ليكون المنتدى من احسن المنتديات

[ترتيل]

السلام عليكم ورحمة الله وبركاته
اهلا بيكم حبيباتي
ان شاء الله نتعاون معاكم في رقي المنتدي تقبلوني

[جوزينا]

السلام عليكم وكيف الحال إنشاء الله بألف صحة أني عضوة جديدة وأول ماشفت إبداعاتك أختي زينب ماترددتش إني نكون من عائلة المنتدي .وصدقيني المنتدي راقي بوجودك وبأكلاتك الحلوة وإنشاء الله وجودي يدير شوية فرق لأني نموت في المطبخ طبعا في وقت فراغي لأني طالبة آخر سنة بإدن الله طب بشري.