[ الدجاج المحشى فى الفرن ] من مطبخ نسمه ليبيه

[نسمه ليبيه]

السلام عليكم ورحمة الله وبركاته







اليوم درت عالعشا دجاجه محشيه بالرز والمكسرات وبنوريكم طريقتى وياريت الاخوات كل وحده تقولنا على طريقتها لان للدجاج المحشى فنون

اولا نحط الطنجره عالنار وطبعا فيها ميه ولما تفور الميه نحط الدجاجه بعد مانكونوا غسلناها كويس
ولما يتكون الريم نزيله ثم نضيف البصل المقطع والطماطم المقطع والفلف الاسود واكليل وحبهان وورق الغار وعيدان القرفه

فى الاثناء اللى تكون الدجاجه عالنار ناخد طنجرة تانيه صغيره ونحط فيها شوية زيت

وحوالى خمس ملاعق حبوب الشربه(لسان العصفور) ونحمرها فى الزيت كويس





ثم نضيف عليها كوب رز ونقلبه معاها ونضيف ملح وقرفه وفلفل اسود ثم كوب ونص

ماء ولما الرز يمص الما ننقص عليه ونخليه شوى وطبعا نسويه نص سوا

ونجيب المكسرات المتوفره عندى ونقليها فى الزيت انا حطيت فول سودانى ولوز

وبندق ثم تضيفيهم عالرز بعد ما طفيت عليه

ونطلع الدجاجه من الطنجره ونضعها فى مصفاه ونخليها فى وضع كانها

واقفه عشان تنزل الميه اللى فيها ونحشيها بالرزوالمكسرات

ونلم الفخاد مع بعضهن بالقصدير ولانى كنت مستعجله وماعندى عيدان اسنان فقفلتها بنص بصله(الحاجه ام الاختراع)

ثم ندهنا بصلصة حمره ونضعها فى الفرن ونحمرها من اسفل

واعلى

[روح مغتربه]

ما شاء الله طريقتك بسيطه وحلوه لا طريقتي تاخد وقت طويل في الكوشه
صحتين عليكم

[أم أيوب]

يسلمو نسمة منظرها حلو

[بنية بوها]

شكلها حلوة تسلم ايدياتك

[فضااوي]

تسلم الايااادي يالغلا


طريقتك ما شاء الله سهلة بس تاخذ وقت في الاعداد

طريقتي تختلف ان شاء الله قريباا انزلهاا

[kittygago]

يسلم ايدياتك يا حبوبة و يبارك فيك

ما شاء الله

[أمـ ساره]

ماشاء الله نسمة

دجاجة تجي في الخاطر والله

سلمت ايدياتك وخيتي

[السمحة]

يم يم انموت فى الدجاج فى الفرن
صحيتى وماننحرم

[المستعينة بالله]

تسلم ايدك ويعطيك العافية حبيبتي

[نوارة ليبيا]

ماشاء الله تبارك الرحمن
طريقتك حلوة وعجبتني
ان شاء الله نجرها

تسلمي يارب