[اللوسة] من مطبخ طمطم

[طمطم]

السلام عليكم

اليوم جايبتلكم طريقة اللوسة كيف مانديرو فيها في مدينتي الصغيرة الرياينة

في الأول نحب نوضح الفرق بين اللوسة والهريسة
الهريسة كل مكوناتها طازة مش مجففة من فلفل وثوم أما اللوسة فهي تتكون من الفلف المجفف والطماطم المجفف والبصل المجفف ويمكن إضافة اثوم البودرة المجفف

(طريقتي مافيهاش الطماطم المجفف لسببين أولهم ماعنديش هني في بريطانيا منه والثاني لأن أمي عودتنا اديرهالنا بطماطم الصلصة العلب وأنا أحب أن امشي على نهجها ولا أحب المساس بوصفاتها)

نبدا على بركة الله

المكونات: حوالي كوبين متوسطين طماطم صلصة
كوب فلفل احمر مجفف ومطحون خشن (زي الشطة الجافة الجاهزة)
حريقة: وهي البصل المجفف في الشمس بالملح والمقلي في زيت الزيتون ومطحون
البهارات: ملعقة صغيرة ونص كروية- ملح حسب الرغبة- كسبر مطحون ملعقة ونص صغيرة- زعتر مجفف مطحون

زيت زيتون كمية كبيرة

الطريقة:

تجهيز الفلفل:
أنا هنا خديته جاهز بس عادة في بلادنا نشرو الفلفل قرون يابسة وانضفوه كويس وننزع منه البذور على قد مانقدر ونقلي يادوب قلية خفيف في الزيت (والغرض من ذلك حتى ننزع منه أي رطوبة تكون موجودة فيه)

تجهيز الحريقة:
بعد تجفيف البصل المقط جوانح في الشمس وتقليبه لعدة أيام تحت الشمس القوية وهو مخلوط بالملح
بعدها نقليه يادوب في زيت زيتون ونرحيه كله ونخليه عندنا في أواني نضيفة محكمة ونضيفه لأكلنا الليبي الحلو المسقي والطبايخ

اللي على اليمين الفلفل المجفف الجاهز اللي على اليسار الحريقة من يدين عمتي أم زوجي الله يباركلنا فيها ويطول في عمرها

نضع كمية الزيت على النار في طنجرة ونضيف كمية الطماطم الصلصة لما يسخن الزيت ونحرك على عالي وأول ما يبدا يغل انقص عليه عالآخر ونتركه يتقلى تمام لحد ما نحس ان كل مافيس من سائل جف

نضيف الفلفل والحريقة ونحرك ونتركهم لفترة بسيطة

نضيف البهارات ونطفي عليها

بعد أن تبرد نضعها في أواني ونحطها في التلاجة

وتستعمل في الساندويشات يمي يمي

[أمـ ساره]

سلمت ايدياتك طمطم

ماشاء الله شكلها ايهبل

وبالهني والعافية

[نوارة ليبيا]

ماشاء الله تبارك الرحمن

روعه

يستحق التقييم طمطم ^_^

بأنتظار جديدك

[روح مغتربه]

يسلموا ايديك يا طمطم بس احني في الشاطي عندنا اللوسه ورق البصل الاخضر مجفف بالملح ومطحون بس بدون القلي في الزيت وبدون فلفل يعني يختلف عن اللوسه عندكم بصراحه اتسفه شكلها محرحره

[اريناس]

مشكوره

[بنية بوها]

سلمت يداكي

[فضااوي]

وااااااااو

حسيتهاا حرقتني <<<<<مبالغة ههههههههههههههه

ماشاء الله تباارك

تسلم الاياااادي يالغلا

[طمطم]

أم سارة تسلمي على مرورك... الله يهنيك ياغالية

نوارة ليبيا... تسلمي ياعسل وشكرا عالتقييم

إيه والله ياروح محرحرة... تجنن .... سبحان الله طريقتكم جديدة عليا... ديريها ووريهالنا! شن رايك؟

أريناس.... بنية بوها الشكر ليكم..... نورتم موضوعي

إيه والله تحرق يافضفض.... يسلم عمرك ياغالية

[المستعينة بالله]

ماشاء الله تسلم ايديك حبيبتي ويعطيك العافية

[للاهم]

الله يسامحك طمطومة توا انا شايطة فيا النار من اخبار العاصفة ولما نتوتر اول حاجة نفكر فيه نص تن بهريسة عربية ويا ريت خبزة شعير
توا دزيللي من لوستك توا قبل ما نطيرو وانا نوعدك نحمل لك كل الزيتون الغامي اللي ف الفازوات واللي في القراج قاعد يتملح في بريد العاصفة وانشاءالله تنطره لك غادي في بريطانيا
نسيت نقولك انه موضوع متميز وتراثي وجديد عليا من الالف للياء.
وهذي ميزة المنتدي يوقثق ويعرف بالاكلات الليبية من جميع ارجاء ليبيا للجميع
مشكورة
وربي يخليلك امك وعمتك ويسلمهن ويسلم ايديهن اللي من ذهب