[ شكل مبتكر للخبز ] تجريب فورمة عجينة من مطبخ للاهم

[للاهم]

خير يا بنات

نحب نجرب في العجينة بالك نطلع بشكل جديد

عجينتي كانت عجينة بيتسا عادية

بس بدقيق القمح

وبالتالي مش ملسا

انت جربنها بعجينة دقيق عادي حتكون احسن شكل

وقاعدة ندير في خبزة سبانخ وجبنة مالحة

خذيت طرف من العجينة واذكرت ايام القنانات وكعك العيد واحنا صغار

لما ماما تعطينا طرف عجينة نلعبوا بيه وكل واحد يدير الشكل اللي يعجبه

وبديت نقلب الطرف في يدي وفي بالي من كم يوم نجرب شكل شفته في كتاب خاص بطرق اعداد الخبز

الشكل كان رباعي التصالب وانا نبي نهرب من الفورمة هذي قلت نجرب نزيد في التصالب

بحيث يكون ثماني

ونطيبه ونشوف كيف يطلع شكل الخبزة

بديت درت كورة بحجم الخبيزة المحشية

وانا نفكر ان ممكن نديروها محشية

واللا نديروها اخرى نوع من الحلو المعسل مثلا محشي باللوز

او قولن نوع من البشكوط

كورت العجينة

وبرمت اربع اصابع زي ما نبرموا الكعك

فكرت ان ممكن نديروهن كل وحدة بلون مختلف

او كل وحدة معجونة بنوع من البذور

وبديت نثبت فيهن بعد دهن الدائرة بالحليب بيش يلصقن

ثبتتهن بأداة عصر الليمون

مديت الاطراف خارج حدود الدائرة

شقيت كل طرف بالسكين

لفيت كل جزء لفة حلزونية كل طرف الى جهة مخالفة

تقابل اللفة الاخرى وهكذا

زدت ثبتت باداة عصر الليمون

دهنت الخبزة بالحليب

ورشيت قليل من حبة البركة في منتصف الخبزة

وقاعدة نراجي نكمل خبيزتي

بيش نطيبها

ممكن كل وحدة منكن تطبق الشكل على اي نوع من الحشو سواء لنوع حلو او مالح

متأملة نشوف تطبيقاتكن وشنو دخلتن على الفكرة ابتكارات من عندكن

ورني شطارتكن

تبقن علي خير

[اريناس]

رررررررائعه طريقه

وماشاء الله عليك

[سحابه صيف]

[فضااوي]

روووووووووووووعه

بس وينهاا بعد ما طابت هههههههههههه

تسلم الايااادي يالغلا

[ام عبدالمعز]

مبدعة ماشاء الله عليك للاهم

اعجبتني جدا الطريقة

بارك الله فيك وزادك من فضله

لاحرمنا جديدك المتميز ياغالية

[الساجدة لله]

الله يسلم يديك ياغالية

[بنية بوها]

رووووووووووووووووووووووووعة ماشاء الله يللاهم وتستاهلي احلى تقييم

[طمطم]

ما شاء الله للاهم تجنن التشكيلة ماشاء الله وأحلى مافيها مش محتاجة تعقيدات الأدوات غريبة الأسماء

نروح إن شاء الله لبيتي (الجنة في ليبيا) ونوريكم

توا نشوف غير في غول مشرفي ومشرفتي... ادعيلي للاهم عندي تسليم بعد أقل من شهر

[أمـ ساره]

ماشاء الله للاهم الصور تتكلم على ابداعاتك

فكرة حلوة وشكل أحلى

سلمت ايديك وخيتي

وبالعافية عليكم

[*الليبية*]

ماشاء الله لكن وينها بعد ماطابت خاطري بنشوفها ؟؟؟؟؟؟؟؟؟؟؟؟؟؟؟