[الفطير المشلتت] من مطبخ طمطم

**طمطم** · 01-20-2011, 03:20 PM

السلام عليكم

الفطير المشلتت قد يبدو صعبا خاصة لو حاولنا نتبع نفس الطريقة المعتمدة عند الفلاحين المصريين

رووووووووووووووعة خاصة كيف يحلو في العجينة ويلفوها وكله في الهواء بين يديهم مايحتاجوش لطاولة بكل

بس أني بنديره بخبرتي اللي على قدي

يالله نبدو مع بعض

المقادير

بسيطة مافيش من أسهل منها دقيق وشوي ملح وما يعجن مية

أني درت 3 كبايات دقيق على قد عيلتي

أهم شي يكون نوع الدقيق ممتاز باش يساعدك في الحل

للدهن

سمن وزيت نباتي مذوبين على النار في طنجرة ونسبة كل واحد للتاني على حسب رغبتك:

(تقدري تحطي سمن صافي أو 1:1 أو تحطي زيت أكتر وتخلي السمن منكه فقط على حسب ذوقك ورغبتك في تقليل الدهون الضارة (بس نصيحة مني طلعي المشلتت من قائمة تقليل الدهون الضارة لأنه رهييييييييييييييييب بالسمن علاوة على أنه كل ماكان الزيت أو الزبدة أقل والسمن أكثر كل ماجاك الفطير رطب من الداخل ومقرمش من الخارج))

للحشو
عسل.... رب..... كسترد...... زبدة فول سوداني..... أو أو أو..... ويمكن من غير حشو

للوجه
سكر ومكسرات مهروشة لو حبيتي أو تخليه سادة

الطريقة

العجن عادي زي الفطيرة الليبية أو أي عجين خبز

نتركها ترتاح بعد العجن الجيد ثم نقرصها أقراص متوسطة ثم نتركها ترتاح تاني

أنا قرصتها صغيرة لأن طاولة العمل عندي مش كبيرة

ندهن الطاولة بخليط الزيت والسمن ونبدأ في حل العجين بنفس طريقة الفطيرة العادية ونحاول نشد حتى تكون أرق ما يكون

ماتخافيش لو تقطعك منك لأن ذلك مش هيأثر فيها بعدين ولا هيبان (ماهو قلنا خبرة عالقد)

ثم اطويها من الجهتين المتقابلتين كأنك تطوي الملابس وادهني زيت وسمن

بعد هالطويتين توا تقدري تحطي حشوك لو ناوية تحشيها

هذه محشية زبدة فول سوداني

الآن عندك طريقتين لإكمال الطوي:

إما تطوي بالعكس وتكوني مربع صغير وتلميه زي الصرة وهنا يمكنك اديري أكتر من فطيرة لتكوني فطيرة وحدة زي في الصورة يعني اديري وحدة وتحشيها لو تبي وتحطيها على جنب وبعدين اديري التانية وتثنيها من جهتين فقط وتحطي الأولى اللي درتيها وتكملي الطوي

أو تطوي بالطول لتخفي الحشوة وتعمليها كاسطوانة طويييييييييلة ثم تمسكي أحد الأطراف وتلفي الطرف الآخر لتكوني حلزون مثل السينابون

أنا استعمل الطريقة الأولى

بعد الطوي تقلبيها بحيث يكون الجنب المساوي لفوق والثنيات لتحت وتحطيها ترتاح لفترة بسيطة في الطاجين (حوالي 5 دقائق)

بعد أن ترتاح تفرديها شوي بيديك وترشيها بسكر وقرفة ومكسرات لو تحبي

أنا رشيتها بخليط سكر بني وقرفة ولوز شرائح

تحطيها في فرن حار حتى تستوي وطلعيها تهدا ولفيها في كيس

وكوليها بالصحة والعافية

أنا درت 2 بحشو زبدة الفول السوداني... ووحدة بالرب (عسل الشوكولاتة زي ماتقول بنتي) والباقي سادة يتاكل مع جبن كريمي أو جبن مالح (فيتا مثلا) أو عسل أو أي شي تاني

ملحوظة (في عيبين كانو في الفطير متاعي: الأول الدقيق ماكانش كويس فماساعدنيش هلبة في الفرد لتكون الطبقات أرق. والتاني ان طاولة الفرد عندي كانت صغيرة وهذا كان مزعج في العمل وقلل عدد الطبقات لأني اضطريت ندير أقراص صغيرة)

احسن شي تندار على الطاولة (السفرة) المدورة زي متاع عالة الشاهي لكن تكون كبيرة وينفع تنزل من حواشي السفرة بالعكس هيكون أسهل في الفرد بس ردي بالك تنزل هلبة منك

أتمنى وصفتي تكون عجبتكم

على فكرة شفت مرة في برنامج عباسيات ان الشيف في المطعم حشاها حشوة بيتسا من صلصة مزيتون وجبنة وغيرها وكان شكلها مشهي
بس أني ماجربتهاش هكي وناوية نجربها إن شاء الله

**مغتربة 7** · 01-20-2011, 03:30 PM

مشاء الله عليك يا طمطم شكلها مش عادى وساهلة سلم ايدياتك
جارى التقييم

**ابريكه** · 01-20-2011, 03:52 PM

روعة طمطومة روعة ماشاء الله
يسلم يدياتك تستاهل تقييم حلو

**الجبليه** · 01-20-2011, 04:17 PM

ما شاء الله تسلم يدك فكرتينى بيه

**ام عبدالمعز** · 01-20-2011, 04:19 PM

اهلا اهلا بطمطم نورتي الركن ياغالية

بماان مافيش حد خدي الفطيرة خدبتها انا

روعة ماشاء الله يسلموايديك حبوبة

والموضوع يستحق التقييم

لاحرمن جديدك المتميز

**الساجدة لله** · 01-20-2011, 07:01 PM

بسم الله ماشاء الله لاقوة الابالله
صحة وهنا على قلبك ياغالية

**المستعينة بالله** · 01-20-2011, 07:06 PM

رائعة حبيبتي واكيد الطعم اروع لانه من ايديك الحلوين ياعسل

**طمطم** · 01-20-2011, 08:07 PM

مغتربة 7 ايه فعلا هيا ساهلة جربيها...بس تأكدي تستخدمي دقيق كويس باش ماتتعصبيش زيي وصحيتي عالتقييم

بريكة انت أروع... وتسلمي عالتقييم حبيبة

تسلمي جبلية وين اني من فطير ست الحبايب...

أم عبد المعز... هيا ليك ياغالية بس الصورة بس لأني كليييييييييييتها اني وشوشو وبوها
لكن من عيوني مرة تانية ندسلك حصتك
تسلمي حبيبة عالرد والتقييم

الله يهنيك سجو.. صحيتي