السلام عليكم ورحمة الله وبركاته
كيف حال الغاليات
اليوم وعيت الصبح وأنا نخطط نبي ندير شوربة عدس
صدقوني طعمتها رهييييييييييبة ولذيييييييييذة
المهم جهزتها وجيت نجري نجري نجري نجري نبي نشارك بيها في مسابقة نوارتنا العسل
لقيت هوب باب الاشتراك تم قلت مش مشكلة خيرها في غيرها ونحطها للغاليات
المقادير :
صدر دجاجة + بصلة متوسطة + عدس أصفر تقريبا 2 كوب + ثلاث ورقات غار + 4 حبات مستكة
ملعقتين زبدة + ملح + ملعقة كركم ( بزار ) + ربع ملعقة فلفل أكحل + ربع ربطة معدنوس
الطريقة :
نقطع البصل والدجاج مكعبات
نحطهم عالطنجرة ونحط عليهم الزبدة ونقلب عالنار لغاية ما تتحمر
نضيف الماء والكركم والملح وورق الغار ونخليها لغاية ما يستوي الدجاج
بعدها نخليه على جنب يبرد
نحط العدس في طنجرة تانية ومعاه ماء ونخليه لغاية ما يستوي
ما ياخدش وقت طويل عالنار وبعد ما يطيب نحطه على جنب يبرد
نجو للبليندر ( خلاط الفاكهة ) نحط العدس مع المرق اللي فيه الدجاج والمعدنوس
وهوب خلط لغاية ما يقعد زي الحساء نرده للطنجرة من جديد ونحط الفلفل الأكحل
وحبات المستكة اللي هي أساسية عندي في كل أنواع الشوربة
غلوتين ثلاثة ونشيلها من عالنار و تمتعوا بطعمها الخيالي
ملاحظة مهمة : ممكن تستخدمي اللحم أو المفروم بدل الدجاج بنفس الطريقة
بس أنا نفضلها بالدجاج
المفضلات