[ العصيدة التونسية ] من مطبخ زهورة الأمورة

[أم أيوب]

السلام عليكم ورحمة الله وبركاته

كيف حال الحبايب

أمس كنت نحكي مع أختي في بنغازي وفي وسط الحكايات قالتلي اليوم درنا عصيدة

قلتلها ثواني ونعاود عليك واتصلت بأبو الشباب ووصيته على زبدة ورب وقررت ان فطوري حيكون

انشاء الله عصيدة وأول ما وعيت اليوم من النوم جري جري للمطبخ وجهزت العصيدة

طبعا كان عندي مشكلة مع الطريقة المعتادة للعصيدة اني نرش الدقيق عالماء وقت ما يغلي

المشكلة لها عدة وجوه مرات الماي يكون أكثر من الدقيق وتطلع العصيدة رطبة زيادة عاللزوم

ومرات الدقيق أكثر من الماء ويتكتل عندي وتجي العصيدة مش حلوة لعند ما ماما الله يحفظها

علمتني الطريقة التونسية للعصيدة والطريقة سااااااااهلة ومضمونة وانشاء الله ما تتكتل

المقادير زي ماهو متعارف عليه ماء وملح ودقيق وزبدة أو سمن

أنا مقاديري اليوم هي لثلاث أشخاص أنا وشنبيري وعمي أب شنبيري

مقداري كان 4 أكواب دقيق (( استخدمت الايطالي )) + 3 أكواب ماء + رشة ملح + شوي زيت أو زبدة

خلطت المقادير كلها قبل ما نحط الطنجرة عالنار وقلبتهم كويس لعند ما تأكدت انهم تخلطو كويس



بعدين حطيتهم عالنار ويدي والمعصدة والتحريك يشتغلو مع بعض بدون توقف لغاية ما تتكتل عندي

وتقعد كتلة وحدة



بعدين نزلتها وعصدتها كويس وكنت مجهزة حوالي كوب ماء عالنار على جنب وأول ما رجعت العصيدة

عالنار صبيت عليها الماء عشان تطبخ كويس وتستوي



وعلى بال ما جهزت الزبدة والصحن والسفرة والرب والعسل كان الماء اللي حطيته عليها نشف

نزلتها عصدتها من جديد ورتبتها في الصحن بالطريقة المعتادة وزينتها بطرف الكوب وحطيت

الزبدة السااااخنة عليها



وقدمتها لأبو الشباب مع العسل وأنا نحبها مع الرب

هي تفضلو حبايب سمو ومدوا يديكم

[نسمه ليبيه]

سلم ايدياتك وايديات امك وحتى اختك اللى ذكراتك بيها خخخخخخخخخخخ

ان شاء الله جارى تطبيق الطريقه

وماتحرمينا من طلاتك واكلاتك الحلوة

[أم أيوب]

نسمة يا حبيبة بارك الله فيك عالرد

[ابريكه]

فكرة حلوة والله
يسلم يدياتك زهورة وصحة على قلوبكم

[أم أيوب]

فكرة حلوة والله
يسلم يدياتك زهورة وصحة على قلوبكم

ردودك هي الحلوة بريكة والله يسلم قلبك حبيبتي

[بنية بوها]

يساموا يازهورة ايدياتك صحتين انتي وشنبيرك

[أم أيوب]

يساموا يازهورة ايدياتك صحتين انتي وشنبيرك

يسلمك ويخليك بنوتة بوها

[للاهم]

اه ياني هلكتيني زهورة - ماشاءالله ناشطة وتجيبي في كل اللي يحبه قلبي وما نقدر نمد يدي عليه
بس اهو نراجو ف الميلود بيش نديروها ونشبعوا منها
سلم يدياتك وسلم امك ونصائحها الرائعة
صحتين

[أم أيوب]

اه ياني هلكتيني زهورة - ماشاءالله ناشطة وتجيبي في كل اللي يحبه قلبي وما نقدر نمد يدي عليه
بس اهو نراجو ف الميلود بيش نديروها ونشبعوا منها
سلم يدياتك وسلم امك ونصائحها الرائعة
صحتين

للاهم كولي ولا يهمك وأشربي زيت زيتون عشان تقضي عالكوليسترول اللي في العصيدة

نورتي يا حبيبة

[دلع]

يسلمووووووووووا