[ الشوربة الليبية ] من مطبخ أم أيوب

[أم أيوب]

السلام عليكم ورحمة الله وبركاته

اليوم طلب مني أبو الشباب تحضير شوربة ليبية والمشاركة بيها في غداء العائلة

في منزل أهله وقلتله غالي والطلب رخيص

طريقتي في الشوربة معتمدة عندانا من جديدة أم ماما الله يرحمها وهي لا يعلى على أكلها

المقادير زي الشوربة العادية

بصلة + طماطم حب + طماطم معجون + لحم مقطع مكعبات + ربطة معدنوس + بهارات

السر عندنا في البهارات لأنها هي اللي تعطي النكهة المميزة للشوربة العربية

بهاراتنا المعتمدة للشوربة هي

ملح + بزار نصف ملعقة كبيرة + والبهارات الصحاح متاع الرز

اللي نستخدم فيه منهم الزنجبيل وعود اللحم والشيبة وهذي صورتهم



ولا ننسى سر النكهة مع ورق الغار وحبيبات المستكة العربية وملعقتين سمن

الطريقة :

نفرم البصل في ست البيت ونضيف عليه اللحم والسمن ونقلب عالنار لغاية

ما يتحمر البصل واللحم



في ست البيت نحط التوابل المطحونة مع الطماطم الحب والمعجون وشوية ماء

ونفرم لغاية ما ينهرس الطماطم ونضيفه عاللحم والبصل اللي تحمروا

ونضيف معاهم البقدونس ونقلب عالنار



نهدي النار ونخلي المكونات لغاية ما تتسبك أو زي ما نقولو تعقد ويطلع الدهان لفوق

وقتها نصب كمية كفاية من الماء ونضيف البهارات الحية متاع الرز الا المستكة العربية

لأن نكهتها تبان في الأخير ونخلي الطنجرة عالنار لغاية ما يستوي اللحم



وقتها نحط حبات المستكة اللي تكون في حدود ثلاث أو أربع حبات بس ونضيف حبوب الشربة

نخلوها 10 دقايق ونرشو عليها نعناع يابس محكوك

سامحوني ما صورتهاش بعد ما طابت لأني كنت بيها تحت في حوش عمي

صحتين ليكم مقدما

[ابريكه]

اي حاجة بالشيبة مش عادية
امي عودتنا عليها الله يعطيها الصحة وطول العمر
شربة ليبية مقومة زهورة سلم يدياتك

[بنية بوها]

يسلموا ايدياتك يازهورة وفعلا حتى البهارات ليهم دور صحتين علي قلوبكم

[للاهم]

شريبة معنقرة زهورة الامورة فايحة عالاخر واونه خطر ت علي شربة جديدتي الله الله
طول عمري نقول الشربة والتقلية حاجتين ما يجنش من غير السمن الله يعيننا عالكلسترول اللي اخترعوه خرب وكالنا
تي ماهو هلنا عاشوا عالسمن والدهان اللي اشبر فوق الطبيخة والطاجين وشن صارلهم!
حتى انا نحب نحط شوية شيبة وورقة غار وزنجبيل وعود لحم محمستهم علي طاوة وطاحنتهم ومخليتهم للشربة
بس ما نستعملش في المستكة في الشربة
نستعمل فيها مع المكرونة المبوخة
حتى النعناع محمسته شوية في طاوة وحكاكته علي غربال ومخليته في فازو خصوص الشربة.
موضوع متميز - جاري التقييم.

[للاهم]

حي حي ما فطنت اللا توا للوسام
مبروووووووووووووووك زهورة - مع زغروتة صادية.
شكلك فايتاتني حاجات - ليا يوم ونص ما خشيت عالمنتدى

[نوارة ليبيا]

يسلموووو ماشاء الله تبارك الرحمن
شريبة اتهبل
صحتين وعوافي يارب

[أم أيوب]

اي حاجة بالشيبة مش عادية
امي عودتنا عليها الله يعطيها الصحة وطول العمر
شربة ليبية مقومة زهورة سلم يدياتك

فعلا بريكة الشيبة ليها نكهة خاصة وأنا من عشاقها في الأكل

مع الرز بالخلطة والمكرونة بالبصلة أو بالخلطة والكسكسي بالخلطة

مع الشوربات وكل شي

ربي يخليلك أمك ويطول في عمرها يارب

نورتي حبيبة

[أم أيوب]

يسلموا ايدياتك يازهورة وفعلا حتى البهارات ليهم دور صحتين علي قلوبكم

الله يسلم قلبك حبيبتي وفعلا البهار هو سر تميز الطعام

الواحد يقدر يخلي للأكل متاعه مذاقه الخاص اللي يتميز بيه بالبهارات

[أم أيوب]

شريبة معنقرة زهورة الامورة فايحة عالاخر واونه خطر ت علي شربة جديدتي الله الله
طول عمري نقول الشربة والتقلية حاجتين ما يجنش من غير السمن الله يعيننا عالكلسترول اللي اخترعوه خرب وكالنا
تي ماهو هلنا عاشوا عالسمن والدهان اللي اشبر فوق الطبيخة والطاجين وشن صارلهم!
حتى انا نحب نحط شوية شيبة وورقة غار وزنجبيل وعود لحم محمستهم علي طاوة وطاحنتهم ومخليتهم للشربة
بس ما نستعملش في المستكة في الشربة
نستعمل فيها مع المكرونة المبوخة
حتى النعناع محمسته شوية في طاوة وحكاكته علي غربال ومخليته في فازو خصوص الشربة.
موضوع متميز - جاري التقييم.

للاهم الله يسلمك عالرد الحلو والخفيف

والله ديما نقول فيها لما يقولو تباعدوا عالسمن والدهان

زمان كان أكلهم كله بالسمن والزبدة وماشاء الله كانوا صحاح متان

نحب السمن في الأكل ولو كشيك صغيرون بعد ما يطيب

أهو الواحد ياكل سمن ويشرب زيت زيتون

[أم أيوب]

حي حي ما فطنت اللا توا للوسام
مبروووووووووووووووك زهورة - مع زغروتة صادية.
شكلك فايتاتني حاجات - ليا يوم ونص ما خشيت عالمنتدى

الله يبارك فيك للاهم