[ مكرونة صالصة ] من مطبخ mnona

[mnona]

صباح الخيرات وخياتي
اليوم جبتلكم امس شن طيبت غداي ( مكرونة صالصة ) علي السريع
ولانه عالسريع ومعنديش وقت مصورتلكمش الخطوات كلها
المقادير
ربع كيلو مكرونة ( مقدار شوية طبعا لانه اني وراجلي بس ربي يخليهولي )
4 طماطم اخضر مقطع مكعبات ومدابيك كبيرة شوية
2 فلفل أخضر حار مقطع مكعبات
2 فلفل أخضر حلو مقطع مكعبات
راس بصل صغير مفروم في ست البيت
صدر دجاج مقطع مكعبات ( او حتى تخليه صحيح عادي مافيش مشكلة )
م ك معجون طماطم
تابل وكروية / شوية ملح حسب الرغبة / فلفل أسود / زنجبيل مرحي
فصين ثومة مفرومة ناعمة
الطريقة
نضع الزيت في الطنجرة ونضع فوقه البصلة المفرومة الناعمة ونخليها لين يولي لونه شوية اصفر
وبعدين نضيف الدجاج وبعدها الفلفل الاخضر الحلو والحار والطماطم ومعجون الطماطم ونخليها
تشكشك شوية عالنار
وبعدها نضيفلها 2 كوب ماء دافئ مدابيك وضيفي الثومة المفرومة وخليها علي نار هادئة لين اطيب الصالصة ويطلع زيتها عالوجه
(( في حال انك درت الدجاج كامل مش مقطع مكعبات بعد مايطيب حوليه من الصالصة وخلي يجف شوية وحمريه في الزيت يجيك بنته مش عادي ))
وفي هذه الاثناء نضع طنجرة فيها ماء ورشة ملح وزيت علي النار لين تغلي
وبعدها نضيف المكرونة ( سبيقيتي ) لين اطيب
وبعد ما اطيب خودي ياحنة زيت الصالصة وحببي بيه المكرونة وعاودي ردي المكرونة في الطنجرة عالنار بعد التحبيب باش تجف شوية من الصالصة والزيت ( بنتها احلى تجيك )
وبعد ماتجف حطي عليها الصالصة وقدميها وهيا سخونة وتاكليها بالهني عليك ان شا الله

طبعا لاني امراءة عاملة والحمد لله نروح للبيت الساعة 4:30 متعلقوش علي الصفرة كيف موتيتها بسرعة البرق باش نلحقو نتغدو ونصلو ونتكو شوية
هيا نخليكم مع الصور
وان شا الله يارب تعجبكم طريقتي

[ناني2007]

ماشاء الله عليك ياغالية ...مكرونة تجي في الخاطر

يسلمو ايديك وصحتين وعافية يارب

[mnona]

الله يسلمك بارك الله فيك وخيتي ناني
اسعدني مرورك الكريم

[نوارة ليبيا]

ماشاء الله نموووت فيها

ربي يسلم ايدياتك

والف الف صحه وهناء يارب

[أمـ ساره]

ماشاء الله منونا مكرونة حلوة

سلم ايدياتك حبوبة

وبالهني والعافية يارب

[mnona]

[سحابه صيف]

مشاء الله مكيرينه اتهبل شكلها

وشرح وافي ومشكورة علي النصائح

[أم أيوب]

يسلمووو منونة مكيرينة تشهي

ربي يسلم ايديك ويخليلك راجلك يارب

[mnona]

[الساجدة لله]

صحة وهنا على قلبك ياغالية