خير يا بنات
ماني قلت من قبل اني نموت في الرز
ونحبه بكل انواعه الا الرز الابيض العادي اللي يجي مع الطبيخة
امبارح حرنت عالمكرونة المبكبة غدانا هكي حسيت اني منبيش ناكل منها
مزاجات راني وطهقات ما نحكيلكمش
قلت مافيها الا رز
رز ايش مش عارفة
تقرره التلاجة
واللي فيها
وعقلي ولمباته
هههه
المهم قلت هيا ندير رزيزة بالشعيرية علي طريقتي
بعدين فكرت انها تجي عادة ناشفة
واللا معجنة كان كثرتي حاجة علي حساب حاجة
قلت ايش نحطله بيش يجي ارطيب سلحوبي وحانط
قلت نبدا بسم الله
والالهام توا يجي وانا نقلب في الطنجرة
بديت حطيت شعيرية وزيت ف الطنجرة وقلبت نين تحمرت الشعيرية زين نحبها سمرة
زدت عليها نص راس بصل مقرض مكعبات بيش يبان
ولوز ابيض مزلط ومفصص
وكمشة زبيب
رشيت عليه الملح وبهارات غرام مسالا الهندية الحارات
فيهن كاري وكسبر وكمون طعمة هندية
قرضت جزرة وحطيتها
وحطيت فقاع (مشروم) مقرض شرائح لأنه عادة يرطب الوكال ويحل محل اللحم في الوجبات اللي على استعجال
ماهو نبي نلحق قبل ما اطيب المكرونة
وزدت حطيت بازيليا خضرة عشان نوازن الالوان
وجلفت شوية من فلفل رومي احمر عاللون عادة ما نحبّش
وقرضته مربعات
قلبت هذا كله في بعضه وخليته يقلي شوية ويذبل
بعدين بللته بعلبة مرقة دجاج جاهزة
وزدت عليها شوية امية
لأن الرز هنا ( حبة طويلة بس مش بسمتي ) يحتاج مرق زايد
اضافة ان الشعيرية حتمص نص المية
خليت النار عالية شوية لعند مابكبك
وبعدين نقصت النار عالرز
وخليته يتكتك
بعد قسته ولقيته طاب
عزلت منه [OVERLINE]لأول معلقة[/OVERLINE] في فنجان شربة
وضغطت عليه بملعقة زين
وبعدين قلبته في اصوينية شريتها مخصوص عشان التصوير
وحدة بس هههه
باهي اللي يبيعوا فيهن بالطرف هنا
وبدا عاد جو النقرشة يشتغل
شوية كيتشب
شوية صلصة رانش
ووريقات كسبر
العجيبة اني كنت نبيهن مغير نقيطات - لطشات فنية يعني
اللي يديروا فيهن في المطاعم 7 نجوم
هههههههه
ولما تجي تسلكي الفاتورة تلقيها فوق الاربعمية
هههه صارت لوحدين نعرفهم
قريب غّسلوهم صواني المطعم
المهم
مازبطنش معايا
ماهو هذا عليش غاليات
جايبين واحد مخصوص اكيدة من الصين لتنقيط الصحون وتنسيقها
واكيدة مفيش حد يراجي جيعان عالطاولة
وصبره قريب ينفذ
كان غيرهن النقاطي ساحن
بس الصراحة ومن غير شكيرة في حضرة جنابيجاء مش عاديوحصري للتجريبكولن وادعنلي
تبقن علي خير
المفضلات