السلام عليكم ورحمة الله وبركاته
بيتزا ام الفي
pizza amalfi
بيتزا رائعة بكل معني الكلمة يمكن مكوناتها غريبة شوية
بس لما اتذوقوها حتعجبكم اكيد
هناك انواع عديدة من البيتزا مش بس جبنة وزيتون
في اللي بالجبنة الموتزاريلا والصوص بس وتسمى مارغاريتا
في اللي بالصوص و3 انواع من الاجبان وتسمى كواترو فورماتشي
وانواع واجد مش حافظة اساميهن
اليوم حبيت انديرلكم بيتزا ام الفي
وتعتمد في مكوانها الاساسية علي
موتزاريلا قطع
جبنة مبشورة
روكولا .. او اللي انقولو عليه بالليبي جرجير
بس شكله عندنا مختلف شوي عن جرجير ليبيا
بس الطعم تقريبا واحد
نبدا اولا بالعجينة
انا عجينتي بدون مقادير محددة
يعني دقيق وخميرة وملح وزيت وحليب وماء دافي
وكل وحدة تقدر تستخدم عجينتها المفضلة
بس اهم شي العجينة ترتاح جيدا قبل استخدامها
اولا نخلط المقادير الجافة معا
نضيف السوائل بالتدريج
حتي تتكون عندنا عجينة متوسطة
ونستمر في العجن حوالي 8 دقائق
ونتركها ترتاح
انجهز الصلصة
واللي هي عبارة عن
زيت زيتون . علبة طماطم قطع . اوريغانو اللي نسموه زعتر مجفف
نخلطها معا في محضرة الطعام ونحطها عالنار
عشان تتبخر كمية الماء الزائد اللي فيها
نفرد العجينة ونضع عليها الصوص ثم الجبن المبشور
وندخلها الفرن السااااااااااخن جدا
ونضعها في الرف الاسفل اي قريبة جدا من النار
وهذا هو السر في الحصول علي بيتزا ممتازة
يعني بالشكل هذا ماتاخدش وقت طويل في الفرن
وبالتالي حتحتفظ بالرطوبة اللي فيها
وما تنشفش واجد
بالنسبة ليا اناما نستعملش في الطاجين
وانحط فيها علي ورق الزبدة
انظف وافضل في التحمير من تحت
بعد ما تطلع من الفرن
بسرعة انحط عليها الروكولا وفوقه شرائح الموتزاريلا
ونقدمها ساخنة
وهذي صورة من النت عشان اتشوفو الشكل الاصلي لها
وممكن انحط الروكولا هوا اللي فوق
بس انا لقيت ان العكس احسن عشان الموتزاريلا تمسك الروكولا
صوص الشارف
هو صوص رائع جدا وسهل جدا
بالنسبة لي انا وزوجي لازم منه مع البيتزا
نسخن زيت زيتون عالنار
ونضيفله
فلفل حار شرائح
ثومه صغيرة مقسومة بالنص عشان نقدر انشيلها بعدين
شوية اوريغانو وكسبر مجفف
نتركها دقيقتين عالنار بس
ثم يقدم
اتمني انكون ضفت شي جديد
لان مالقيتش موضوع زي هذا في المنتديات
وهو حصري بس للمطبخ الليبي
لا تنسوني من صالح الدعاء
المفضلات