الســـــــــــــــــــــــــــــــــــلام عليكم ورحمة الله وبركاته
طريقتي في شوربة المشروم الفقاع او الفطر
طبعا بعد تجارررررررررررررب عديدة اوصلت لهل الطريقة وهي مزيج بين الطريقة اللبنانية والمصرية والعالمية
بسم الله اول واخر
المقــــــــــــــــــــــــــــادير
4ملاعق زيت نباتي ويفضل زيت الزيتون ((رغم انها طريقة مش صحية لان زيت الزيتون يضاف في الاخير يعني مانقليش فيه البصل لكن هكي اطيب)) راس بصل متوسط الحجم مقطع , فص توم , مشروم قد صحن كيف ماهو في الصورة حاجة كوب وربع تقريبا , كريمة , او 2 ملاعق كبار دقيق , كوب حليب , ومرقة دجاج او ماجي لو مش متوفرة عندك مرقة بيتي, فلفل اكحل , 4 اكواب ماء , حبة بطاطا متوسطة وملح للحاجة.
الطريــــــــــــــــقة
انحط الطنجرة علي النار وفيها الزيت وانضيف البصل والثوم وانحرك اشوية
وبعدين انحط عليها المشروم ونستمر في التحريك
وانضيف عليها الميه او المرقة والبطاطا وانخليهم يغلو وانضعف عليهم النار وبين الوقت والتاني انطل عليهم وبعد مايستوي المشروم والبطاطا انجيب الكريمة وانضيفها عليها نحصل علي مزيج دو قوام غليظ وانحط عليها مرقة ماجي لو ما طيبتهاش بالمرقة البيتي من الاول انخليها علي جنب حتي تبرد وناخد طريفات مشروم للتزين باش لما اتقدميها تنعرف شربة فقاع
وانحطها في الخلاط ونفرمها وانعاود انردها للطنجرة مرة تانية وانضيفلها الفلفل الكحله والملح كان استحقيتلا
واتقدم بالعافية.
وبالهنــــــــــــــــــــــــــــــــــــــــــــ ـــــــــاء والعافية
المفضلات