السلام عليكم ورحمة الله وبركاته
كيف الحال وخياتي ان شا الله تكون بخير
اليوم جبتلكم سكالوب الدجاج علي طريقتي
وان شا الله يارب تنال اعجباكم ورضاكم
طبعا حاولت بقدر الامكان اني نصورلكم صور وتكون واضحة
ولاني والحمد لله بطبيعة حياتي اني ديمة مستعجلة مصورتش الخطوات كلها
هي نبدو باسم الله بالمقادير
6 شرائح صدر دجاج
2 طماطم اخضر / 2 فلفل اخضر حار / فص ثومة / بصلة متوسطة / عصير ليمونة / ملح / فلفل اسود / تابل تونسي / ربع كوب ماء مخللات
خبزة مرحية / بيض
الطريقة
افرمي الطماطم والفلفل والثومة والبصلة في ست البيت ، وبعدها ضيفي الملح والفلفل الاسود والتابل وربع ماء المخلالات وخلطيهم مع بعض كويس
وبعدها تبلي الشرائح بالتتبيلة وخليهم لثاني يوم ، طبعا اني خليتهم حاجة ساعتين بس وكل ماتعطلي بيها كل ما افضل
بعد الساعتين خديت البيض وضفتله نكهة من التتبيلة ، خودي شرائح الدجاج غطسيهم في البيض وبعدين الخبزة المرحية والبيض مرة ثانية والخبزة المرحية مرة ثانية وانتي تكوني مجهزة زيت القلي ، حطي الشرائح المتبلة والمغلفة بالبيض والخبزة المرحية في الزيت لين تتحمر كويس ومدابيك تنقصي عليها النار باش ماتنحرقش منك وهدي صورته بعد القلي
وقدمته مع كب كيك من مطبخ النطاحية الله يذكرها بالخير وطاجين جبن ورز
هذا رابط الكب كيك للموضوع الاصلي
http://www.libyan-kitchen.com/kitchen/showthread.php?t=443
وترا قولوا شن درت بباقي التتبيلة
كنت مجهزة مقادير طاجين الجبن شفتها قلت حرام نخسرها وخاطري فيها ضفتها للطاجين وجت بنته تهوس " شُكارة العروس "
وهي تعالو مدو ايدياتكم وتفضلو دوقوا بنة وصنة
المفضلات