[مشاركة في مسابقة شاركي معنا باطباقك الثراتية الربيعية] دجاج مشوي على الفحم من مطبخ أمـ ساره

**أمـ ساره** · 02-13-2011, 11:23 PM

السلام عليكم ورحمة الله وبركاته

خيرات على بنات بلادي

اليوم زي ما قلت لكن الجو كان حلو (ماشاء الله والحمد لله)

فدرت زردة

الاول طيبت مكرونة امبكبكة بالخضرة على الفحم

وبعدها قبل المغرب شويت دجاج

طبعا تبلتها قبل العصر وخليته قريب ساعتين

وكان رووووعه بصراحة وان شاء الله يعجبكم

المقادير

دجاج عدد افراد العائلة

انا استخدمت 4 افخاد كاملة

و4 اجنحة وصدرين

وللخضار المشوية

فلفل أخضر حلو مقطع مكعبات متوسطة

بصل ابيض مقطع مكعبات متوسطة

طماطم أخضر مقطع مكعبات متوسطة

للتبيلة

زيت زيتون >> خلطت نوعين لأن زيت الزيتون الي عندي قوي شوي ( ضرب ماء)

بصلة صغيرة مفرومة

عصير ليمونة كاملة

كوب زبادي

ملعقة طعام مايونيز

ملح - فلفل أسود - قرفة - زنجبيل مطحون - فلفل أحمر حار - كركم

وطبعا اهم شيء في الموضوع كله

الزعتر وخاصة انه أخضر وطازج

جابه زوجي لي اليوم من الجبل

فرحت بيه تقول شرالي ذهب شوفوا صورته مازال ما كملته كله

قاعد انظف فيه هنا

المهم نرجعوا لموضوعنا

الطريقة

نخلط مواد التتبيلة مع بعض في صحن عميق

ونضيف قطع الدجاج بعد تنظيفها

ونزع الجلد منها ولو فيها شوي شحم

ونقلبها في التتبيلة كويس

ونخليها لمدة ساعتين او اكثر

ثم نحضر الفحم طبعا اني كان حاضر من الاول

لأن طيبت عليه المكرونة

وضعت قطع الدجاج على الشواية

وتركتها لين نضجت من جهة وقلبتها على الجهة الثانية >> توصيات زوجي

والجهة الي طابت دهنتها بزيت الزيتون

وهي على الشواية طبعا لازم تنتبهوا

لأن الزيت بيزيد من اشتعال النار

في الوقت هذا جهزت الخضار بوضعها في السيخ الخشبي

وبعد ما نضج الدجاج وضعته بصحن وغطيتها

بورق الالومنيوم حتىى لا يبرد بسرعة

وحطيت الخضار على الشواية ودهنتها من الجهتين بالزيت

وقلبتها لين نضجت وخذت لون الشواء الاسود الحلو

وطبعا كل وحدة حسب ذوقها ورغبتها

وبشويت معاها قطع البادنجان بعد ما قصيتها

شرائح متوسطة السمك ووضعتها على الشواية

ونفس الشيء دهنتها بالزيت

وممكن اضيفي للزيت شوي زعتر طبعا اني نسيتها هالنقطة

وتبلت الباذنجان بالملح بعد الاستواء

وتوا صار وقت الجد وهو الاكل طبعاً

قدمت قطع الدجاج مع الخضار المشوية

مع سلطة الحمص بالطحينة

واتفضلوا يا حلوات عشانا اليوم

وختامها مسك مع طويسة شاهي بالزعتر الطازج على الفحم

وان شاء الله يعجبكم

**أم أيوب** · 02-14-2011, 01:16 AM

أول من يرد معناها نبي حصتي من كل حاجة أم سارة

يسلمو يا حبيبة أكلة تجي في الخاطر

**ام اسر** · 02-14-2011, 01:31 AM

ماشاء الله صنة الشواء وصلت من مسلاته لطرابلس
عشاء امقوم الله يحفضك لي اهل بيتك

**أمـ ساره** · 02-14-2011, 01:33 AM

اقتباسالمشاركة الأصلية كتبت بواسطة أم طهأول من يرد معناها نبي حصتي من كل حاجة أم سارة

يسلمو يا حبيبة أكلة تجي في الخاطر

اتفضلي حبوبة كله ليك صحيحتين

الله يسلمك أم طه ويبارك فيك ويزهي خاطرك يارب

**أمـ ساره** · 02-14-2011, 01:35 AM

اقتباسالمشاركة الأصلية كتبت بواسطة ام اسرماشاء الله صنة الشواء وصلت من مسلاته لطرابلس
عشاء امقوم الله يحفضك لي اهل بيتك

الله يبارك فيك ويخليك ويسلمك على مرورك وردك الحلو حبوبة

ولك بالمثل ان شاء الله

نورتيني أم اسر

**سحابه صيف** · 02-14-2011, 02:07 AM

الله الله يا حبوبة ايهبل ايهبل

وتعرفي كله كوم وهذا

كوم تاني

انموت فيه الشاهي هذا يسلم ايدياتك يا رب

**أم ميوسة** · 02-14-2011, 02:13 AM

ما شاء الله

ايييييح عاد دجاج عالفحم عاااااااد غني على التعريف

دسيلي صحن ام سارة وابعتيهولي ههههه

صحتين حبيبة وموفقة

**أمـ ساره** · 02-14-2011, 12:53 PM

اقتباسالمشاركة الأصلية كتبت بواسطة سحابه صيفالله الله يا حبوبة ايهبل ايهبل

وتعرفي كله كوم وهذا

كوم تاني

انموت فيه الشاهي هذا يسلم ايدياتك يا رب

ههههههههههههههههههههههههههههههه

ربي يحفظك سحوبة ويخليك يارب والشاهي كله ليك اتفضلي

مشكورة حبوبة على مرورك وردك الحلو زيك

**أمـ ساره** · 02-14-2011, 12:55 PM

اقتباسالمشاركة الأصلية كتبت بواسطة أم ميوسةما شاء الله

ايييييح عاد دجاج عالفحم عاااااااد غني على التعريف

دسيلي صحن ام سارة وابعتيهولي ههههه

صحتين حبيبة وموفقة

حاضر ام ميوسة حصتك محفوظة ان شاء الله

الله يسلمك ويبارك فيك وخيتي ومشكورة على مرورك العذب