[ مشاركة في مسابقة شاركي معنا باطباقك التراثية الربيعية ] دجاجة مشوية متبلة باعشاب الجبل مع الزيتون والبطاطا

[للاهم]

خير يا بنات

الربيع يبدا عندي من جناني وبالذات من حديقتي المطبخية

من اخر ايام الصقع ولما تبدا الوطا تسخن ومفيش صقيع ف الليل

نبدا نشري في شتلات الاعشاب والخضروات

ونبدا نقلم في الاعشاب القديمة اللي بهدلها الشتاء وفي حالة كمون

في جناني عندي من الاعشاب: اكليل وزعتر واوريغانو وهو زعتر عريض وثوم معمر ومردقوشة ونعناع ومريمية و معدنوس عادي ومعدنوس مكرمش وكسبر وشبت وووو هههها مزارعة

ومن االخضروات: طماطم بأي نوع ممكن وجميـــــــــــــــــــــــع ما خلق ربي من فلفل نلقى شتلاته ف السوق

الللي اصفر اللي احمر اللي رقيق طويل اللي ملوي اللي مدور اللي خاش في بعضه

مهووسة بالفلفل حتى ان اصحابنا يضحكوا عليا

يقولوا اذا كان للمرسيدي شعار وللنادي الاهلي شعار فأن شعار للاهم قرن فلفل علامة مميزة ترايد مارك يجب وجودها التشريفي في اي صحن

قريب اندير الحلويات بالفلفل

انا حتى نحب الشكولاطة بالفلفل

المهم مانصدق يدفى الجو ونبدي نرد نعتني بحديقة المطبخ

في الربيع وهنا يبدى بدري من شهر فبراير

تبدى الحديقة تنتعش وتعطي ثمارها

في الاسبوع اللي فات جبت من الجبل اكليل بنكهة الليمون وجبت مريمية( تيه) من نوع اخر وزعتر مختلف عن اللي عندي وزرعتهن وجففت جزء منهن

حاولت جلب روح الغابة

وحاولت ندير شواية مشهورة بيها اجديدة الله يرحمها ف زرادي الجبل

ايام المرج والمارزوتي

سقى الله

كان خاطري ندير مكرونة مبكبكة بلحم الحجل او الارانب

كيف ما كانت اديرها ياللي يصيدوه خوالي من الغابة واللي طعمتها مازالت في ريقي من طفولتي البعيدة اللي قضيتها عند اجديدة

الله غالب هذا الموجود

المهم طبقي اللي مشاركة بيه ف المسابقة

دجاج مشوي ف الفرن بأعشاب الجبل والبطاطا والزيتون

مشكلتي ما عنديش مقادير

طول ما انا نطيب كل مرة نزيد حاجة نحس انها حتحلى الاكلة

ومرات نحس ان الاكلة مش تمام من ريحتها ونبدا دايخة شنو اللي ناقصها بيش تنعدل

ونبدا عاد نذوق ونحط

عندي انف لا يخطئ ههههه

وعندي شلطات في ايدي بلا عدد

كيف اجديدة الله يرحمها

كل ما نجوا عندها يا اما رابطة صبعها ذابها موس

او ملبسة طماطم معجون علي ذراعها شالطتها الكوشة

الله يرحمها ديما تشتغل ف المطبخ بسرعة

وعقلها يدوي

مشغولة عالمريض وعالنافس وعالغايب

طبقي اليوم

دجاجة صاحة مزال الشحم منها ومغسولة جيدا بالخل والملح ومسقطرة

كمية لابأس بها من الثوم كل ما زيادة كل ما احسن

عصير ليمونتين

رشة سماق

رشة شطة ميبسة ومجروشة

وراني كريمة عالاخر في الرش هههه

ملح عينك ميزانك راجلي يحب الاكل ملحه طالع

وزيت زيتون

نتبل الدجاج ونفركها زين بما سبق ونخليها ونشقى بباقي المكونات

انا لميت باقة زعتر واوريغانو واكليل وكسبر( وثوم معمر – مش واجد طعمته قوية)

وقرضتهن زين وزدتهن عالدجاجة مع الفرك

قشرت وقرضت بطاطتين

وجبت نص كوب زيتون وانتبهن معاه لكمية الملح بالطبيعة علي راي اخوانا التوانسة

وزدتهن عالدجاج المتبل

وخلطت الجميع بيش حتى البطاطا تتشرب التتبيلة

حبيت نشويها في الشواية برة لكن الشواية من الشتاء ما فتحتها ومحتاجة تنظيف لمدة يوم وسريب طويل

وهي مهمة راجلي ومكسل مازال فيها

كنت مسخنة الكوشة على درجة 400واستعملت طاجين بايريكس مش عارفة نحس ان الدجاج المشوي ديما يجي فيه سمح ويتحمر زي متاع السوق

حطيت الدجاج وزرقتله شوية امية بيش تحركه وخليته يستوي

ومرة مرة نفتح عليه ونسقيه بالمرقة بيش الدجاجة ماتنشفش

يا بنات ريحته مش عادية وخصوصا مع الزيتون

نحنا نقعدو نتعاركو علي حبات الزيتون، والبطاطا تجي لذيذة وذايبة مع محافظتها على شكلها، يطلق عليها الثوم والزعتر والاوريغانو الطازج

صنة وبنة

اللي صار لما راجلي يجي جيعان مايقدرش يصبر علي حركاتي

اللي هن التصوير وقت الوكال

خصوصا انه كلينا ف الجنان ف الشميسة الجو حلو وربيعي هالايام

المرة هذي خليته ياكل وقلت البنات توا يتخيلن شكل الصحن اللي قدمته

وجهزت معا الدجاجة المشوية

سلاطة محبشة من سلطات للاهم

بل القلب علي راي جديدة امي

طماطم مقرض جلوف

بصل موري وهو اللي يجي مع السلاطة حسب تقاليد هالبلاد

عادة ما يطيبوش بيه هو مخصوص للسلاطة

وباقة معدنوس طازة من جناني

وزيتون مفري متاع سوق

وفلفل مخلل مش حار

وسماق وعصرة نص ليمونة من جناني حتى هي وخل وملح وزيت

وراهي اكلة خفيفة مشبعة

ربيعية

لوحة زردة ليبية ربيعية للفنان الليبي الكبير محمد زواوة درتلها سكان من نتجة حاطتها في مطبخي

لكن مش كيف ربيع بلادنا

وهذك المكرونة تدقل وتبكبك عالحطب

والشواية بنتها تجيب من وين موشوقة في عيدان من الغابة يطلقن فيها طعمة

والعصبان اميته اتفاور وتتفيض اتطشطش عالحطب

والعيال والبنات افوامهم خضر من القعمول

والصبايا – النساوين يعني – افوامهن مسوكات بقشرة الخزايني

والشاطرين لاقيين فقاع وقاعدين يشووا فيه عالنار

واللي اشطر منهم مصيدين حجل وارانب وقاعدين ينتفوا ويسلخوا

اكتفاء ذاتي عمرنا ما شلنا لحم معانا كله من الغابة

واللي اشطر منهم يحفروا يوتوا لبومردم

والدحي المسلوق الملون بقشور البصل الموري والاصفر في يدين العيال

ولا تشموا زفر

كلها روائح الطبيعة

والنوار على مسحات السيارة ف المرواحة

ومشينا وجينا سالمين

بريكة رب العالمين

الكل يغنيها ف الطريق

زردة ليبية معتبرة

وربيع ليبي اوريجينال ينشرى بالفلوس

وربي يشفي خيتنا السمحة ويبرد عليها

ترد معانا بنشاطها المعهود ويزهى منتدانا الغالي

ويعم الربيع

وان شاءالله كل ايامكن ربيع

اتبقن علي خير

[سحابه صيف]

مشاء الله تبارك الرحمن

تعرفي نقراء في الموضوع وتمنيت قاعدة ننزل هههههههههههههه انسجمت

يسلم ايدياتك يا رب

[للاهم]

شكرا سحوبة حتى انا قاعدة نعدل فيه ونشوف كان في اخطاء طباعة جعت جوعني
تعرفي ليا يجي ساعة انزل فيه كل مرة يضيع مني ونعاوده هبلني ودهشني ونشف ريقي
هههههه بس الذكريات منقولكش مشيت معاه ليام زمان وسقطت دمعات عالغايبين
سقى الله والله يرحم اجديدة وامها قديش كانن فنانات ف الطبخ والكيكات والحلويات والمخلالات

[زينب محمد]

ماشاء الله لاقوة الا بالله

دجاج يسهف وسرد شيق

مشاركة مميزة ورائعة

الله يسلم ايديك ويعطيك الصحة والعافية حبوبة

صحتين وهناء على قلوبكن

[نسمه ليبيه]

ههههههههههه زرده مش عاديه ذكرتينى باغنية مشينا وجينا سالمين

كل مرواح من الزرده لازم نقولوها
وبالمناسبه فى شعارك ارفعى فلفل وزيتونه شكلك من عشاق الزيتون

وبالتوفيق فى المسابقه

[للاهم]

شكرا حبوبتي زوبة فرحانة اللي ردت فيا الروح ونشطت وشاركت
شكرا علي هالمسابقة الحلوة

[بنية بوها]

والله مش عارفة شن نقولوا عالاسلوب الرائع او عالاكلة الاروع
بس شكلك طالعة لجداك الله يرحمها وان شاء الله انتي اطول عمر
يسلموا ايدياتك وجررررررررررررررررري عالتقييم

[للاهم]

شكرا خيتي نسمة ليبية
هههه والله شنو نقولك الفلفل شعاري
والزيتون شعار راجلي وصاحبه
من كم يوم في مزرعة في الجبل قعدنا فيها تلات ايام سحنونا بالزيتون
في شجرتين قعدوا طول الوقت مشبرين فيهن ويلقطوا ف الزيتون في وسط غابات امريكا الجبلية
ولما تعبنا رفضنا نكملوا نقطعوا معاهم وان نحنا جايين نزردوا مش نكملوا الوقت ف الزيتون زعلوا هههه
بس الحقيقة ساعدوني وحفروا عالزعتر والاكليل والتيه وجبدوه ليا من عروقه عشان نستنبته ف جناني

[بنية بوها]

واا نسيت نقوللك موفقة ان شاء الله في المسابقة

[للاهم]

شكرا بنية بوها عالتقييم ممنونة خيتي الحلوة
الله يرحمهن الاتنين يا ما تعلمت منهن بالنظر فقط
وياما سمعت نصائحن وهن يطيبن
هذي ماتندارش هكي
هذا تتعدل هكي
وماننسش دويرة خزين مظلمة من غير وشن ومسقعة وفيها ارفف مستفة فيها اجديدة الكبيرة فازوات الزيتون المرقد بانواعه ومخلل الفلفل والخيار
سقى الله