[ حلوية معسلة اقتصادية تستر عند الحاجة] من مطبخ للاهم

[للاهم]

خير يا بنات
هذي حلوية ادير فيها ماما في رمضان وحتى ف الايام العادية
وما نعرفش اسمها
ونحبوها واجد ومرات عندنا خير من الحلويات الاخرى
مرات نقولولها عيش السرايا مع اعتراض البعض على التسمية لأن عيش السرايا يختلف عنها
المهم هي حلوية والسلام
وكل يسميها ما يحب
وراهي ساهلة واقتصادية جدا
اضافة انها وسيلة لحفظ النعمة يعني بدال ما ترتمى الخبزة البايتة حاشا النعمة، الواحد يلقى ما يدير بيها
جربتها من مدة لأول مرة متسهفة عليها ، رغم اني ما نحبها الا من ايدين ماما
وهي وين ماما بيش نذوقها من ايدياتها الله يقرب كل بعيد
فيها نكهة مش عادية قعدت طول ماهي في صحن علي دولاب المطبخ وانا ماشية جاية عليها

*المقادير*

خبزة فردة طويلة بايتة

حليب
بيض + فانيليا
عسل حلويات خفيف
لوز مدشش وشوية قرفة يدوب نفة
او جوز هند
زيت للقلي

*الطريقة*

نقطع الخبزة شرائح وما تحاولن اديرن زي لما جربت نغير في شكلها ونقصها نجوم وقلوب وحركات
لأن ضروري حاشية الخبزة تكون فيها بيش تتماسك
نغطس الشرائح في الحليب مش واجد لين تتنقع زين
المهم تشرب من الحليب
بعدين نغطسها في البيض المخفوق جيدا مع الفانيليا
نقليها في الزيت حتى تشقر
ثم نغطسها في العسل – الشيرة
ونضعها في صفاي حتى نتخلص من فائض العسل
ثم ننسقها في طبق ونرش عليها نوع المكسرات المفضل او جوز الهند
وبالهناء
اتبقن علي خير

[الساجدة لله]

تسلم يدياتك ياغالية وربي يحفطلك اميمتك يارب وهده انديرو فيها بس مش معسلة الحليب نضيفله سكر بعدين نفي ظريقتك بس هده عجبتني تو انديرها لانها صحية مدامها بالعسل خير من السكر وهده احلى نجمات على النوع القنين

[سحابه صيف]

اللـــــــــــــــــــــــــــــــــــــــــــــــ ه فكرتيني بيها حتي حنا انديرو فيها زمااااااااااااااااان لما انا صغيرة

وانا ديما اندير فيها رقيقة باش تتحمر زين وتبي تتقرمش

يسلم ايدياتك يا رب

[بنية بوها]

تسلمي يللاهم دكرتينا بالدي مضى وصحتين علي قلبك

[ليبية]

الله يسلم ايديك يا لالهم
اني ندير فيها بالتوست
مرات مالحة بالجبنة
ومرات حلوة بالعسل
يعطيك الصحة

وهي تسمى بال فرينش توست

[فضااوي]

ذكرتنا بايام زمااان لما تليط عليناا نديروهاا هههههههه

رووووعه

تسلم الايااادي يالغلا

[أم أيوب]

فكيرة حلوة للاهم وما تاخد وقت ولا مجهود

ان شاء الله نجربها

يسلمو يا عسولة

[للاهم]

اقتباسالمشاركة الأصلية كتبت بواسطة الساجدة للهتسلم يدياتك ياغالية وربي يحفطلك اميمتك يارب وهده انديرو فيها بس مش معسلة الحليب نضيفله سكر بعدين نفي ظريقتك بس هده عجبتني تو انديرها لانها صحية مدامها بالعسل خير من السكر وهده احلى نجمات على النوع القنين
شكرا ساجدة بس افطني راهو العسل هو الشيرة
يعني سكر وماء ينغلن وينزاد عليهن شريحة ليمون وعود قرفة
ولما يعقد نحطوا شوية زهر
راك تحطي عسل طبيعي

[للاهم]

اقتباسالمشاركة الأصلية كتبت بواسطة سحابه صيفاللـــــــــــــــــــــــــــــــــــــــــــــــ ه فكرتيني بيها حتي حنا انديرو فيها زمااااااااااااااااان لما انا صغيرة

وانا ديما اندير فيها رقيقة باش تتحمر زين وتبي تتقرمش

يسلم ايدياتك يا رب
ايوه سحوبة هي حلوية قديمة ونحبها من طفولتي البعييييدة
بس لما نملوا من الحلويات الاخرى ديما نردولها
وعندي خويا مايحب الا هي وكان يلقى يبيها كل يوم في رمضان

[للاهم]

اقتباسالمشاركة الأصلية كتبت بواسطة فضااويذكرتنا بايام زمااان لما تليط عليناا نديروهاا هههههههه

رووووعه

تسلم الايااادي يالغلا
مش مغير يا فضفض
ماهي تستر اضافة الي نكهتها الحلوة لا يمكن تشبعي منها رغم بساطتها جنب الحلويات الاخرات
طيب المرور يا رضية يا بنت الاصول
ما تنسيش اطمنينا على السمحة