(الفرن المحمول ) من مطبخ 79nana

**79nana** · 09-25-2011, 11:19 AM

السلام عليكم ورحمة الله وبركاته

اخواتي الغاليات كيف حالكم والله ليكم وحشة ولاكن الله العالم بالضوروف الي مرينا بيها والواحد ماعنده نية في شي حتى سلتة شعر نكيد فيها ولاكن الحمد لله بعد النصر وان شاء الله التحرير لباقي المناطق ويوفقنا في تنظيم بلادنا ويبعد علينا الطاوبير الخامسة وغيرها وان شاء الله يعم على بلادنا الخيرات والامان اللهم امين

المهم اني قلت خلي نشاركم ولو بحاجة بسيطة

واليوم جيتكم بطنجرة نقول عليها الطنجرة السحرية لانها اتطيب وتشوية وووووووووومبيييييييييييييييحة للريجيم لانها تطرد الزيوت والدهون واتنزرها كلها تحت وتاكلي الاكل صحة في صحة بادن الله

وتعرفو اني نستعمل فيها لشنووووووو نستعمل فيها للتجفيف القرقوش روووووووووووعة والاحلى من هكي ما تستهلكش هلبة كهرباء لانها اتطيب الحاجة في اقل من وقتها وفيها موقت للزمن وامنة جدا وروعة في كل شي طيخ وتسخين وشوش وتحمير وفي كل شي هما بيقولو حتى المعجنات اني جربت فيها خبيزة الباغلي جت روعة ولاكن طبعا الكمش مش هلبة زي الكوشة العادية ولاكن تساعد وهده الصورة لاحد الماركات وفي منها اشكال والاوان ونفس النتيجة للجميع

وان شاء الله تستفيدو منها زي ما اني استفدت

تحياتي للجميع

**79nana** · 09-25-2011, 11:22 AM

راهو هدا مش حقها هدا التقسيط امتعها حقها يجي 100 دولار ويجو معاها الطروف هادي في الموديل هدا وفي مايجيش معاها شي وارخص وهكي

**omhammam78** · 09-25-2011, 12:24 PM

والله معاش اعرفنا شن بنشروا كل مرة تطلع حاجات جديدة وكل وحدة اتجي في الخاطر أكثر من غيرها وخاصة اني ماعنديش الروح مع معدات المطبخ وربي يعينا على اقناع الراجل اللي بيدفع الفلوس بيقولك ماهو أمي وجداي كانت أطيب من غيرهاهذه من باب الفوكاهة

**79nana** · 09-25-2011, 01:21 PM

والله عندك الحق يا ام حمامة الواحد بيهبل تعرفي اني مرات نجمع شوية فليسات ونقول اهو نشري بيهم حوايج لما نمشي للسوق نلقى في رحوي نوقف علي الطناجر والماعين ونقعد بالساعات ونقعد نربش لين نشري خخخخخخخخخخخ ان شاء الله حتى كويشيك ولا صوينية حالة وخلاص الواحد معادش وين بيقسم هالمعيش خخخخ
ولاكن انقول في حاجات والله مافيهاش فايدة ماتستفيديش منها وفي حاجات تحتاجيلها تعرفي هده زي حالاتي في الغربة لاتقدري تنشري قرقوش ولا الجو يساعد ولا قوانينهم تساعد ولاكن هالطنيجرة تلقيها زي الرحمة القروروش في ساعة يطيب الي قبل كنت في الكوشة 7 ساعات باش ايطيب ويجف يعني رحمة وفيها ميزة انها تغسل نفسها بنفسها وفي ميزة الحرارة انتي تتحكمي فيها من 250 فهرا هايت ابى 450 يعني في عوض كوشة وفيها ميزة انك لو ماتبيش الدهون تنحيلك كل الدهون وتقدري تدخلي السلفر والطاجين عادي المهم مش كلينكس بس

وعلى العموم ربي يرزقنا جميعا ونشرو كل الي خاطرنا فيه ورجلاتنا راضين وفرحانين

تحياتي ليك

**ام عبدالمعز** · 09-25-2011, 05:54 PM

يسلمو ايديك نانا طنجرة حلوة وتستاهل الشريه

بانتظار جديدك دوماً

**أمـ ساره** · 09-25-2011, 09:52 PM

ماشاء الله طنيجرة تجي في الخاطر والله

دخلتيها لراسي والله

ربي يستر ونقنعوا الراجل يشريها

لكن مش عارفة فيه منها في ليبيا او لا

مشكورة حبيبة

**سحابه صيف** · 09-25-2011, 11:33 PM

يعيني والله حترنا وين انحطوهن هل قريشات ههههههههه لكن عجبتني الحق واندخلها في قائمة ههههههه

باك الله فيك نانا وان اشاء الله تبيديها بهناء ومننحرموش من جديدك

**79nana** · 09-26-2011, 08:12 AM

ام عبد المعز ام سارة وسحابة صيف الله يبارك فيكم يارب ويسعدكم ويهنيكم ويعمر بيتكم وتشرو الي في خاطركم كله يارب العالمين والله تعرفو عندكم الحق الواحد قداش بيشري وفي اولويات وكل حاجة في ميزات وعيوب

والواحد يقنص علي التخفيضات باش يقدر يشري كل شي وكان هدا قول علي نفسك يارحمن يارحيم هههههه

وان شاء الله نجو نشرو كل شي من بلادنا الله يارب يعمرها بالخيرات ومانحتاجو لا نكركو من الغربة ولا شي

يجي في خاطرنا شي نشروه من السوق يلا الواحد يتفائل الخير والله بلادنا ماتستاهل الا الخير وان شاء الله يجيبلنا الخير

بارك الله فيكم علي مروركم العطر الله يسعدكم ويهنيكم يارب