[ اسكلوب محشى بالجبن]من مطبخ أم صهيب

[ام صهيب]

اسكلوب محشى جبنة

المقادير : شرائح صدور دجاج - جبنة شرائح - هريسة عربية - خبزةمرحية - دحيه - دقيق -
جبنة مبشورة- صالصة

تتبية صدور الدجاج
خدى شريحة صدور الدجاج واضربيهم بالعصى ضرب مبرح لحد ماايبالنهم صاحب انا انحط فيهم فى كيسة وهاتك ياضرب
ونكون مجهزة ياغورت وفلفل اسود وملح وحبهان مرحى وثومة حسب الرغبة وزعتر وليم والا خل
وزيت زيتون وقرفة مرحية مخلطتهم مع بعض
بعد ضرب شرائح الدجاج انحطهم فى الخلطة ليلة كاملة فى الثلاجة

بعدين خدى كل شريحة صدر واحشيها هريسة وجبنة شرائح وطبقيها وغطسيهافىالدقيق بعدين الدحى وبعدين الخبزة المرحيه واقلى فى زيت غزير وساخن ولمااتطيب صبى فوقها صالصة وجبنة المبشورة وحطيها فى الكوشة لين ادوب الجبنة

وصحة وهناء

كان عجبتكم ادعولى ربى يسهل ولادتى

[omhammam78]

بارك الله فيك وربي يسهل عليك وتنوضي بالسلامة وانحب نعرف انت بكرة والا عندك صغار وفي اي شهر ممكن نعطيك نصائح تفيدك

[ام عبدالمعز]

يسلمو ايديك ام صهيب روعة ماشاء الله

وربي يسهلك ولادتك ويرزقك ماتتمنين

[ام صهيب]

اقتباسالمشاركة الأصلية كتبت بواسطة omhammam78بارك الله فيك وربي يسهل عليك وتنوضي بالسلامة وانحب نعرف انت بكرة والا عندك صغار وفي اي شهر ممكن نعطيك نصائح تفيدك صحيتى بارك الله فيك


اقتباسالمشاركة الأصلية كتبت بواسطة ام عبدالمعزيسلمو ايديك ام صهيب روعة ماشاء الله

وربي يسهلك ولادتك ويرزقك ماتتمنين
شكرا ربى يسمع منك ويسهل

[أمـ ساره]

وكيف ما يعجبنا

ماشاء الله طريقة حلوة والله وتجي في الخاطر

وخاصة لما قلتي هريسة عربية الصنة ركبت في خشمي

مشكورة وخيتي وربي يسهل عليك وعليا يارب

[سحابه صيف]

بارك الله فيك منطرها ايهبل واكيد الطعم احلي

وان اشاء الله منسمعو عليك كان الخبر الحلو واتنوطي بسلامة يا رب

وكان جبتي ولد عروسته واتيه ههههههههه

[ام صهيب]

اقتباسالمشاركة الأصلية كتبت بواسطة أمـ سارهوكيف ما يعجبنا

ماشاء الله طريقة حلوة والله وتجي في الخاطر

وخاصة لما قلتي هريسة عربية الصنة ركبت في خشمي

مشكورة وخيتي وربي يسهل عليك وعليا يارب



خود بخاطرك

عارفة كلنا انموتوا فى الهريسة العربية
صحيتى على الطلة



اقتباسالمشاركة الأصلية كتبت بواسطة سحابه صيفبارك الله فيك منطرها ايهبل واكيد الطعم احلي

وان اشاء الله منسمعو عليك كان الخبر الحلو واتنوطي بسلامة يا رب

وكان جبتي ولد عروسته واتيه ههههههههه


لالا ياستى ابنيه لكن ولا يهمك عندى ولد وان شاء الله العروسة قنينة بس
صحيتى على طلتك الحلوة

[ليبية]

الله يعطيك الصحة جبتيها في خاطري

ياريت كانت الخطوات مصورة باش زبطت الفكرة اكثر

يعني الشريحة تحطي الحشو فيها وبعدين اتطبقيها على اثنين

سؤال : ماتطلعش الجبنة لما تقليها منها؟

[أم يمنى]

شكلها حلو , بس يانارى صخفنى الضرب المبرح للدجيجة يانارى , ولا يهمك مادامها طلعت حلوة اضربى , جارى التطبيق , ويسلموا ايديك , وربى يقومك بالسلامة ان شاء الله .

[ام صهيب]

اقتباسالمشاركة الأصلية كتبت بواسطة ليبيةالله يعطيك الصحة جبتيها في خاطري

ياريت كانت الخطوات مصورة باش زبطت الفكرة اكثر

يعني الشريحة تحطي الحشو فيها وبعدين اتطبقيها على اثنين

سؤال : ماتطلعش الجبنة لما تقليها منها؟

والله ماخطر على بالى انى انصور الخطوات انت لما الشريحة ادقيها تتوسع نحط الحشوة وانطبق على اثنين
لما تتغطس كويس فى الدقيق والدحى والخبزة لالا ما تطلعش وتبدا فى الداخل دايبة وتهبل



اقتباسالمشاركة الأصلية كتبت بواسطة أم يمنىشكلها حلو , بس يانارى صخفنى الضرب المبرح للدجيجة يانارى , ولا يهمك مادامها طلعت حلوة اضربى , جارى التطبيق , ويسلموا ايديك , وربى يقومك بالسلامة ان شاء الله .
ههههههههه اهو فشيت غلى فيها

الله يسلمك
صحيتوا على المرور