[ العصيدة ] من مطبخ ام يمنى

**أم يمنى** · 10-01-2011, 09:53 AM

اليوم فقت الصبح وفى بالى العصيدة
, طبعا احنى عندنا الساعة 9 , وانتم فى سابع نومة الساعة 7 الصبح,
خشيت المطبخ وهذه مقادير عصيدتى ( وهى متشابهة فى أغلب البيوت )
المقادير :
3أكواب مية
3أكواب دقيق
شوية ملح
الطريقة :
نأخذ الطنجرة ونحط فيها كوبين مية , وشوية ملح خليها تغلى وبعدين ننقص النار , وصب الدقيق ونحرك بالمغرف ( طبعا كلكم تعرفوه) حتى تتماسك العجين وننزلها من ع النار ونحصرها فى زاوية ونبدأ نعصد ونعصد ونعصد نين ندهش , ونردها ع النار , ونضيف الكوب الثالث وننقص عليها وخليها نين تنشف منها المية , وننزلها ثانى مع اضافة شوية زبدة , ونحرك ونعصد , ولما نحسها خلاص شدت ونسمع تطربق تحت المغرف , نوقف ونأخذ نفس , ونكون مجهزة الصوانى مدهونات بشوية زيت , ونكركبها ونواسيها ع هيئة دائرة , ونصب عليها زيت ورب , وصينية زوجى فيها زيت زيتون بس , (يحبها هكى ) وان شاء الله نكون وضحتها وبالهناء والشفاء.

**أم يمنى** · 10-01-2011, 10:02 AM

يابنات سامحونى , خذيت روحى بالعين , نبى ننزل الصور الثانية متع عصيدة الزيت الزيتون بس معندة معاى وتكررت الصور هاذى , أكيد بتكرهوها العصيدة توا . وأول مرة تعلمت كيف ننزل الصور فى صفحة وحدة , ولكن لما جيت بنحذف اللى تكرر , ماجيتش معاى , أسفة جدا

**ناني2007** · 10-01-2011, 11:00 AM

ماشاء الله عصيدة تجي في الخاطر ...يسلمو ايديك يارب

**ليبية** · 10-01-2011, 12:23 PM

ماشاء الله الله يسلم ايديك على هالعصيدة صحة ليك ولزوجك

**ام صهيب** · 10-01-2011, 12:50 PM

سلم الايادى

والله انا مانعرف انديرها طريقتك واضحة وحلوة

**أم يمنى** · 10-01-2011, 01:57 PM

مشكورات ع الردود , يا أم صهيب جربيها مرة , تتعلميها , وتبدأ كل ماتجى ع بالك تخشى الكوجينة , وتديريها , والاحلى لما تلقى الكل مخلص عليها والصونية قاعدة سخونة .

**تجويد** · 10-01-2011, 02:11 PM

تسلم الايادي نفس طريقتي ساهلة وحلوة ولاتجيك يابسة ولا رطبة تجيك عصيدة امبدعه على قولت راجلي هههههههههههههه ؛ وبالنسبة للاخت اللي قالت ما تعرفش اديرها تجرب هالطريقة وتجرب بالمق متلا نفس الشئ وبعدين تبدأ تزيد اني مكيلة في كل مق شخصين وجربي وقولينا .