[استفسار]عن صبغه لتلوين الكيكه بعلم الاستقلال

[روح مغتربه]

السلام عليكم اخواتي
ياريت الي تعرفه اي ماده تستخدم لصبغ الطعام بلون الاسود اتقولي لان نبي اندير كيكه بالوان العلم ومحصلتش صبغت طعام سوده ونبي بديل ليها واذا كانت متوفره في طرابلس اقولي مكانها بتحديد

[زينب محمد]

حبوبة اللون الاسود غير متوفر

انامن بداية الاحداث وانا ندور ومحصلتش

ان شاء الله تفيدنا واحدة من الاخوات

[روح مغتربه]

بارك الله فيك يا ابله زينب وان شاء الله وحده من الاخوات ايكون عندها فكره

[أمـ ساره]

هو بشكل عام مازال فيه حاجات ناقصة بالسوق ما وفروها


لكن ان شاء الله لو قابلتني الصبغة باذن الله نقولك عليها

[ام صهيب]

السلام عليكم
والله ماعندى فكرة بس يمكن تستعملى العنب الاسود

او كان كريمة حطى الكاكاو الداكن والا الشوكولاتة السودا المرة تلقيها

[زينب محمد]

انا مفكرة نديرها بالكرز والعنب الاسود

حصلت الكرز الاخضر لكن الاحمر مش موجود

والفراولة مش وقتها ولو انه عندي المجمدة لكن حتنزل اميتها

والعنب الاحمر لونه مش زي اللون الاحمر للعلم

في التشيز كيك استعملت للوجه الرب مع الجلاتين حتى تحصلت على اللون الاسود

الشوكولاتة مع الكريمة يفتح لونها وتصبح بنية

[ام صهيب]

هدى بعتوهالى العيلة بمناسبة بيان شوفوا بالك تقدروا تعرفوا اللون من شنو متكون تحسيه زى المربى سوداء

[سحابه صيف]

انا درتها بشكلاته ومشي الحال

[أم يمنى]

مش لازم كيكة ديروها أكبر بيتزا وأعرضوها فى ميدان الشهداء , وليكن اللون الاحمر الطماطم , واللون الاسود الزيتون الاسود , واللون الاخضر فلفل حلو , هيا أنشطوا وديروها ,والله نتخيل فيها مربع كبير وملونة بلون العلم الاستقلال , ومعروضة والعالم كله جاى يصور فيها وناقليها فى التلفزيون , يوروا فيها وأنى ننادى فى راجلى وصغارى ونقوللهم : شوفوا هذا المنتدى متعى شوفوا الابداع , ونتصل بأهلى ونقوللهم شوفو ابداعنا , الله يسامحكم خليتونى نتخيل ونبكى .سلامتكم

[أم يمنى]

نتذكر فى الابتدائ لما نبو اللون الاسود نخلطوا اللون الاخضر مع الاحمر يطلع أسود , جربو خلطوا اللون اللونين الاحمر والاخضر مع العجينة ممكن تظبط ويطلع اللون الاسود , ولو أنى مانتخيل كيكة سوداء .