[ عاشوراء ] من مطبخ أم يمنى

**أم يمنى** · 10-08-2011, 12:20 AM

يابنات تعالوا ,

تتذكروا فى العاشوراء متع زمان , لما كنا صغار وفى الصيف

بعد ماتكمل المدرسة , فيه من صغار يقعمزوا فم الحوش ويحطوا قدامهم سفرة صغيرة ملونة

, وفيها حلوة بيضاء وفوقها حلوى ملونة , ويبيعوا فيها بطاسة شاهى , الطاسة بقرش ,
باهى , اليوم تذكرتها فى القايلة وقلت : خلى نفرح صغارى بيها , سألت راجلى كان يبى , قالى : مانعرفهاش , وهو من الزاوية المناضلة , المهم طيبتها .

واتصلت بجارتى قلتلها : تذكرى فى العاشوراء .
قالت : ايه متع زمان متع الطاسة بقرش .
قلتلها باهى شن رأيك نبيعهالك بخمسة قروش توا ,
فرحت وقالت : ياريت .
قلتلها : انتى فى الحوش .
قالت : لا فى المول .
تغايضت قلتلها : انتى تتدهورى , وبتأكلى العاشوراء ., والله ماك ذايقتيها .
وانى بنسكر عليها نسمع فيها تقولى : والنبى خليلى والله الا مروحة توا . المهم سكرت عليها .وبعتلها رسالة : أنسى الصفقة .
وطيبتها وكليناها , ولكن نكدت ونزلت دموعى غصبا عنى , تذكرت طفولتى فى منطقة (فشلوم )
الله قداش كانت حلوة أيام كنا صغار , ولما كبرنا كترث الهموم , الحمد لله , يلا نخليكم مع الصور والمقادير .
المقادير ::
كوبين مية
3ملاعق سكر
نخليهم فى طنجرة ع النار حتى يغلوا

نأخذ كوب مية وفيه 4 ملاعق طحين , ونحرك حتى يذوب الطحين
نصب كوب المية والطحين فى الطنجرة ونحرك ونخلى النار هادية ,

ولما نشوف فقاقيع ( حلوة فقاقيع ) يعنى بتكون طابت العاشوراء نضيف 2 ملعقة عطر ونحرك .
نصب الخليط فى السفرة الصغيرة الملونة ونخليها تبرد .
نزينها بالحلوى الملونة ونقدمها . بالهنا والشفاء

**ام بيلسان** · 10-08-2011, 12:29 AM

الله يرحم ايام زمان
بارك الله فيك ياعسل

**الساجدة لله** · 10-08-2011, 09:52 AM

شكلها قنين من يدياتك واهلييييين بكل اهال فشلوم والزاوية

**بنية بوها** · 10-08-2011, 05:46 PM

يسلموا الايادي دكرياااات حلوة في بلادنا

**سحابه صيف** · 10-08-2011, 06:05 PM

ماشاء الله يسلم ايدياتك اول مرة نسمع بيها وانشوفها

جي خاطري فيها لين عيوني طلعو فقاقيع هههههههههه

**أم يمنى** · 10-08-2011, 06:28 PM

تسلموا ع الردود ,
يعطيهالك ياسحوبة , ماتقوليليش منين تطلعيلى , فجأة نلقى فى ردك ونموت بالضحك , وفى كل مرة نفس الموقف , ربى يدوم عليك الهنى ياحنة , وهذه زمان كانوا أمهاتنا يديروا فيها , يزلبحوا فينا باش نلهو ونلعبوا .وهى حلوى للصغار .

**أمـ ساره** · 10-08-2011, 06:49 PM

ماشاء الله ام يمنى

شكلها ينادي ويقول كولوني

مع اني اول مرة نعرفها ونشوفها

سلم ايدياتك الحلوة وبالهني والعافية

**نمارق اسعد** · 10-09-2011, 11:55 PM

[frame="1 50"]الله الله علي ايام زمان يام يمني عليك ايام حلوة معادش تولي وغريبة الااخوات اللي مايعرفوش العاشورة اغلب الليبيين يعرفوها والله ذكرتيني كانت ايام ولن ترجع [/frame]