السلام عليكم
كيفكن إن شاء الله بخير؟
امس جا ع بالي مكرونة مبوخة اللي نحبها واجد وعجبتني كيف دايرتها اختنا زينب،
هذا رابط المكرونة لزينب محمد
http://www.libyan-kitchen.com/kitche...ead.php?t=2161

جا باتي ربي يحفظه وكالعادة سألني كان نبي شي وصيته على مفروم ومكرونة، فتحت المنتدى وتأكدت من المقادير لأني لما نجرب اي شي لأول مرة نحب نلتزم بالمقادير وبعدها نغير على حسب مانا نبي.. المهم كتبت كل شي في ورقة ودركت ع الكوجينا

بديت بالمكرونة كسرتها وحطيتلها المية والزيت والملح وحطيتها في الكسكاس



بعدها في طنجرة ثانية حطيت الزيت وعليه المفروم وخليته دقايق نين يتغير لونه ورشيت عليه الفلفل الاسود



بعد شوي حطيت عليه البصل وخليته يذبل



بعدين باقي البهارات والطماطم والملح وحطيت اميا وكثرتها شوي عشان نسقي منها المكرونة



بعد نص ساعة قلبت المكرونة وسقيتها بالمرق متاع المفروم ورديتها ع النار لنص ساعة اخرى
بعدين تميت نبي نحط البهارات ع المكرونة كان عندي كل شي مش مطحون طحنت من كل شي شوي وحطيتهن ع المكرونة مع السمن بعد طابت ورفعتها من الكسكاس
بوقتها جا خوي ربي يخليه ليا واستعجلني بالغدا نا كنت نبي ناخذ وقتي بيش نكسد وناخذ الصور براحة بس ما صار شي
المهم المكرونة طلعت طعمتها سمحة
بس طبعا اختي الصغيرة لازم تنقد كل شي (ما يعجبها العجب) قالتلي ليش ما فيهاش حمص (لأننا متعودين انديروا فيها بتقلية الحمص) وبعدين قالتلي مش حارة (لأني ما حطيت فلفل احمر بودرة ماكانش عندي)، بس مع الاخير كلت منها نين شبعت، صحتين على قلبها..
هذا شكلها بعد حطيتها ع الغداء





ان شاء الله تعجبكن .. بالهنا
تسلم ايديك اختي زينب