[طاجين جبن بالفاصوليا ]من مطبخ شاطئ بلا رمال

**شاطئ بلا رمال** · 10-14-2011, 06:47 PM

مساء الخيرات على الحبوبات

اليوم درت طاجين جبن بالفاصوليا ( طبيخة فاصوليا ) الفاصوليا اليابسه، فاضله عندي من يوم أمس نوعها طيابه وقنينه قلت حرام تتلوح وأني ضد الكفر بالنعمه، فقلت نجرب ندير بيها طاجين ونصوره وكان جي قنين انزله لبنات المطبخ الليبي، الحق عمري مادرتها طاجين جبن وأكيد فيه هلبه يديرو فيه هو معرف عندنا لكن مايديروش فيه ديما وجي روووعه فقلت لازم إنزله على طول
نبدو بسم الله
على بعضه حطيت
2 حبة بطاطا متوسطه ومقطعه مكعبات ومقليه في الزيت

1 راس بصل كبير مقطع مكعبات ومقلي في الزيت شويه أقل من دقيقه يادوبك

طبيخة الفاصوليا وكميتها نفس كمية البطاطا تقريبا

أعشاب عندي في الفريز شوية ( معدنوس وكسبر وشبت ) مفرومه وفيه اللي مايحبش نوع معين يلغيه

1 م ص حرارات ( خلطة توابل ليبيه)
فلفل أحمر حار حسب الرغبه
1/2 م ص بزار ( كركم)
1/2 م ص فلفل أكحل
2 م ك دقيق
1/2 م ك بيكنج باودر
5 بيضات

وبعدين خلطه
وزدت عليه 2 م ص معجون طماطم لأنه حسيته لونه فاتح
وزدت عليه 2 م ك خبزه مرحيه لأني حسيت الخليط جاري هلبه

وخلطت كويس وصبيته في الطاجين من غير ماندهن الطاجين لأن طاجيني ما يلصقش

ودخلته الفرن على 180 درجه لمدة 1/2 ساعه تقريبا
لما تحمر من تحت دخلت فيه عود اسنان طلع جاف يعني طاب وشد ( نفس أختبار الكيكه )
فتحت عليه من فوق النار شويه
ولو تبي إضيفي على الوجه أو مع الخليط أي نوع جبنه تحبيه ممكن بس أني درته من غير جبنه

وبعدين إتطلعيه وتخليه يبرد شويه قبل ما تقصيه باش ما يتفرشش
وهذي طريقتي والله جي قنين ما شاء الله ومش باينه فيه الفاصوليا مغطيه عليها الأعشاب والتوابل، وخفيف وناعم إمممممم

وألف صحتين على قلوبكم
نستنى في تطبيقاتكم
وهذي لأول وحده ترد

**أمـ ساره** · 10-14-2011, 07:03 PM

ماشاء الله حبوبة شكله بنة وصنة

والفكرة حلوة والله واني من محبي الفاصوليا هلبببببببببببببة

ربي يسلم ايدياتك الحلوة يارب

وبالهني والعافية على قلب كل من كلاه

**نحلة** · 10-14-2011, 07:30 PM

السلام عليكم

مساءك أسعد يا حبوبة ،، فكرتك بجد روعة و اقتصادية و بدل ما تتلوح النعمة نستغلها في شئ نستفيد منه ، و تطلع شئ لذيذ و شهي تكون وجبة ليوم ثاني // سلمت افكارك و يدياتك ،،

تحياتي

**بنت طبرق** · 10-14-2011, 09:58 PM

ماشاء الله ابداع الحق
تسلم ايدياتك عزيزتي

**تجويد** · 10-14-2011, 10:57 PM

ما شاء الله تسلم الايادي واني عجبتني الصورة الاولى متع البطاطا اللي في القفة شكلها كانها حق في القفة .

**Moony heart** · 10-14-2011, 11:03 PM

مشكوووووور والله يعطيك الف عافيه

**أم أيوب** · 10-15-2011, 01:06 AM

يسلموووووووووو ايديك فكرة حلوة

حسيته أقرب للعجة أو كيك الخضرة زي ما نسموا فيه

**امتنان** · 10-15-2011, 04:21 AM

يسلمو روعة

**الساجدة لله** · 10-15-2011, 09:47 AM

تسلم الايادي ياغالية انا ندير فيه الطاجين هذا بس الفاصوليا تكون مصفية من اي مرقة او ماء يعني جافة بس هذه الفكرة متاعك روعة خصوصا اني من مدمينيين الفاصوليا

صحة وهنا على قلوبكم