[ بريوش طري وخفيف ] من مطبخ saliamr

**saliamr** · 10-22-2011, 05:37 PM

السلام عليكن

الف مبروك علينا التحرير والحمدلله ان ربي خذ حقنا من الطاغي وعياله

وبهالمناسبة حبيت اندير بريوش ونخليكن تذوقنا معاي،

بصراحة الطريقة وخذتها من النت ومش متذكرة اسم صاحبتها

بس من يومها وانا معتمدة المقدار هذا جزاها الله كل خير

الطريقة تبي شوي وقت بس النتيجة روعة ، لأني نحب البريوش

موت، بجد البريوش اللي درته كأنه بريوش السوق يعني من الأخير

نبدوا بالمقادير:

4 كوب دقيق منخول

200 جرام زبده أو مرجرين

2 ملعقه كبيره سكر

معلقه صغيره و نصف خميره

كوب و ربع حليب سائل طازج

بيضه

نص ملعقه صغيره ملح

نجوا للطريقة

طبعا كيف ما قلت تاخذ شوي وقت، نا خذت مني 5 ساعات

بس مش متواصلة توا تعرفن كيف

نخلط المقادير الجافه مع بعضهن ( الدقيق و الملح و السكر

و الخميره )

بعدين نضرب الدحية ونحطها عليهن وبعدين نزيد الحليب

ونعجنوا كويس نين يختلطوا مع بعض وتقعد عجينة متجانسة

نقطع 100 جرام من الزبدة يعني نص الكمية قطع صغيره و نحطها عالعجين

ونعجنوا بخفة ومش ضروري تختفي الزبدة بشكل كامل،

وحتكون العجينة طرية

نسيت ما صورتش الخطوات الاولى

لما تعجنيها نخلوها اتريح 45 دقيقة بعدين نحطوها في الثلاجة

لمدة 3 ساعات او تقدري تحطيها ساعة ونص في الثلاجة

وساعة ونص في الفريز لو انتي مستعجلة وهذا اللي درته

هذي صورة للعجينة بعد ما تريحت

بعدين نفردوها مستطيل كبير ونرشوها بالدقيق من فوق

ونقطعوا باقي الزبدة قطع صغيرة ونحطوها على ثلثين العجينة

وبعدين
نطويها كيف ماهو باين في الصور

اخر شي نفردها من جديد مستطيل ونطويها ونحطوها في

الثلاجة نص ساعة او الفريز ربع ساعة، والحق نا حطيتها

في الفريز

نكرر الخطوة هذي 4 مرات يعني كل مرة نفردها ونرد نطبقها

ونحطها في الفريز

اخر شي نفردها مستطيل كبير ونقطعه مثلثات ونشقوا القاعدة

من الوسط، الصور توضح

توا تقدري تحشيها بشوكلاطة ولا عسل ولا سادة تخليها كيف

ما درت لأني نحب نحشيها بشوكلاطة سايلة وتلف من القاعدة

للطرف ونحطوها في طاجين مدهون بزيت

و تخليها تخمر لمدة ساعة، وهذا شكلها بعد خليتها تخمر

قبل ما نحطوها في الكوشة ندهنو بحليب مركز

نحطوها في فرن على حرارة متوسطة وبعد تنشقر من تحت

نولعوا النار من فوق وهيا دقايق وتتحمر مع بعضها،

نا حسيتها تحمرت شوي

وهذي بريوشة مع كابتشينوا لأول وحدة ترد ^_^

تاخذ وقت بس النتيجة تستاهل

وصحتين على قلوبكن

**أمـ ساره** · 10-22-2011, 05:53 PM

ماشاء الله بريوش يجي في الخاطر حبيبة

سلم ايديات الحلوة الي داراته

وبالهني والعافية على قلب الي كلاه

وأحلى تقيييييييييييييييييييييييييم

وينقل لركن السندويشات والمعجنات

**الساجدة لله** · 10-22-2011, 06:14 PM

تسلم الايادي ياغالية بريوش يجنن

**خدوج** · 10-22-2011, 07:20 PM

بريوش سمح
يسلم ايدياتك
وعجينته تشبه العجينة المورقة ومن زمان ندور فيها
بس ياريت تشرحيلى طريقة طى العجينة بعد ماتفرديها
لانك طويتها من جهة وحدة والباقى مافهمته
ولك خاص شكرى وامتنانى
وتسلم ايديك

**بنت طبرق** · 10-22-2011, 08:06 PM

ماشاء الله تبارك الرحمن
بريوشات من الاخيييير بكل
سلم ايدياتك

**سحابه صيف** · 10-22-2011, 09:30 PM

روووووووووووووووووعه بارك الله فيك

ويسلم ايدياتك

**بنية بوها** · 10-23-2011, 03:53 AM

يسلموا ايديك اممممممممممممم بريوش

**ام عبدالمعز** · 10-23-2011, 01:19 PM

امممممممممممم النتيجة روعة

يسلمو ايديك ياحبيبة

وبانتظار جديدك بكل شوق

**saliamr** · 10-23-2011, 02:02 PM

شكرا على ردودكن وتسلمن
ام سارة، الساجدة لله، بنت طبرق، سحابة صيف، بنية بوها، ام عبد المعز

**saliamr** · 10-23-2011, 02:27 PM

المشاركة الأصلية كتبت بواسطة خدوج

بريوش سمح
يسلم ايدياتك
وعجينته تشبه العجينة المورقة ومن زمان ندور فيها
بس ياريت تشرحيلى طريقة طى العجينة بعد ماتفرديها
لانك طويتها من جهة وحدة والباقى مافهمته
ولك خاص شكرى وامتنانى
وتسلم ايديك

تسلمي خدوج على ردك
بالنسبة للعجينة بعد حطيتي الزبدة على ثلثينها تطوي الثلث اللي ما فيش زبدة على ثلث فيه زبدة وبعدين تطوي الثلث الثالث فوقهن وتفرديها مستطيل من جديد بعدين طبقيها كيف ما درتي في الاول بس تزيدي عليها تطبيقتين اخرى
حسيت اني لخبطتك ^_^ المشكلة اني دورت الصور نبي نشوف بلكي مصورة الخطوة هذي لقيت المجلد محذوف بس ان شاء الله كي انديرها مرة اخرى توا نصورها
بالنسبة للمورقة عندي طريقة لها حلوة وساهلة وتطلع معاك العجينة رقيقة ورطبة وان شاء الله توا انديرها ونحطها لك قريب