[ سابليه بعجينة الباف وكريم باستيير ] من مطبخ أم طه(أيوب)

**أم أيوب** · 10-26-2011, 12:48 AM

السلام عليكم ورحمة الله وبركاته

كيف حالكم يا غوالي

اليوم كان عيد زواجي الرابع قلت نبي نغير عن فكرة الجاتوه زي كل سنة

عندي عجينة باف باستيري او ميل في ومن فترة شفت برنامج

حورية المطبخ دارت وصفة بس كانت مالحة

خديت الفكرة وجربتها حلو وطلعت رهيبة والله

الطريقة اني خديت عجينة الباف وفردتها بشوي دقيق وقطعتها دوائر

ونص الدوائر درت فيه فتحة من الوسط بالضبط زي فكرة سابليه المربى

خديت دحية وفصلت الصفار عن البياض

خلطت الصفار مع ملعقة صغيرة سكر ورشة نسكافيه وملعقة حليب

دهنت بيه الدائرة اللي مش مفتوحة تمام ؟؟؟؟؟؟؟؟؟؟؟؟؟

وحطيت عليهم من فوق الدائرة المفتوحة ودهنتها حتى هيا بخليط البيض

رصيتهم في طاجين مدهون زبدة

وحطيتهم نص ساعة في الفريز وسخنت الفرن كويييييييس

وحطيتهم على حرارة 180 ممكن خدو ربع ساعة الى ثلث ساعة لعند ما تحمرو من تحت

حمرتهم من فوق حاجة بسيطة بعدين طلعتهم بردوا شوية

من الوسط تلقيها العجينة انتفخت اضغطيها لتحت باصبعك

جهزي كريم باستيير وطريقته باختصار

كوب حليب مع صفار بيضة وفانيليا وسكر حسب ما تحبي وملعقتين نشا

مع بعضهم في الخلاط بعدين عالنار وملعقة صغيرة زبدة

قلبي لعند ما يتماسك لو تبيه خفيف زيديه شوي حليب بس هنا لازو ما يكون غليظ

توة نردوا للفطائر

نملا الفراغ اللي وسط الفطيرة بكرييم باستيير بعد ما يبرد شوي

والزينة من فوق زي ما تحبي

أنا زينتها بشوكولاته نوتيلا

طعمتها تجنن غير عادية

وهذي صورة الطبق

**بنية بوها** · 10-26-2011, 04:02 AM

ياعيني ياعيني كان خليتولي شي معاكم حتى طريف بس عشان رديت اول وحدة
انشاءالله العمر كلا صحتين علي قلوبكم وبنية بوها حطتها في راسها فانتظرري تطبيقي
شكلها راااااااااائع

**بنية بوها** · 10-26-2011, 04:04 AM

ام ايوب حبيبة ممكن طريقة العجينة كان تعرفيها

**أم أيوب** · 10-26-2011, 12:22 PM

المشاركة الأصلية كتبت بواسطة بنية بوها

ياعيني ياعيني كان خليتولي شي معاكم حتى طريف بس عشان رديت اول وحدة
انشاءالله العمر كلا صحتين علي قلوبكم وبنية بوها حطتها في راسها فانتظرري تطبيقي
شكلها راااااااااائع

سلمها يارب وخليها ليا

صحة على قلبك يا عسل

نراجي في تطبيقك ليها

**أم أيوب** · 10-26-2011, 12:23 PM

المشاركة الأصلية كتبت بواسطة بنية بوها

ام ايوب حبيبة ممكن طريقة العجينة كان تعرفيها

حبوبة العجينة جاهزة أكيد تلقيها في السوبر ماركت

عجينة الباف باستيري أو ميل في

هي في اللي يحضروا فيها في الحوش بس عمري ما درتها

نوعية العجينة هادي ياما تديري بيها أشكال وانواع مالح وحلو

توة ندور طريقتها ونبعتهالك يا عسل

بس لو تاخديها جاهزة أريحلك

**أمـ ساره** · 10-26-2011, 03:04 PM

ماشاء الله لا قوة الا بالله

يا أم الأفكار انتي طريقة حلووووووة

نازكة وأنيقة والله ربي يسلم ايدياتك الحلوة

والعمر كله ان شاء الله يااااااااااااااااااارب

بالهني والعافية على قلوبكم

**ام بيلسان** · 10-26-2011, 05:42 PM

ماشاء الله روعة
يسلموا ايديك يالغالية

**امتنان** · 10-28-2011, 06:46 PM

يسلمو الايادي

والله يعطيك العافية

**ام تغريد** · 10-28-2011, 10:14 PM

ان شاء الله العمر كله وكل عام انشوفو تشكيلة جديدة وياريت ياحبيبة تقوليلنا من وين اشريتى العجينة بالزبط

**Narjes** · 10-28-2011, 11:03 PM

يسلمو ايديك حلوة اتجنن
هالعجينة حلوة هلبة و فيها هلبة تطبيقات
و بصراحة اني نستمتع لما نعجن فيها في الحوش لانها تبي الطوي اكثر من مرة و في كل مرة او مرتين لازم ترتاح في الفريز
و النتائج ديمة روعة ......
و هي عبارة عن مق دقيق و ملعقة زبدة و رشة ملح و ماء مثلج و يبدا العمل فيها فورا من غير ما ترتاح و لازم ميكون عندنا قالب زبد مجمد في الفريز نحطه في كيش نايلون مقصوص و نحاول نضربه حتى ينفرد و يعطيني حجم 2\3 العجينة اللي عندي بعد فردها حيث نوضع الزبدة علي 2\3 العجينة ويبقى الثلث الاخير من دون زبدة و بعدين انطبقه على الجزء اللي فيه الزبدة و يقعد الجزء الاخير اللي عيه ثلث الزبدة حتى هو انطتقه
النتيجة تكون (عجينة , زبدة, عجينة, زبدة, عجينة)
ونكرر هذي العملية ستة مرات مع مراعاة عدم ترك الزبدة تسيح
و صحتين على قلوبكم

الموضوع: [ سابليه بعجينة الباف وكريم باستيير ] من مطبخ أم طه(أيوب)

أدوات الموضوع

عرض

[ سابليه بعجينة الباف وكريم باستيير ] من مطبخ أم طه(أيوب)

معلومات الموضوع

الأعضاء الذين يشاهدون هذا الموضوع

المفضلات

المفضلات

ضوابط المشاركة