خدوجة في الأول الف مبروك على بنت اختك ربي يهنيها
العقبة لعويلتك تفرحي بيهم
شوفي حبيبة لو كنتي ناوية تطيبي تطييب يعني سفرة والجو هذا
أنا ما نحبش نكثر ياما حاجات
ندير رز بالبصلة ولحم كبار معاهم شريبة عربية مقومة ومصارين شحم
وبطاطا مبطنة ولو تبي تزيدي بوريك يعني أكل تقليدي ودير ي ثلاثة أنواع سلاطة
بعد العشي فاكهة وشاهي معاه نوعين كعك أو مكسرات وفي الغالب المكسرات
ماحد ياكلهم بعد العشاء ....
لو تحبي عزومة عشية يعني موالح وحلويات أنا نحب المخطط التالي :
قدميلهم العصير ومعاه شكلاطة نوع حلو
القهوة أو النسكافيه أنا نفضل معاه قطعة تورتة في الحوش صنع ايديك
أفضل من الحلويات القطع وصدقيني يحبوها وياكلوها
صحن الموالح تقدري تقدمي فيه فلفل روسي ( كفتة دجاج في حلقات فلفل حلو تبطنيخا وتقليها )
ممكن بوريك سلق وجبنة ( نموت عليه وعمري ما رديته في عزومة )
ممكن تديري كفتة لحم في اسياخ الخشب وتزينيها بالخيار والطماطم والزيتون
بطاطا مبطنة ومعاها موساكا ( بطاطا مقلية مع بادنجان عليهم عصاج مفروم وبشاميل )
الموساكا تحطيها في قوالب القصدير المدورات الصغار ( بعض الناس في المناسبات يحطو فيهم المسير )
بيتسا تكون مميزة ومليانة وممكن تقدمي معاهم سندويشات شاورما
الموالح مع مشروب غازي والشاهي معاه نوعين كعك ومكسرات
والفاكهة نحبها فروت سالات أفضل منها صحاح ديريها باللوز والعسل
الهدية نحن من عادتنا العروس تردي معاها ذهب بس توة الذهب غالي نار
لو تبي تاخديلها خاتم كويس سعره فوق 500 دينار (( زوجي تاجر ذهب وعارفة الوضع ههههه ))
ممكن تاخديلهم اي تحفة حلوة ومميزة تكون كريستال فخم
أو عطر يكون مميز وراقي لو تبي نعطيك اسم
أو ممكن تاخديلهم سفرة فضة نوعية اصلية حلوة
او تعطيهم فلوس وهم يختاروا على دوقهم
يارب نكون ما قصرت معاك خدوجة واي استفسار جاهزين
المفضلات