السلام عليكم ورحمة الله وبركاته
ما شاء الله نسوينات المنتدى ما قصروش ربي يخليلهم صحيتهم
انا فهمت م كلامك خدوج أن العزومة في العصرية يعني لازم تون الحاجات نازكة وخفيفة
طبعا أنا بنحط نفسي مكانك لو أنا شن نندير
اول شئ أكيد العصير والشيكولاته
بعدين كابتشينو وتورتة أو كيكة بالكريمة أو فطيرة تفاح المهم حاجة من حاجات الكابتشينو تكوني موتيتها من اليوم اللي قبله ومريحة بالك أو كيكات جاهزة تشريهم من المحل أنتي وراحتك أو فضوتك
طبعا بعدين العشاء بما أنها قلنا خفيف بنطلعوا من الرز بلاو حكاياته وسلاطاته
بالنسبة ليا كنت حندير طريف دجاجة محمرة أو سكالوب وكنت حنتبع طريقة ديمة ندير فيها في رمضان نأخد لحم دجاج ونرحيه مع التوابل وهو نئ بعدين ناخد السيلفر ونطح فيه هاداكا الدجاج ونكون موتية اوراق سلق مدبلتهم في النار مع شوية ثومة وتوابل وزيت ونطرحهم على صدر الدجاج ونحط فوقهم جبنة الشرايح وبعدين نلفه زي السويسرول ومانخليشي طويل باش نقدر نقليه بعدين ونلفه ونسكره كويس بالسلفر ونحطه في الطنيجرة متع الكسكاس ونبوخه لين نطيب بعدين نأخده من السلفر ونحطه في دقيق ودحي وخبزة ونقليه وبعد ما يبرد نقصه حتى ما تهربش الجبنة صدقيني يجي بنته حلوة وشكله أحلى لما يكون الدجاج ملفوف في داخله ورق السلق والجبنة
وندير معاه بوريك بالجبدة أو العجينة المنتفخة بالمفروم أو السلق والجبنة أو بوق تن أو خبيزة محشية بالدجاج أو التن أو اللحم أو خبزة كسكاس محشية بالسلاطة وشيش طاووق متبليه قبلها بالليلة أو كفتة دجاج أو كبة أو كالوني او طاجين جبن بالفورمات ولو البال مش واس قصيه مربعات كبيرة أو فطيرة بداخلها كباب أو بيتسا وأنتي أختاري أو سليلة حارة
وبعدين الفاكهة تقدري تحطي للنسوينات فروتة أو تحطيها قطع وللرجالة لازم قطع ما تمشيش معاهم الفروتة وسليمتهم
بالنسبة للاضافات الروزاتة والعبمبر بدل المشروب والشكولاته أو البكلاوة أو المكسرات انتي وميزانيتك عاد لكن نحس فيها جية العصرية خفيفية والحاجات هادي ثقيلة نوعا ما
وللهدايا انا نحب العطر لو مكانك نهديلهم عطر راقي تكون ماركته معروفة وبدل ما نأخده 100 ملل نأخده 50 ملل هكي تكون هدية نازكة ومش مكلفة هلبة
نتمنى أني نكون أفدتك
المفضلات