[ الفاصولياء بالكرشة ] من مطبخ أم أيوب

**أم أيوب** · 10-30-2011, 12:15 AM

السلام عليكم ورحمة الله وبركاته

منورات صبايا المطبخ الليبي ويارب ديما المنتدى عامر بوجودكن

اليوم كان فطورنا فاصولياء بالكرشة أو زي ما يسميها البعض المثاومة

هالأكلة نحبوها وااااااااااااااجد خاصة لما تكون حااااااااااااااااااااااارة

طريقتي فيها كالتالي :

بصلة كبيرة مفرومة في ست البيت + طماطم معجون زي ما تحبي ( مانحبوهش يكون داكن )

كرشة خروف منظفة ومخروطة ومسلوقة نصف ساعة مع نصف ليمونة

ثلاث أو أربع قرون فلفل حاااار ( حسب الرغبة طبعا )

نص ملعقة صغيرة من ( فلفل أكحل + كمون حوت + كسبر حب محمس ومطحون + كروية )

ملح + كسبر أخضر مفروم حوالي ربع لفة + فاصولياء مطبوخة وممكن استعمال فاصولياء المعلبة

وأهم شي فيها الثوم ..... حوالي 6 فصوص كيار

الطريقة :

ناخدش الكرشة في البداية بعد ما سلقتها نص ساعة مع نص ليمونة

نحطها عالنار من جديد تغلي مع رشة ملح ونخليها تقريبا ساعتين

لو مستعجلة ممكن تحطي معاها ملعقة صغيرة بيكنج باودر تطيب اسرع

نقلي البصل في شوية زيت ونحط معاه الفلفل ونخليه لغاية ما يتحمر

نضيف الطماطم والثوم ونخليها تعقد كويس ( تسبك )

نضيف التوابل والكسبر المفروم

نضيف الكرشة بعد ما طابت وناخد شوي من المية اللي فيها ونحطها عالطبيخة

نحط الفاصولياء نخليها شوي ونرفعها من النار

وصحتين على قلوبكم

**خدوج** · 10-30-2011, 12:31 AM

صحتين على قلوبكم
خطرتيها فى بالى
ان شاءالله غدوة نغديهم بيها
يسلم ايدك ويسهل حملك

**أمـ ساره** · 10-30-2011, 12:44 AM

يعطيك الهني يا أم طه على الفاصوليا الفايحة

صنتها جت لعندي ياريتك جارتي حبوبة

تعرفي الفاصوليا ما عندي روح معاها وخاصة بالكرشة (( مع اني ما نحب الكرة ))

ابعثيلي منها راهو تقعد في خاطري

سلم ايدياتك حبيبة وبالهني والعافية على قلوبكم

**أم أيوب** · 10-30-2011, 01:09 AM

المشاركة الأصلية كتبت بواسطة خدوج

صحتين على قلوبكم
خطرتيها فى بالى
ان شاءالله غدوة نغديهم بيها
يسلم ايدك ويسهل حملك

صحيحة غداكم مقدما خدوجة

نورتي ياغالية

**أم أيوب** · 10-30-2011, 01:10 AM

المشاركة الأصلية كتبت بواسطة أمـ ساره

يعطيك الهني يا أم طه على الفاصوليا الفايحة

صنتها جت لعندي ياريتك جارتي حبوبة

تعرفي الفاصوليا ما عندي روح معاها وخاصة بالكرشة (( مع اني ما نحب الكرة ))

ابعثيلي منها راهو تقعد في خاطري

سلم ايدياتك حبيبة وبالهني والعافية على قلوبكم

والله لو كنتي بحدايا نبعتلك منها أم سوسو قبل حتى ماناكل

انا نموت عليها بالكرشة الفاصولياء غير هدا ما ندورهاش

سلم قلبك يارب وربي يقومك بالسلامة

بس شدي روحك لبعد العيد هههههههههه

نورتي حبيبة