طريقتي في تنظيف أمعاء الخروف

**نعومي نت** · 11-03-2011, 10:16 AM

السلام عليكم ورحمة الله وبركاته
العيد السنة هادي ليها نكهة جديدة إن شاء الله أعلاش لعدة أسباب كل أخت إتخش لموضوعي إتحط سبب يختلف عن التانية الاسباب هلبة ما شاء الله لين تحيروا المهم أني وأعوذ بالله من كلمة أني سر النكهة إني مش رايح نسمع اغنية كل عام وإنت بخير يا قايد ثورتنا يا بابنا الكبير يا حلم عروبتنا ((صح هكي الاغنية )) كنا إنشوفوا في الهلال وإنقولوا لا مش عيد نسمعوا الاغنية هادي خلااااااااااص ثبتت الرؤية
المهم حبيت من خلال طرحي لهذا الموضوع نحكيلكم علي طريقتي في تنظيف (( الدوارة )) أهم حاجة وتعتبر نقطة اساسية لازم الدوارة تكون سخونة بمعنى اول ما يطلعوها على طول ديري شغلك في الاول طبعاً تتنظف من الفضلات كوييييييس وبعدين إنحطوها في اميه سخونة لمدة 10 دقايق وبعدين إنطلعوا المعدة بعد ما نحطوها في الكسكاس باش تنزل أميتها ناخدوا موس و نبدوا بسم الله طبعاً الطبقة اللي في المعدة بالطريقة هادي تزال بسهوووووووووووووووولة وبعدين إنتي وشني تبي تستعملي لإزالة الرائحة أني نستعمل في الخل
المهم بالنسبة للمصاريين إنظفهم بالمية وبعدين إنحط فيهم شب مدقوق مش ناعم حبوب تعرفوا والله ما تقعد فيهم حتى حاجة بدليل لما تقلبهم باش ......... ما نلقاش حتى حاجة كل المادة المخاطية تنزل مع الشب يعدين مصمصيهم و صبي عليهم شوية خل وخليهم يتنقعوا شوية وشوفي النظافة علي أصولها بياض ناصع ولا بياض كلوركس جربوا الطريقة و مش راح تندموا بالعكس رايح تدعولي لانها ساااااااااااااااااااااااهلة وما فيهاش تعب بكل
وكل عام وإنتم بخير و صحة وسلامة

**79nana** · 11-03-2011, 10:52 AM

ان شاء الله عيد مبروك علينا وان شاء الله عيد بريحة الحرية والاستقلال
طريقة منعرفهاش قبل ولاكن الدنيا تعرفك الجديد اني ندير فيها بالسيفن اب والليم وتجي بيضة ولاكن الواحد يتعلم ويجرب ويشوف

ان شاء الله كل عام وانت بصحة وسلامة

**خدوج** · 11-03-2011, 11:12 AM

شكرا نعومى
طريقة جديدة عليا
ومن اسباب فرحة العيد
يكفى ان احنى حاسين بطعم الحرية وماعادش نحافوا
ويكفى ان معيدين مع المسلمين على سنة الله ورسوله عليه السلام
وان شاء الله يعم الامن والامان كل ربوع ليبيا
وكل عام وانتم بخير

**ام تغريد** · 11-03-2011, 11:17 AM

اولا كل عام والجميع بالف خير من غير بو شفشوفة طبعا العيد السنة هادي ليه طعم غير معيدين مع السعودية

ولينا اسبوعين عارفين موعد العيد مش حايرين زي كل عام والحمد لله

وعن غسل الدوارة متعودة على الخل والليمون والملح انظف لين روحي تطلع

والله مالقوا مادارولنا الاهذا العصبان الحق شقي وتعب

لكن السنة هذه خلي انغير تو انجرب طريقتك بالك اسهل ومنك نستفيد

وكل عام والجميع بخير

**guidona** · 11-03-2011, 12:03 PM

اولا كل عام وانت بالف خير ياحبوبه
وراح ندعيلك اكيد لانه طريقتك ساهله
وسبحان الله كل واحد وطريقته في التنضيف
واه انسيت عاد اني ليا سنين منسمعش لافي اغانيهم الثوريه ولا في عزاهم
والحمد الله بس حاسدتكم لانه عيدكم اكيد السنه هده احلي عيد تمنيت روحي في ليبيا لكن الله غالب

**مغتربة 7** · 11-03-2011, 03:11 PM

كل عام والجميع بخير
مشكورة نعومي على الطريقة حتى اني طريقتي التقليدية خرطي ونقعي فى الليمون والملح
ان شاء الله نجرب طريقتك
الله يجبر بخاطرك وعيد سعيد

**mnona** · 11-03-2011, 03:18 PM

عيدكم مبارك ان شا الله
بالنسبة لطرق التنظيف تختلف كل واحد وطريقته واني ليا 4 سنين متزوجة ونعاني من طريقة تنظيف الامعاء لاهل زوجي ( اني منحبش الشحم الزايد بكل ولا الدهون ) ومعظم الناس تموت فيه وللاسف منقدرش نعلق لانه مرات لو تعلقي علي حاجة يفهموك غلط فأهو ماشية بنفس طريقتهم وتبي الحق العصبان مافيشي بنة في العيد وخاصة اول يوم
عموما الباين عليها طريقتك قنينة لاني تبي الحق نكره حاشاكم طبعا الشحم ومنقدرش نهائي نتبننه ، بإذن الله نجربها في حوشي بعد العيد كان حياني ربي

**ايمان** · 11-03-2011, 03:52 PM

انا بنفد طريقتك ونجربها تسلمي حبيتي عالافكار

**الساجدة لله** · 11-03-2011, 06:35 PM

طريقتك في الشب جديدة عليا الحق اما لقطة الماء المغلي مدايرتها بس ماخليتاش 10 دقايق لالا تواني لان الكرشة اطيب لو تقعد اكتر من دقيقة , اما طريقتي في التنظيف هي بالصابون والوراكينا تم بالخل باانواعه والملح والليم لين تستشهد تحت يديا الكرشة هههههههههههههههه والخرط طبعا بيكون اولا تم المنظفات
تسلمي ياغالية على الطريقة وان شاء الله نجربها للمصارين الرقاق خصوصا اني نحب نديرهم مرقاز