[تطبيق ]مقروض الوردة للأخت ام سجى من مطبخ saliamr

**saliamr** · 11-11-2011, 12:24 AM

السلام عليكم
كيف حالكن؟ ان شاء الله بخير؟
قررت نتحدى المقروض وبأول مرة ماعجبنيش واجد بس كان لا باس بيه، هالمرة قلت نجرب طريقة ام سجى وهذا رابط موضوعها
http://www.libyan-kitchen.com/kitche...read.php?t=775

الحق معش عرفت كلمة مالقي اللي مذكورة بالمقدار يعني كباية والا مق، بس توكلت على الله وقست بالكباية العادية وضاعفت المقدار 3 اضعاف وخلطته وخليته قريب 13 ساعة وبالليل كورت التمر وبديت نلف في المقروض اللي حسيته ضبط معاي خير من اللي فات، بس مازالت المشكلة في النقشة ماضبطتاش معاي كويس كيف ما دايرة ام سجى ماشاء الله عليها، بس الكل قالي انه جاي احسن من اللي فات، بس اختي ماحبتش نكهة مية العطر لأننا مش متعودين عليها.
المهم هذي صور المقروض وياريت ما تديرن مقارنة بالأصل لأن الفرق كبير وان شاء الله يعجبكن

وهذي صورة خذيتها بدون الفلاش عسى ولعل النقشة تبان

بالهنا

**الساجدة لله** · 11-11-2011, 12:44 AM

تسلم ايديك ياغالية وتطبيق مميز وان شاء الله كل ماتجربيه يزبط معاك اكتر والمالقي هو زي الابريق متع الماء النايلون متع زمان اللي لونه اصفر وازرق واحمر ومقداره باللتر واحد لتر

**مغتربة 7** · 11-11-2011, 12:48 AM

ماشاء الله تبارك الرحمان
تطبيق فى غاية الروعة
تسلم ايديك وايديات ام سجى
وصحتين على قلوبكم حبيبة

**saliamr** · 11-11-2011, 03:32 AM

المشاركة الأصلية كتبت بواسطة الساجدة لله

تسلم ايديك ياغالية وتطبيق مميز وان شاء الله كل ماتجربيه يزبط معاك اكتر والمالقي هو زي الابريق متع الماء النايلون متع زمان اللي لونه اصفر وازرق واحمر ومقداره باللتر واحد لتر

الله يسلمك عيوني، ياريتني سألت قبل لا ندير لأني حطيت كمية السكر وال p.b. على حسبة الكباية مش الكاس وحسيت انهن واجد خاصة ان المقروض طلع حلو بس نحسابه المفروض يكون هكي

بس اهو توا عرفنا كلمة جديدة والمرة الجاية توا ناخذ بالي

تسلمي على مرورك