نتف الحاجبين

**snaaaa** · 11-11-2011, 09:52 PM

اخواتى حرت فى امرى ونبي رايكم اانا اعمل التشقير لحواجبى وفى الايام الاولى تبان حلوة وبعدين تتغير للون الاصفر زى الشييب وبديت انفكر كل النساء اومعضمهم ينتفو فيهم بالرغم من التحريم فى مسهم وكنت نبحت فى الانترنت ولقيت حتى التشقير فيه تغيير لخلق الله منهم من قال للمتزوجه يجوز لها شنو رايكم ساعدونى نبى نتبت وما نبيش انمسهم منى زينى اشجعنى وخاصتا فى وقتنا وين ما اتشوفى تلقى الحواجب ايغيرو ويجملو الوجه

**مغتربة 7** · 11-13-2011, 06:40 AM

اهلين حبيبة نصيحتي ليك راك اتمسيهم خليهم على حالهم ومعاش تفكري فيهم بكل
اني الحمد لله حواجبي ما انمس فيهم بكل وليا سنتين اندير فى التشقير صح هو مش مية مية لكن يمشي الحال والحمد لله سئلت عليه عادي مافيشي مشكلة
وبالنسبة فى هلبة اخوات ينمصوا ان شاء الله ربي يهديهم بس هذا مش عذر اني حتى اني اندير زيهم وفى الاخرة كل واحد ربي يحاسبه على نفسه نصيحتي ياغالية راك تمسيهم
اني حواجبي غلاظ هلبة والله ما انعدل عليهم ولا يغريني احد ربي يثبتك يارب..

**snaaaa** · 11-13-2011, 10:19 AM

بارك الله فيك حتى انى غلاض ومرات لما حدايعلق عليهم انحسه وان شاء الله ربي ايتبتنا بارك الله فيك وياريت من يقدر ايفيدنا لانى القيت فى البعض يتكلم على استباحه انتف للزوجه من اجل زوجها والله اعلم

**التا ئبه لله** · 11-13-2011, 12:05 PM

السلام عليكم

حتى انى نفس راى الاخت مغتربه والله حتى انى

مضيقينى والمشكله كتيفات هلبه وما فيش حل الا تشقير صح من الاول حلو بعدين يتغير لونه

الحمد لله اهم شى طاعة الخالق وربى تبتنا على طاعته

**الساجدة لله** · 11-13-2011, 12:47 PM

تبو الحق حلاوة المراء في حواجبها الغلاظ مانعرفش علاش نحسهم يعطوها براءة ويصغرو في العمر انتو لوتلاحظو حتى الموضة العالمية بدت في الحواجب الغلاظ وحاجة التانيو انا نشوف في اللي ياسبحان الله مدايرة حواجبة باتاتو تقولي شيطان اعودو بالله حتى العين ماترتاحلهاش بس تعالي للحواجب الغلاظ تلقي حتى العين ماتتاداش من شكلهم وربي خلقهم اكيد فيهم عبرة وليهم فائدة

**snaaaa** · 11-14-2011, 08:21 AM

بارك الله فيكم اخواتى مغتربه والتائبه لله والساجده لله

**خدوج** · 11-14-2011, 10:08 AM

اختى سناء
من يومين كتبت رد طويل وعريض
فرحانة ندير ارسال وتطلع الصفحة بيضاء
انقهرت
المهم طاعة ربى ورضاه اهم شى
ولازم تعرفى ان هذه من الفتن ومن الشيطان (اللى تخلينا نتوسوس ومانرتاح لين نديرو حاجة وتكون ذنب)
فتوكلى على الله واستعيدى من الشيطان وماتهزقش وسواس الشيطان ديرى تشقير
وارسمى فوقهم بالبنى الغامق تبدى ماشاء الله وماتكتريش تشقير
خليها على رغبة زوجك وفى المناسبات
وربى يتبتنا على طاعتة
وانى مانمسش فيهم (فى السنتين الاولات لمن تزوجت بس وماعنديش فكرة انه حرام)
بس توا ن قسما بالله لاتشقير ولانتف ومستريحة عالاخر
واللى يشجعك انى عندنا هلبه ماينقوش فيهم
والحمد لله