[ دعوة للاجابة والاستفادة ]ما هو أكثر جهاز من اجهزتك المنزلية أستفدتي منه أو ندمتي على شرائه؟

[mony]

السلام عليكم
حبيت نشارك معاكم بالاجهزة الموجودة عندى
غسالة اتوماتيك ممكن ليها عندى 7شهور وما ارتحت لين شريتها فعلامريحة ماركة دايو
وميكروويف مريحنى فى التسخين وتدويب المجمد ماركة ال جى
طاقم ست البيت فيه 3قطع مفرمة ومضرب الشربة ومضرب الكيك فسدو مفرمة بس تخدم ماركة هومر
واشريت مضرب الشربة بروحه ماركة هومر يساعد فى رحى الشربة والفروبى والعصير وماكينة التوست لتسخين التوست والكرواسون والخبز
وماكينة البيتسا هومر نطيب فيها الشاوما والفطيرة ورحاية التوبل
ومكنسة كهربائية ماركة ال جى حتى هى مريحتنى
ومدفاءة كهربائية ومكيف ومكواة وسشوار وتلفزيون وشاشة ال سى دى وثلاجة
والاشياء الى مش مستفيدة منها
خلاط امتع الملقى وست البيت المعروفة الى تكون بروحها
وعندى ماكينة لازالة الشعر مش عارفة ماركتها جتنى هدية ماتنحى فى شئ
والاشياء الى خاطرى نشريها
كوشة كهربائة وغلاية الماء ومضرب الكيك و ماكينة الدوناتس وثلاجة الماء ماكينة براون امتع الشعر الى دعايتها امتع المغنية يارا
سامحونى كان طولت عليكم

[om_adnan]

أختى أنهار,طنجرة الضغط اللى عندى إيطالية(لا غاستينا),ومعها ضمان مدى الحياة,اى طنجرة ضغط تكون ماركة عالمية كويسة,فى بعض الاغراض حتى لو غالية ترد ثمنها مع الوقت,لو تكونى شاطرة فى التسويق اتشوفى اللى تعجبك وتشريها فى التنزيلات.

[anhr]

صحيتى اوخيتى, توا بندير دوره ونشوف

[الصابرة]

اجهزتي التي استفدت منها
طاجين البيتزا ماركة هومر استخدم فيه للفطيرة بالدرجة الاولى
ميكرويف ماركة هومر حلى ازمة التسخين ياسلام وخصوصا كان نسيتي مالفيتيش الفطيرة تيبس سخنيها في المايكرويف ترد كانك دايرتيها تو
كوشة كهرباء لها عندي 5سنوات ماشاءالله عليها مريحتني ماركة تركية لكن مش عادية لان اهلي عندهم زيها وليها 10سنين
ست بيت الكبيرة يجي معاها ست قطع مبشرة وكبيرة وصغيرة وخلاط عصير وراحيات التوابل وعصارة عصير وصونية ست البيت ماركة هومر طبعا الحلو فيها ان صونية ست البيت حجمها اكبر ملي تجي بروحها لكن الله يبارك فيها ليها 5 سنين من بتات عرسي وماشاءالله ديمة نخدم بيها هيا ايديا الاثنين الزيادة
عندي مكيف ومدفئة زيتية ايطالية الصنع ومدفئة الشمعاي و2تلفزيون وامس بس جبنا شاشة ال سي دي 42 بوصة وجهاز كمبيوتر عادي ومحمول
ومكنسة كهربائية الله يخليها ماركة سوني
وشواية كهربائية مانعرفش ماركتها لكن صناعتها تركية الحق فكتني من دخاخين الفحم
وماكينة الرشدة ماركة هومر
ومضرب كهربائي ماركة هومر مش عادي ليه معاي 3 سنين
قلاية بطاطا ماركة هومر نص كيلو زيت لكن الحمدلله فكتني من الزيت اللي نقعد نمسح فيه من على السراميك والغاز ليها 5سنين من بتات عرسي
والحق مستفادة منهن كلهن ومافيش حاجة جت شريتها من غير فايدة الحمدلله
الي خاطري نشريها
ماكينة تست اللي طروفها ينفكن ومعاه نوع ثاني في اللي معاها قطع شواية وفي اللي معاها قطع وفل وبما عندي شواية خاطري من اللي معاها وفل
وماكينة البوريك ان شاءالله قبل رمضان
سامحوني اطلت عليكم

[تعزيز]

نبي نعرف من لشرت ماكينة الوافل من وين شرتها وبكم خاطري نشريها

اما المشتريات الله يفتح عليا وعليكم

اشتريت ماكينة اوتماتك الجي 10 كيلو 500 دينار من سوق غوط الشعال

اشريت ماكينة القلي بدون زيت الاصلية من الوكيل في قرقارش 370 دينار دينار ينطح دينار
وكويس كويس بجد اقل زيت واقل تعب وطبعا كل حاجة لها وقت معين وكلع ناقص زيت في
رمضان كانت يد العون اخية وميمة ههههههههههههههههههه ماشاء الله تقع الكوجينة انضيفة لانها فيها شفاط
يعني ما فيش ريحة وغير هكي مافيش بعد اليوم حكان ميولكة بعد اليوم هههههههههه اخخخخخخخخخخ


ايش رايكم ننفع نخدم في الدعايات

اشتريت عجانة كبيرة من الوكيل الاماني في سوق غوط الشعال دككينة اصغير كلعه عجانت ماركة وكويسة
لخديتها فيها مفرمة وخلاط وفيها ملحق لشغل المعجنات بصراحة معرفتش او ما زال مستخدمتاش لتشكيل المكرونة
لكن في العجن تبارك الرحمن ماشاء الله ههههههههههه يعني خبيزة المانية مية في المية

اشتريت ما كينة تسط وبعتها شطرة اخخخخخخخخخخ بصدق بعد ماشريتها لقيتها زايدة قلت حرام تقعد مركونة

ه\ا تقريبا كل شيء وكان اشتريت حاجة ثانية انبلغكم باش تباركوا تحياتي

[luba]

مبروووك علي الكل وتبيدوهم بالهني والصحة

تعزيز ياريت تقولينا سعر العجانه ومن وين بالضبط وشن ماركتها

ولو تقدري صورة او تاخديها حتي من القوقل نفس الماركه تكتبيها وتجيبهلنا ضروري

[خواطر حساسة]

الحمد لله مانشري غير المستحق .بس اهم شي شريته وعزيز عليا يخطر عليا طفولتي هي ماكينة فرم اللحم اليدوية نستعملها لبشكوط الفرامة والكعك العادي عزيزة عندي واجد .اله الهرس واله خفق البيض مع اداة للعجن .ست البيت .ماكينة رشدة.غلاية حسيته مش ضرورية .اله الدونات جتني هدية عرسي .غسالة اتوماتيك ننصح بيها كل امراءة عاملة .مكواة بخارية هدية من زوجي مايبيني نتعب ههههههههه.
بس خاطري في ماكينة توست بس زوجي مش مقتنع بيها ان شاء الله اتجيني هدية

[نسمه ليبيه]

خواطر حساسة. ..حلوه ماكينة التوست ومش غاليه

تعزيز شن هى الة التسط

[luba]

اني ننصح كل ليبية قبل تشري اسوارت دهب تشري غساله الماعين والكاتل اللي هو الابريق الكهربائي

والغساله لو علي غلا صابونها مش ديمه تستعمليها استعمليها ايام تكوني مريضه مناسبه وزحمت عليك الكوجينه

يعني حتي للطوارئ رحمه طالعه لعرس ومستعجله علي ضم المطبخ والغسل

الحق رووووعه واغلي عندي من الدهب في ليبيا ماكانت في بس توا نزلت واجد بس جربتها اهني بره

العون الكبير وقت العزائم وشهر رمضان والعيد الكبيرة و وقت المرض و الكسل

وكدلك ماكينة فرم اللحم ممتازة لفرم الطعمية والهريسه و التمر المعجون للمقروض

و المرقاز معاها قمع للمرقاز اللي هو النقانق هادي احلي ماكينة وافضل انواعها مونيليكس


اما اسوأ ماكينه شواية الكهربائية اللي بدون غطا تخلي الحوش كله في حاله اما
اللي بالغطا وتسكر علي بعضها كويسه وتطييبها ممتاز و حتي الزائد من المية والدهن ينزل تحت في صندوق
بلاستيك صغير زي الدرج تجبديه وتفرغيه
وهدا مايحضرني للان

[خواطر حساسة]

اختي نسمة ليبية مش الفكرة يارينها غالية نخش جمعية ونشريها االمشكلة انها ممنوعة انخش في البيت مش مقتنع بيها اصلا .الله غالب