[ دعوة للاجابة والاستفادة ]ما هو أكثر جهاز من اجهزتك المنزلية أستفدتي منه أو ندمتي على شرائه؟

[خدوج]

ماشاء الله حاجات تفتح النفس
ام سارة مكنستك تهبل تبيديها بالهنى
وكل وحدة عندها جهاز مبروك عليها وان شاء ديرو
وتعمرو دويراتكم كيف ماتبو
مبروك عليكم

[الكتومه]

بنااااااااااااااااااات باركولي اشتريت مايكرويف والعاقبه لباقي الحاجات
والصراحه انسيت شي مستفيده منها هو مجفف الملابس بصراحه مساعدني هلبا

[الحنونة]

السلام عليكم انى برة ليبيا بس شاريةشوية حاجات للمطبخ راح انزلها الايام الجاية
وهى الة بنكيك قطاعة بتسة طنجرة رز ومكايل مختلفة ميكرو ويف فرامة لحم وكبة ان شالله تعجبكم وراح لقوللكم اكثر الة ريحتنى وما نستغناش عليهاهو الميكرو ويف

[الساجدة لله]

حبيبة ياريت تنزلي الاتك كل وحدة في موضوع مستقل عشان تاخد حقها في المنتدى ومن الردود والتقييم بارك الله فيك

[# نور #]

السلام عليكم

أكتر آلة مريحة وعملية وتخدم ما شاء الله الخلاط ومعاه آلة طحن التوابل وآلة بشر الجبنة ماركة بلاك اند ديكر ممتازة لكن يا خسارة طاح الخلاط وانكسر جزء منه فمعاش يطبق الغطا عليه فمعاش يخدم ، لكن قاعدة المطحنة والمبشرة

اما الجهاز اللي نادمة عليه هو صناعة المانية ماركة كلانترينك مضرب بيض وعجانة ومعاه الة الكابتشينو اللي ادير رغوة وتطحن الشوربات .. حجمها صغير تاخد بس نص كيلو في العجن وبعدين معاش خدمت وقاعدة في الدولاب .

[ترهونيه حره]

المكنسه الكهربائيه لاغنى عنها ابدا وخلاط الكيك

[بيسان نيسان]

السلام عليكم اني عندي هلبة اجهزة وادوات مطبخية بحكم اني في غربة نشري لحوشي في ليبيا ان شاءالله فيه حاجات نستعمل فيها ديما وحاجات مش مستعملتها وبصراحة لما انجي بنكتب نلقاهم هلبة قداش بنكتب لهدا حنصورهم وانزلهم ان شاءالله وربي يباركلكم في حاجاتكم كلكم

[غدير الماء]

اني اقوللكم ماشريتش حاجه وندمت عليها لاكن اكثر شي امساعدني ست البيت والغساله متاعت اللماعين (الاواني)الله ايسلم من صنعهم وان شاء الله الي مادارها ايديرها

[أمـ ساره]

ليبية حرة مبروك عليك الميكروويف تبيديه بالهني ان شاء الله

والعقبة لباقي الحاجات ان شاء الله وكل وحدة تمنى حاجة تحصلها ان شاء الله


الحمد لله اني شريت غسالة الماعين والله ريحتني هلبة هلبة

العقبة عندكم يا بنات

[نسمه ليبيه]

ام ساره وغدير الماء

مبروك غسالات المواعين وان شاء الله تبيدوهم بالهنا

ممكن تقولن الماركات اللى شريتوهن شنى؟؟؟؟ وتعطونا فكره عالغسالات مثلا تستعملوها فى اليوم كم مره
وقديش تاخد وقت
وشن المواعين اللى ماتغسلهم وهكذا