[ دعوة للاجابة والاستفادة ]ما هو أكثر جهاز من اجهزتك المنزلية أستفدتي منه أو ندمتي على شرائه؟

[الساجدة لله]

وانا احرف منك يادوجة نقرا بالوجدة ونكتب في المدكرة بش نحطه على خاريطة المخططات هههههههههههه ياهمه الراجل مني لين معش عندي وين نحط حاجاتي والا مدكرات الطبخ امتاعي ههههههههههههههه مشاء الله كل شنطة نحصلها وخصوصا متاعات اللاب توب ومعش يبو يستعملوها اي في حد في الحوش ناخدها ونديرها لكتاباتي وكراساتي ههههههههههههه هيا نشطونا ارواحكم

[زهرة البيلسان]

موضوع مميز...............زالصراحة انى اكثر حاجة استفدت منها هيا الكاتل( سخان الماء)خصوصا في غلي الماء لحليب ابني امريحني جدا تاني حاجة ماكينة البيتزا اطيب حتي الخبزة وماكينة الدونات واكثر حاجة ندمت عليها هيا قلاية البطاطا

[ام تغريد]

السلام عليكم ورحمة الله وبركاته

موضوع حلو وشيق بارك الله في اللي فكرت فيه ونزلاته

من افضل الاجهزة الكهربائية عندي واللي ماندمتش عليه ومش حانندم واللي يناري عليه ملوح في الجنان في الريح والمطر الله غالب ماعندي وين انحطه هو الغاز الكهربائي كوشته مش عادية ونوعه امريكي كوشته واسعة ادخل طاجين الكوشة الخارجية ولقيته الغاز زي الرحمة في ازمة الغاز ولما يكمل الغاز نرجعله وطبعا عندي غاز عادي حتى هو كوشته كبيرة واهم شي عندي باش لما اندير الحلويات اندير في مرة

وثاني شي هى ست البيت اكبيدتها فدت مني

واكيد غسالة الملابس الاوتوماتيك lg

وغسالة الصحون حتى هيا مفيدة وخاصة تو منتشرة الامراض الجلدية عفاكم الله ومن اسبابها طبعا كثرة استعمال المواد الكيميائية في مواد التنضيف

واكيد الكمبيوتر واللي ما نستغنوش عليه ويوم يمشي للتصليح اللي في الحوش كلهم يهبلو وينقو على بوهم لين ايجيبه

مفرمة اللحم الكهربائية وهيا شاريتها بالدرجة الاولى مش للحم ولكن للهريسة اللي نديرها وتقعد من العام للعام

لان الاولاد يحبوهة هلبةوطبعا نستعملها في سبك الكعك

وايظا من الاشياء المهمة المضرب الكهربائى طبعا نستعمله في خلط النسكافيه مش عادي ايديرها زي الكريمة جربوها وما تندموش

والسشوار خديت الماركة ب75

وماستفتش منه من ثاني استعمال طاح من بنتي وفسد وخديت غيره ماركة الهومر ليه عامين وما شاء الله عليه

واكيد المكنسة الكربائية lg الللي زي الرحمة ما نعيشش من غيرها {طبعا تخصص بنتي}

والفريز من اهم الاشياء عندي وطبعا الحجم الكبير لكل شئ

والة التوست وخاصة في الصيف ايحبوها الاولاد عشي ويديروه بر وحهم مع العصير المسقع

ومن الات المطبخ عندي الة الجيلاتي وهيا الة قديمة هلبة كانت مركونة في حوش بوي واخديتها منهم

ونقوللكم يابنات حاجة اني من النوع اللي مانتسرعش في شري الحاجة الا لما نكون متا كدة من اهمية شرائها

لاني بنضايق علي روحي وما نلقاش وين انحطها وهذه هي المشكلة

ومن الالات المركونة خلاط العصائر الطبيعية لان الالياف الطبيعيةتتصفي في جهة و كلها تتلوح بدون فايدة فنفضل ان الفاكهة للفائدة ياكلوها طبيعية

والحمد لله علي كل ماوهبنا والله يديم النعمة والحمد لله

وان شاء الله تعم الفائدة

[شاطئ بلا رمال]

مداخله
الله يبارك الله يبارك ياسيدات المنتدى ياحبوبات
ماشاء الله على التفاعل هكي نبيكم ديما منورات
أسعدتني ردودكم وتفاعلكم مع الموضوع
من مده في بالي الموضوع بس هذا وين سخر ربي ونزلته
وإن شاء الله حاتكون ليا ردود مع كل وحده
ماشاء الله عليكم عيني عليكم بارده ربي يهنيكم جميعا
أكتشفت إنه عندنا ولع وشغف بشراء كل ما يمكن أن يضفي على بيوتنا السعاده والراحه والترفيه والتجدد الدائم ويدخل السعاده لقلوب أفراد أسرتنا
باش تعرفو بس إحني ربي خلقنا من أجل سعادة رجالتنا وأسرتنا والله هما محظوظين بينا
ربي يحفظنا ليهم

[سرور العامري]

السلام عليكم
والله كل شي نشريه نستفيد منه وأكثر شي ايعز عليا الخلاط ايسهل فهلبة حاجات بس الشي الوحيد الي ندمت علي شريته الغاز الغاطس لانه كان نوعه مش كويس وربي يستر فالجايات
ان شاء الله ماعاد نندم علي شي

[أم يمنى]

من مدة شريت ألة صنع الكابتشينو , ( مع انه مافى حد فى الحوش يشرب فيه ) بس للضيوف.



استخدمته شوية وبعدين فة احدى لفاتى فى السوق , لقيت ألة غريبة قلت ممكن للشاهى خلى نأخذها , وشريتها ولم استعملها الامن مدة قريبة , طلعتها ولقيت انها متع صنع كريمة الكابتشينو , وبديت كل ما تجى جاراتى يطلبوا الكابتشينو نستعمل فيها , استعمالها بسيط وزى الرحمة , وأحسن من الالة الاولى .

موضوعك حلو وبكرة ان شاء الله نصور مكنستى الكهربائية ( كيربى ) تكنس وتغسل فى السجاد وفيها هلبة اكسسوارات , لنا لقاء باذن الله .












سامحونى , الالة الاخيرة تدير فى رغوة الحليب , مشكورة يامغتربة ذكرتينى , نأخذ الابريق ونحط فيه حليب مغلى ونضغط الغطاء تحت وفوق لثوانى قليلة , تتشكل رغوة كثيفة نصبها ع كريمة الكابتشينو ( وهى خلط النسكافيه مع شوى سكر وضربه مع شوى مية ضربا مبرحا ( ع قولة هذاك الراجل ) , ويقدم بالهنا والشفاء .

وأحلى تقييييييم .

[مغتربة 7]

عرفتها يا ام يمنى عندي زيها لكن تختلف فى الشكل ادير رغوة للحليب روووووعة صحة
لكن صاحبتك تحب التعب والشقا نضرب فى الكابتشينو بيدي الطريقة التقليدية توا انصورها حتى اني
فى انتظار صور مكنستك ..

[ام تغريد]

اقتباس
المشاركة الأصلية كتبت بواسطة مغتربة 7





عرفتها يا ام يمنى عندي زيها لكن تختلف فى الشكل ادير رغوة للحليب روووووعة صحة
لكن صاحبتك تحب التعب والشقا نضرب فى الكابتشينو بيدي الطريقة التقليدية توا انصورها حتى اني
فى انتظار صور مكنستك .

للفائدة بدل الطريقة اليدوية استعملي المضرب الكهربائي لخفق الكيكات مجرباته يعمل في كريمة الكابتشينو زي متاع القهاوي وبسرعة كبيرة جربيه وما تخسري شي

[الساجدة لله]

ام يمنى ياريت اتنزلي الصور هده في موضوع منفصل وتكون هي والالة اللي قبلها في نفس الموضوع وتشرحي فيها التفاصيل انا ماعنديش الالة التانية مع انها بيسطة وسهلى الاستعمال كان صادفتني تاني حناخد منها

[الساجدة لله]

فكرتوني بالكب تشينو عندي الة من سيفيرين بااذن الله انزلها هاليومين بس تتصلح عندي النت وانزلها